காஞ்சிபுரம் மாவட்ட அதிமுக சார்பில் ஜெயலலிதாவின் 75வது பிறந்த நாளை முன்னிட்டு நலத்திட்ட உதவிகள் வழங்கும் விழா மற்றும் பொதுக்கூட்டம் மாவட்ட செயலாளரும், முன்னாள் அமைச்சருமான வி.சோமசுந்தரம் தலைமையில் காஞ்சிபுரம் காந்தி ரோடு பெரியார் தூண் அருகே நேற்று நடைபெற்றது. இதில் சிறப்பு விருந்தினராக அதிமுக செய்தி தொடர்பாளர் பொன்னையன் பங்கேற்று ஏழை எளியோர்களுக்கு நலத்திட்ட உதவிகளை வழங்கி சிறப்புரை ஆற்றினார்.
அப்போது அவர் பேசுகையில், ‘‘கொல்லைப்புறத்திலே ஆட்சிக்கு வந்து, கொடுமை செய்து, அடிக்க அடிக்க அம்மியும் நகரும் என்பதை போல, பொய்யை திரும்ப திரும்ப சொன்னால் மக்கள் நம்பி விடுவார்கள் என்ற தத்துவத்தை கடைப்பிடித்த கருணாநிதியும், அவருடைய மகன் மு.க.ஸ்டாலினும், ஸ்டாலினின் மகன் உதயநிதி ஸ்டாலினும் இன்று பொய்யிலே ஆட்சியை நடத்துக்கிறார்கள், பொய்யையே பேசிக்கொண்டிருக்கிறார்கள்.
அதிமுகவிற்கு ஊடகங்கள் எதிரிகளாக இருக்கிறார்கள். ஊடகங்கள் நேர்மையாகவும், சத்தியமாகவும் நடந்தால், இறைவன் மற்றும் இயற்கைக்கு பயந்து நடந்த உண்மையை மட்டும் போட்டால் கட்டாயமாக எந்த காலத்திலும் திமுகவால் ஆட்சிக்கு வர முடியாது.
குடும்ப ஆட்சி நீடிக்க முடியாது என்ற நிலையை மாற்றும் கடமை ஊடகங்களுக்கு உண்டு.
15 ஆண்டுக்கால ஆட்சிக்காலத்தில் 15 லட்சம் கோடிக்கு மேல் திமுக கொள்ளையடித்தார்கள் என சுப்பிரமணிய சுவாமி போன்றோர்கள் எல்லாம் ஆதரத்தோடு வெளியிட்ட அந்த கொள்ளைப் பணத்தில், ஊடகங்களை எல்லாம் விலைக்கு வாங்கி பொய்மையை எல்லாம் மெய்மை ஆக்கி விடலாம் என்று செயல்படுகின்ற காரணத்தால் தான், சென்ற தேர்தலில் திமுக வெற்றியை பெற்றார்கள்.
எடப்பாடி பழனிச்சாமி நிர்வாக திறமைமிக்கவர், அளப்பரிய நினைவாற்றல்மிக்கவர். ஏராளமான திட்டங்களை கொண்டு வந்து தமிழகத்தை முன்னிலை மாநிலமாக கொண்டு வந்து விட்ட பெருமைக்கு சொந்தக்காரர். எடப்பாடி கையிலேயே தமிழகம் கட்டாயமாக விரைவில் வர இருக்கிறது. திமுக குடும்பத்தின் கையிலேயே கோடிக்கனக்கான பணம் குவிந்துக் கொண்டிருக்கிறது, மக்களை சுரண்டி கொண்டிருக்கிறார்கள்.
பாரதிய ஜனதா கட்சி அலுவலகங்கள் 10-மாவட்டங்களில் இன்று அலுவலகங்கள் திறக்கப்பட்டுள்ளது..
அதனை எதிர்த்து கறை படியாத கைகளுக்கும், நேர்மைக்கும் சொந்தக்காரரான எடப்பாடியாரின் கை ஓங்கும். நடைபெறக் கூடிய நாடாளுமன்ற தேர்தலில் 40 தொகுதிகளும் எடப்பாடி தலைமையில் இருக்கின்ற அரசியல் அமைப்பிற்கு தான் கிட்டும் என்று மக்களின் மனப்பாங்கு இருக்கிறது. சுதந்திரம் அடைந்த இந்தியாவிலேயே ஈரோடு இடைத்தேர்தலில் தான் ஒரு ஓட்டுக்கு 27ஆயிரம் பணத்தை, லஞ்சப்பணத்தை, கொள்ளையடித்த பணத்தை திமுக கொடுத்திருக்கிறார்கள்.
இந்த இரண்டு ஆண்டுக்கால ஆட்சியிலே கொள்ளையடித்த பணம், 15 ஆண்டுக்காலமாக டெல்லியிலே கொள்ளையடித்த பணம் என ஒரு ஓட்டுக்கு ரூ.27ஆயிரம், மூன்று வேளையும் வீட்டிலுள்ள குழந்தைகள் உட்பட அனைத்து உறுப்பினர்களுக்கும் அசைவ உணவு கொடுத்து அரசியலை குட்டிச்சுவர் ஆக்கி, மக்களை கேவலப்படுத்தி வெற்றி பெற்றிருக்கும் வெற்றி வெற்றியே கிடையாது என தமிழகமும், இந்தியாவும் காரி துப்புகின்ற நிலையில் இருக்கின்ற இந்த கேவலமான திமுகவை வீட்டிற்கு அனுப்ப வேண்டும் என்ற வெறி உணர்வுடன் மக்கள் திரள வேண்டும்’’ என அவர் தெரிவித்தார்.