தமிழக சட்டமன்றத்தில் போக்குவரத்து துறையின் மானியக் கோரிக்கைகள் மீது நேற்றைய தினம் விவாதம் நடைபெற்றது. இதையடுத்து பல்வேறு முக்கிய அறிவிப்புகளை அமைச்சர் சிவசங்கர் வெளியிட்டார். அதில், 50 சதவீத சலுகையில் பயணம் செய்யும் அறிவிப்பு மிகுந்த கவனம் பெற்றது. அதாவது, அரசு விரைவு போக்குவரத்து கழக பேருந்துகளில் ஒரு காலண்டர் மாதத்தில் 5 முறைக்கு மேல் முன்பதிவு செய்து பயணம் செய்யும் பயணிகளுக்கு சிறப்பு சலுகை வழங்கப்படும்.
கட்டணச் சலுகை
அதன்படி, அடுத்த தொடர் பயணங்களுக்கு (ஆறாவது பயணம் முதல்) 50 சதவீத கட்டணச் சலுகை வழங்கப்படும். இந்த சலுகை அனைத்து அரசு விரைவு போக்குவரத்து கழக பேருந்துகளுக்கும் பொருந்தும் எனத் தெரிவிக்கப்பட்டுள்ளது. இது கல்வி, வேலை, மருத்துவ வசதிகள் உள்ளிட்டவற்றுக்கு வழக்கமாக விரைவு பேருந்துகளில் பயணிக்கும் நபர்களுக்கு பெரிதும் உதவிகரமாக இருக்கும். இந்த சலுகையை பெற போக்குவரத்து தகவல் மையத்தை தொடர்பு கொள்ள அறிவுறுத்தப்பட்டுள்ளது.
வர்த்தக வாய்ப்புகள்
மேலும் இளைஞர்களுக்கு வர்த்தக வாய்ப்புகளுக்கு கதவுகள் திறந்து விடப்பட்டுள்ளன. இதுதொடர்பான அறிவிப்பில் தமிழகத்தில் உள்ள இளைஞர்களுக்கு அதிகாரம் அளிக்கும் நடவடிக்கையாக சுய தொழில் மூலம் வருமானம் ஈட்டும் வகையில் அரசு விரைவு போக்குவரத்து கழக பேருந்துகளில் உள்ள பயண சுமை பெட்டிகள் ஒரு மாதத்திற்கு 6,000 ரூபாய் வாடகை அடிப்படையில் இளைஞர்களுக்கு ஒதுக்கீடு செய்யப்படும்.
பெண்களுக்கு தனி இருக்கைகள்
அரசு விரைவு பேருந்துகளின் புறப்படும் மற்றும் சேரும் இடங்களுக்கு இடையே விவசாய பொருட்கள் அல்லது தொழில்துறை தயாரிப்புகளை சிப்பம் மூலம் அனுப்ப இந்த பயண சுமைப் பெட்டிகளை பயன்படுத்தலாம். இந்த திட்டம் ஓராண்டிற்கு மட்டுமே பொருந்தும் எனக் கூறப்பட்டுள்ளது. இதுதவிர அரசு விரைவு பேருந்துகளில் பெண்களுக்கு தனியாக 4 இருக்கைகள் ஒதுக்கப்படும்.
மகளிர் சுய உதவிக் குழுக்கள்
பயண நேரத்திற்கு 24 மணி நேரம் முன்பு வரை இணையதள முன்பதிவில் பெண் பயணிகளுக்கான இருக்கைகள் ஒதுக்கப்பட்டிருக்கும். இதையடுத்து பேருந்து பணிமனைகளில் உள்ள உணவகங்களை நடத்த மகளிர் சுய உதவிக் குழுக்களுக்கு முன்னுரிமை அளிக்கப்படும். அரசு போக்குவரத்து கழக பேருந்துகளில் பணிபுரியும் ஓட்டுநர்கள்,
குளிர்சாதன வசதி
நடத்துநர்கள் நீண்ட நேரம் பேருந்துகளில் பணி செய்வதால் அவர்கள் ஓய்வெடுக்க சிறந்த சூழ்நிலை உருவாக்கி தரப்படும். அரசு போக்குவரத்து கழக பணிமனைகளில் உள்ள பணியாளர்கள் ஓய்வு அறைகளில் குளிர்சாதன வசதி ஏற்படுத்தப்படும். அரசு போக்குவரத்து கழகங்களில் உள்ள 315 பணிமனைகளில் ஒவ்வொரு பணிமனை அளவிலும்,
மாணவர்களுக்கு பரிசு
தொழிலாளர்களின் குழந்தைகளுக்கு 10, 12ஆம் வகுப்பு பள்ளி இறுதி தேர்வில் முதல் மூன்று இடங்கள் பெறும் மாணவ, மாணவிகளுக்கு முறையே 1500 ரூபாய், 1000 ரூபாய், 500 ரூபாய் என ஆண்டுதோறும் 18.90 லட்ச ரூபாய் செலவில் பரிசுத் தொகை வழங்கப்படும் எனக் கூறப்பட்டுள்ளது.