டிக்கெட் வேணும்
தமிழக சட்டமன்றத்தில் கடந்த சில நாட்களுக்கு முன்பு பேசிய எதிர்க்கட்சி கொறடா எஸ்.பி.வேலுமணி, ‘‘சென்னை சேப்பாக்கம் மைதானத்தில் நடைபெறும் ஐபிஎல் (IPL) போட்டிகளை காண எம்.எல்.ஏக்களுக்கு டிக்கெட் வாங்கி தர வேண்டும். நாங்கள் ஆட்சியில் இருந்த காலத்தில் எம்எல்ஏக்களுக்கு டிக்கெட் கொடுத்தோம். திமுக ஆட்சிக்கு வந்ததும் அதை நிறுத்திவிட்டார்கள்’’ என்று பேசினார்.
இதற்கு பதிலளித்து பேசிய விளையாட்டுத் துறை அமைச்சர்
(Udhayanithi Stalin), ‘‘நான்கு ஆண்டுகளாக இங்கு ஐபிஎல் போட்டிகளே நடைபெறவில்லை. நீங்கள் யாருக்கு டிக்கெட் வாங்கி கொடுத்தீர்கள் என்று தெரியவில்லை. தற்போது தான் போட்டிகள் நடைபெறுகின்றன. நான் என்னுடைய சொந்த செலவில் எனது தொகுதியை சேர்ந்த கிரிக்கெட் விளையாடும் 150 பேருக்கு டிக்கெட் வாங்கி கொடுத்து ஐபிஎல் போட்டிகளை பார்க்க செய்கிறேன்.
அமித்ஷாவ கேளுங்க
ஐபிஎல் யார் நடத்துகிறார்கள் என்றால் பிசிசிஐ. உங்களின் நெருங்கிய நண்பர் அமித் ஷா இருக்கிறார் அல்லவா? அவர் மகன் ஜெய்ஷா தான் தலைமை பொறுப்பு வகிக்கிறார். நாங்கள் சொன்னால் கேட்க மாட்டார்கள். நீங்கள் சொன்னால் கேட்பார்கள். அனைத்து சட்டமன்ற உறுப்பினர்களுக்கும் ஐந்து டிக்கெட் வாங்கி கொடுத்தால் போதும். நாங்கள் காசு கொடுத்து கூட வாங்கி கொள்கிறோம். இல்லையெனில் வேறு ஏதாவது கணக்கில் சேர்த்து விடுவீர்கள்’’ என்று உதயநிதி ஸ்டாலின் பேசியிருந்தார்.
இந்த விவகாரம் சமூக வலைதளங்களில் ட்ரெண்டானது. மக்களோட பிரச்சனைகளை பேச சட்டமன்றத்திற்கு அனுப்பினால், மேட்ச் பாக்கணும் ஃப்ரி டிக்கெட் கொடு என கேட்பதா என வேலுமணியை நெட்டிசன்கள் வறுத்தெடுத்துவிட்டனர். இந்த சூழலில் தமிழக சட்டமன்றத்தில் அமித் ஷா பெயரை அமைச்சர் உதயநிதி ஸ்டாலின் பயன்படுத்தியதை அவைக்குறிப்பில் இருந்து நீக்க வேண்டும் பாஜக எம்எல்ஏ வலியுறுத்தினார்.
பாஜக வெளிநடப்பு
அப்போது அவையில் எழுந்து விளக்கம் அளித்த முதல்வர் மு.க.ஸ்டாலின், ‘‘மத்திய அமைச்சரின் பெயர் என்ன தகாத வார்த்தையா? எதற்காக அவைக் குறிப்பில் இருந்து நீக்க சொல்கிறீர்கள். அமைச்சர் மரியாதை குறைவாக எதுவும் சொல்லவில்லை. அப்படி சொல்லியிருந்தால் நானே நீக்க சொல்லி விடுவேன். திரு என்று சொல்லி தான் அமைச்சர் பேசியுள்ளார். எனவே நீக்க வேண்டிய அவசியமில்லை’’ என்று தெரிவித்தார். அதைத் தொடர்ந்து பாஜகவினர் வெளிநடப்பு செய்தனர்.
இந்தநிலையில் கோவை குனியமுத்தூர் பகுதியில் முன்னாள் அமைச்சர் எஸ்.பி.வேலுமணி பொதுமக்கள் பயன்பாட்டிற்கு நீர் மோர் பந்தலை தொடங்கி வைத்தார். பின்னர் அவர் செய்தியாளர்களிடம் கூறும்போது, ‘‘ஐபிஎல் போட்டிகளை பொறுத்த வரை கிரிக்கெட் போர்டில், சட்டமன்ற உறுப்பினர்களுக்கு 300, 400 டிக்கெட் கொடுக்கப்பட்டிருப்பதாக கேள்விபட்டோம். அந்த நேரத்தில் இந்த கேள்வியை கேட்டால் சரியாக இருக்கும் என்பதால் தான் அந்தக் கேள்வி கேட்கப்பட்டது.
கேட்டதுல என்ன தப்பு.?
அனைத்து சட்டமன்ற உறுப்பினர்களுகாகவே கேட்கப்பட்டது. அதற்கு விளையாட்டு துறையில் இருந்து பதில் சொல்லிவிட்டார்கள். அதற்கு பின்பு சட்டமன்ற உறுப்பினர்கள் நிறைய பேருக்கு டிக்கெட் வந்திருக்கிறது. அவர்கள் போய் மேட்ச் பார்த்திருக்கிறார்கள்’’ என எஸ்.பி.வேலுமணி கூறினார்.