பாஜகவில் இளம் மாநிலத் தலைவர் என்ற பெருமையுடன் நுழைந்தவர் அண்ணாமலை. கர்நாடகாவில் ஐபிஎஸ் அதிகாரியாக இருந்த போது பெற்ற செல்வாக்கை கொண்டு, டெல்லி மூலம் நேரடியாக தமிழக அரசியல் களத்தில் குதித்தார். பாஜகவை பொறுத்தவரை அதன் நாடாளுமன்ற குழு தான் அதிகாரம் பெற்ற அமைப்பாக விளங்குகிறது. இங்கு எடுக்கப்படும் முடிவுகள் தான் மாநில அளவில் செயல்படுத்தப்படும். நிர்வாகிகள் நியமனம் முதல் கட்சி ரீதியிலான நகர்வுகள் வரை அனைத்து விஷயங்களையும் இந்த குழு தான் தீர்மானிக்கும்.
அண்ணாமலை பாலிடிக்ஸ்
ஆனால் அண்ணாமலையின் அரசியல் வேறு மாதிரியான பிம்பத்தை தமிழகத்தில் வெளிப்படுத்தியது. அதாவது, தன்னை சுற்றி அரசியல் களம் நகரும் வகையில் காய்களை நகர்த்தினார். செய்தியாளர்கள் சந்திப்பு என்றாலும் சரி. ஆளும் கட்சியை விமர்சிப்பது என்றாலும் சரி. கூட்டணி கட்சியான அதிமுகவை சீண்டுவதானாலும் சரி. அண்ணாமலை தான் தலைப்பு செய்தி. இது டெல்லியின் அதிகார மட்டத்திற்கு சங்கடத்தை ஏற்படுத்தினாலும் அண்ணாமலையின் துடிப்பான செயல்பாடுகளை ஒரு எல்லை பொறுத்திருப்போம் என அனுமதித்தனர்.
திமுகவின் ஊழல் பட்டியல்
இந்த விஷயம் தற்போது DMK Files-ல் வந்து நிற்கிறது. ஏப்ரல் 14 தமிழ் புத்தாண்டு தினத்தன்று காலை 10.15 மணிக்கு திமுகவினரின் ஊழல் பட்டியல் வெளியிடப்படும் என கவுன்ட்டவுனை தொடங்கி வைத்துவிட்டார். இந்த விஷயம் காரசாரமாக விவாதிக்கப்பட்டு வருகிறது. DMK Files-ல் என்னென்ன விஷயங்கள் இடம்பெறப் போகின்றன. யாரெல்லாம் சிக்கப் போகிறார்கள் போன்றவை பெரும் எதிர்பார்ப்பை கிளப்பி விட்டுள்ளது. இதுபற்றி பாஜகவிற்கு நெருக்கமான வட்டாரத்தில் விசாரித்தால், திமுக தலைமை மற்றும் முக்கிய அமைச்சர்களின் சொத்து பட்டியல் வெளியிடப்படும்.
என்னென்ன விவரங்கள்
வேட்புமனுவில் குறிப்பிட்ட சொத்து விவரங்கள் உடன் ஒப்பிட்டு, தற்போது அவர்களின் சொத்து மதிப்பு எந்த அளவிற்கு உயர்ந்துள்ளது. திமுக புள்ளிகளின் பினாமிகள் யார், யார்? அவர்களின் சொத்து மதிப்புகள் எவ்வளவு? போன்ற விவரங்களை வெளியிட அதிக வாய்ப்புகள் இருக்கிறதாம். இதன்மூலம் திமுக ஒரு குடும்பத்தின் கையில் எவ்வாறு சிக்கி தவித்து வருகிறது. வாரிசு அரசியல் மூலம் எந்த அளவிற்கு பிரம்மாண்டமாக சொத்துகளை சேர்த்து குவித்துள்ளனர் என்பதை பொதுவெளியில் போட்டு உடைக்கப் போகிறார்.
வாரிசு அரசியல்
பாஜக அல்லாத மாநிலங்களில் பிரதமர் மோடி முன்வைக்கும் குற்றச்சாட்டுகளில் ஒன்று வாரிசு அரசியல். அதில் காங்கிரஸ், திமுக உள்ளிட்ட பல்வேறு கட்சிகள் அடங்கும். இந்த விஷயத்தை ஒரு ஆயுதமாக மக்கள் மன்றத்தில் முன்வைத்து பாஜக அரசியல் செய்து வருகிறது. அதற்கு வலுசேர்க்கும் வகையில் அண்ணாமலையின் DMK Files இருக்கும்.
திமுக – பாஜக டீலிங்
இது பாஜகவிற்கு மட்டுமின்றி அண்ணாமலைக்கும் தனிப்பட்ட வகையில் அனுகூலமாக இருக்கும் எனக் கூறுகின்றனர். ஆனால் திமுக உடன் பிரதமர் மோடி இணக்கமான போக்கையே கடைபிடித்து வருகிறார். இப்படிப்பட்ட சூழலில் அண்ணாமலையின் ஊழல் பட்டியல் பெரிதாக எதையும் செய்துவிடாது. அவருடைய இமேஜை வேண்டுமானால் டெல்லியில் உயர்த்தலாம்.
ஆருத்ரா விவகாரம்
ஆருத்ரா மோசடி விவகாரத்தின் பிடி திமுக அரசின் கைகளில் தான் இருக்கிறது. அதில் சல்லடை போட்டு தேடினால் பாஜகவில் பலர் சிக்குவர். இதிலிருந்து திசை திருப்பும் முயற்சியாக கூட அண்ணாமலை செயல்படலாம் என்ற பார்வையை அரசியல் விமர்சகர்கள் முன்வைக்கின்றனர். DMK Files-ஐ திமுக தலைமை எப்படி அணுகப் போகிறது. அண்ணாமலை பிளான் ஒர்க் அவுட் ஆகுமா? என்பதை பொறுத்திருந்து பார்க்கலாம்.