சீனா மற்றும் திபெத் ஆகிய நாடுகளுக்கு இடையேயான பிரச்சனை கடந்த 1950 ஆம் ஆண்டு தொடங்கியது. கடந்த 70 ஆண்டுகளில் சுமார் 10 லட்சத்துக்கும் மேற்பட்டதிபெத்தியர்களை சீன ராணுவம் படுகொலை செய்துள்ளதாக கூறப்படுகிறது. அதேபோ சுமார் 6 ஆயிரத்திற்கும் மேற்பட்ட பவுத்த மடாலயங்கள் அழிக்கப்பட்டுள்ளன.
சொந்த மொழி, மதத்தைப் பின்பற்ற முடியாமல் அகதிகளைப் போன்று திபெத் மக்கள் வாழ்கின்றனர். அவர்களின் ஒவ்வொரு நடவடிக்கையும் வேவு பார்க்கப்பட்டு, இன்றுவரை வேட்டையாடப்பட்டு வருகின்றனர். சீனாவிடம் இருந்து விடுதலை பெற வேண்டும் என்ற வேட்கை திபெத் மக்களிடம் கொழுந்துவிட்டு எரிகிறது. அதற்கு உதாரணமாக சீன அதிபர் மாமல்லபுரம் வந்தபோது அவருக்கு கருப்புக் கொடி காட்ட முயன்ற திபெத்தியர்கள் கைது செய்யப்பட்டது குறிப்பிடதக்கது.
பூகோள ரீதியாக முக்கியத்துவம் வாய்ந்ததிபெத்தை சீன கம்யூனிஸ்ட் அரசு தனது இரும்பு பிடியில் வைத்திருக்கிறது. நீண்ட காலமாக, சீன அரசாங்கம் திபெத்தியர்களை சீனாவில் நடைமுறையில் உள்ள ஹான் கலாச்சாரத்தில் இணைத்துக்கொள்ள முயன்று வருகிறது. அந்தவகையில் திபெத்தியக் குழந்தைகளுக்கான குறிப்பிட்ட கொள்கைகளைச் செயல்படுத்துவதில் இது ஈடுபட்டுள்ளது. குழந்தைகள் சீனாவின் மாண்டரின் மொழியில் கற்பிக்கப்படும் மற்றும் கம்யூனிச சித்தாந்தத்துடன் கற்பிக்கப்பட்ட குடியிருப்புப் பள்ளிகளில் சேர வேண்டிய கட்டாயம் ஏற்பட்டுள்ளது.
இந்தநிலையில் திபெத்திய மக்களின் உரிமைகளை சீன அரசு மீறுவதாக ஐநா மனித உரிமைகள் பேரவை மற்றும் மனித உரிமைக் குழுக்கள் குற்றம் சாட்டி வருகின்றன. ஆக்கிரமிக்கப்பட்ட திபெத்தில் சீனக் கலாச்சாரத்தில் திபெத்தியர்களை ஒருங்கிணைப்பதற்கான சீன அரசாங்கத்தின் முயற்சிகளின் ஒரு பகுதியாக, திபெத்திய குழந்தைகளை அவர்களது குடும்பங்களில் இருந்து கட்டாயமாகப் பிரிப்பது இதில் மிகவும் முக்கியமான அம்சங்களில் ஒன்றாகும்.
பிப்ரவரி 17 அன்று பிரஸ்ஸல்ஸில் நடந்த 38வது மனித உரிமைகள் உரையாடலில், திபெத்திய சிறுபான்மையினருக்கு எதிரான சீன அட்டூழியங்கள் மற்றும் “கலாச்சார சகவாழ்வு மற்றும் அடிப்படைச் சுதந்திரங்களைப் பயன்படுத்துவதில் கட்டுப்பாடுகள் ஆகியவற்றை அடக்குதல்” பற்றிய ஐ.நா மனித உரிமைகள் கவுன்சிலின் புதிய அறிக்கை குறித்து ஐரோப்பிய ஒன்றியம் கவலைகளை எழுப்பியுள்ளது. அதன்படி சுமார் 10 லட்சம் குழந்தைகள் பெற்றோர்களிடம் இருந்து பிரிக்கப்பட்டு உறைவிடப்பள்ளிகளில் சேர்க்கப்பட்டுள்ளதாக அறிக்கை கூறுகிறது.
இந்தநிலையில் ஒரு மில்லியன் திபெத்திய குழந்தைகளை அவர்களது குடும்பங்களில் இருந்து பிரித்து, பலவந்தமாக உறைவிடப் பள்ளிகளில் தங்கவைத்துள்ளதாக ஐ.நா.வின் சிறப்பு அறிக்கையாளர்களின் கூற்றை சீனா மறுத்துள்ளது.
இது குறித்து சீனாவின் வெளியுறவு அமைச்சக செய்தித் தொடர்பாளர் மாவோ நிங் கூறும்போது, “இது நிச்சயமாக உண்மை இல்லை, வெளிப்படையாக சீனாவைப் பற்றி பொதுமக்களை தவறாக வழிநடத்தும் மற்றும் சீனாவின் இமேஜைக் கெடுக்கும் மற்றொரு குற்றச்சாட்டு. உலகம் முழுவதும் பொதுவாகக் காணப்படுவது போல், உறைவிடப் பள்ளிகள் உள்ளன. உள்ளூர் மாணவர்களின் தேவைகளைப் பூர்த்தி செய்வதற்காக சீன மாகாணங்கள் மற்றும் பிராந்தியங்கள் முழுவதும் உறைவிடப்பள்ளிகள் அமைக்கப்பட்டுள்ளன.
இந்தப் பள்ளிகள் தங்குமிடம், கேட்டரிங் மற்றும் பிற போர்டிங் சேவைகளை வழங்குகின்றன. அவை மூடிய வசதிகள் அல்ல. சீனாவின் திபெத்தை பொறுத்தமட்டில், இது அதிக உயரம் கொண்ட பகுதி மற்றும் பல பகுதிகளில் அதிக அளவில் மக்கள் வசிக்கும் பகுதியாகும். குறிப்பாக கால்நடை வளர்ப்பு குடும்பத்தைச் சேர்ந்த குழந்தைகள் பள்ளிக்கு செல்ல நீண்ட தூரம் செல்ல வேண்டியுள்ளது. மாணவர்கள் வசிக்கும் ஒவ்வொரு இடத்திலும் பள்ளிகள் கட்டப்பட்டால், ஒவ்வொரு பள்ளியிலும் போதிய ஆசிரியர்களையும், தரமான கற்பித்தலையும் உறுதி செய்வது மிகவும் கடினம்’’ என அவர் கூறினார்.