ஸ்ரீதர் வேம்பு என்ற பெயரை கேட்டாலே ஐடி ஊழியர்களுக்கு சட்டென்று நினைவில் தோன்றுவது ஜோஹோ (Zoho) நிறுவனம் தான். தஞ்சாவூரில் பிறந்து சென்னை ஐஐடியில் படித்து, அமெரிக்காவில் ஆய்வு பட்டம் என தனது அறிவை பட்டை தீட்டிக் கொண்டவர். பின்னர் குவால்காம் நிறுவனத்தில் வேலை, சென்னை திரும்பி ஸ்டார்ட்-அப் நிறுவனம் என தற்போது சாகசக்காரராக மாறியிருக்கிறார்.
Zoho Corporation நிறுவனர்
இவரது Zoho நிறுவனத்தை சர்வதேச அளவில் புகழ்பெறச் செய்து சாப்ட்வேர் துறையில் கொடிகட்டி பறந்து கொண்டிருக்கிறார். அமெரிக்காவின் சிலிக்கான் வேலியில் உள்ள நிறுவனங்களே இவருக்கு வாடிக்கையாளர்கள் என்றால் சும்மாவா? தற்போது பல்வேறு நாடுகளில் வாடிக்கையாளர்கள் உருவாகி விட்டனர். பல்லாயிரக்கணக்கில் வருவாய் ஈட்டி வருகிறது. இந்நிறுவனத்தின் மதிப்பு பல மடங்கு உயர்ந்துவிட்டது.
படிப்படியாக முன்னேற்றம்
உலக பணக்காரர்கள் பட்டியலில் ஒரு இடத்தையும் ஸ்ரீதர் வேம்பு பிடித்துவிட்டார். தமிழ்நாட்டின் சிறிய நகரங்களில் அலுவலகங்களை திறந்து உள்ளூர் மக்களை முன்னேற்றும் வேலையில் தீவிரம் காட்டி வருகிறார். இந்த சூழலில் தான் பிரபல ஃபோர்ப்ஸ் நாளிதழ் செய்தி ஒன்றை வெளியிட்டு பரபரப்பிற்கு ஆளாக்கியுள்ளது. அதில், ஸ்ரீதர் வேம்புவின் மனைவி பல குற்றச்சாட்டுகளை முன்வைத்துள்ளார்.
மனைவி பிரமிளா புகார்
முன்னதாக ஸ்ரீதர் வேம்பு, மனைவி பிரமிளா சீனிவாசன் மற்றும் மகன் ஆகியோர் அமெரிக்காவில் ஒன்றாக வசித்து வந்தனர். ஆனால் தற்போது ஸ்ரீதர் வேம்பு தன்னை கைவிட்டு விட்டதாக புகார் கூறியுள்ளார். தன் மகனுக்கு உடல்நலக் குறைவு ஏற்பட்டது. ஆனால் அதை கணவர் கவனிக்கவில்லை. இதற்கிடையில் எங்கள் இருவருக்கும் பொதுவாக இருந்த சொத்துகளை, பங்குகளை அவரது குடும்ப உறுப்பினர்களுக்கு சட்ட விரோதமாக மாற்றிவிட்டார்.
போர்ப்ஸ் இதழில் செய்தி
எனக்கு தேவையான தொகையையும் கொடுக்கவில்லை. கலிஃபோர்னியாவில் அமலில் இருக்கும் குடும்ப சொத்து சட்டத்தின் படி, சொத்துகளை மாற்றும் விஷயத்தில் கணவன் – மனைவி இருவரது சம்மதமும் தேவை. மீறி ஏதாவது செய்தால் அது சட்ட விரோதம். இப்படிப்பட்ட செயலை தான் ஸ்ரீதர் வேம்பு செய்திருப்பதாக பெரிய குண்டை தூக்கி போட்டுள்ளார் பிரமிளா சீனிவாசன்.
பரபரப்பு குற்றச்சாட்டு
இது சமூக வலைதளங்களில் பேசுபொருளாக மாறியுள்ளது. ஒரு தனிப்பட்ட நபரின் குடும்ப விஷயங்களை ஏன் பொதுவெளியில் விவாதிக்க வேண்டும் என்ற கேள்வி முன்வைக்கப்படுகிறது. இந்த குற்றச்சாட்டிற்கு ஸ்ரீதர் வேம்பு தனது தரப்பு விளக்கத்தை கொடுத்திருக்கிறார். அதில், மனைவி முன்வைத்த குற்றச்சாட்டுகள் தவறு. நான் யாருடைய பங்குகளையும் மாற்றவில்லை.
ஸ்ரீதர் வேம்பு பதில்
அமெரிக்காவில் இருந்து தமிழ்நாட்டிற்கு திரும்பியதன் நோக்கம் என்பது கிராமப்புற மேம்பாடு, மறுமலர்ச்சி. வேறு காரணங்கள் இல்லை. நான் வரும் போது மனைவி பிரமிளாவையும் அழைத்தேன். ஆனால் அவர் வரவில்லை. அதேசமயம் மனைவி, மகனை இதுவரை கைவிடவில்லை. அவர்களுக்கு தேவையானதை செய்து வருவதாக குறிப்பிட்டுள்ளார். இருதரப்பின் விவகாரமும் வழக்கறிஞர்கள் மூலம் அடுத்தகட்டத்திற்கு செல்லக்கூடும் எனச் சொல்லப்படுகிறது.