பாஜகவின் தாய் அமைப்பாக விளங்கும் ஆர்.எஸ்.எஸ் நாடு முழுவதும் கிளைகளை விரித்து பரந்து காணப்படுகிறது. இந்த அமைப்பின் தலைமை பொறுப்பு என்பது தேசிய அளவில் முக்கியத்துவம் பெற்றது. இவர்கள் பிறப்பிக்கும் உத்தரவின்படியே பாஜக செயல்பட்டு வருவதாக பேச்சு உண்டு. இந்த அமைப்பினர் வாரந்தோறும் கூட்டம் நடத்தி உறுப்பினர்களுக்கு சில பயிற்சிகளை அளித்து வருகின்றனர்.
ஆர்.எஸ்.எஸ் பேரணி
இந்நிலையில் கடந்த அக்டோபர் 2ஆம் தேதி காந்தி ஜெயந்தியை முன்னிட்டு பேரணி நடத்த ஆர்.எஸ்.எஸ் அனுமதி கேட்டது. ஆனால் தமிழக அரசு அவ்வளவு எளிதில் அனுமதி கொடுக்க விரும்பவில்லை. தடை, கட்டுப்பாடுகள் என கறார் காட்டி வந்தது. குறிப்பாக பி.எஃப்.ஐ அமைப்பினரை முன்வைத்து தான் பிரச்சினை கிளம்பியது.
பி.எஃப்.ஐ அமைப்பால் அச்சம்
ஆர்.எஸ்.எஸ் பேரணி நடத்தப்படும் போது பி.எஃ.ப்.ஐ அமைப்பினர் உள்ளே புகுந்து பயங்கரவாத செயலில் ஈடுபடக் கூடும். அசம்பாவிதங்கள் நிகழலாம். பொதுமக்களின் இயல்பு வாழ்க்கைக்கு பாதிப்பு வரலாம் என்ற பார்வை முன்வைக்கப்பட்டது. தற்போது பி.எஃப்.ஐ அமைப்பு மத்திய அரசால் தடை செய்யப்பட்ட அமைப்பாக இருக்கிறது.
உச்ச நீதிமன்றம் அனுமதி
இதற்கிடையில் ஒரு வழியாக உச்ச நீதிமன்றம் வரை சென்று அனுமதி வாங்கி விட்டனர். தமிழக அரசின் மனுவையும் தள்ளுபடி செய்துள்ளனர். நீதிமன்ற உத்தரவுப்படி தமிழகத்தின் 45 இடங்களில் இன்று ஆர்.எஸ்.எஸ் பேரணி நடத்தப்படுகிறது. அதேசமயம் போலீசார் சில கட்டுப்பாடுகளை விதித்துள்ளனர். அதன்படி நடக்காவிட்டால் சட்ட நடவடிக்கைகள் பாயும் என எச்சரிக்கப்பட்டுள்ளது.
போலீசார் கெடுபிடிகள்
ஊர்வலம் போது தனி நபர்களை குறிப்பிட்டோ, சாதி, மதம் பற்றியோ தவறாக பேசக் கூடாது.இந்திய அரசால் தடை செய்யப்பட்ட அமைப்புகளுக்கு ஆதரவாக எந்தவித கருத்துகளையும் பேரணியில் தெரிவிக்கக் கூடாது.போக்குவரத்திற்கு இடையூறு ஏற்படுத்தக் கூடாது. பொதுமக்களுக்கும் தொந்தரவு தராத வகையில் ஊர்வலம் நடத்த வேண்டும்.பொதுச் சொத்துகளுக்கு சேதம் ஏற்பட்டால் அதனை ஏற்கும் வகையில் உறுதிமொழி அளிக்க வேண்டும்.பெட்டி வடிவிலான ஒலி பெருக்கிகள் மட்டுமே பயன்படுத்தலாம். ஒலி சத்தம் 15 வாட்ஸிற்கு மிகாமல் இருப்பது அவசியம்.போலீசார் அனுமதி அளித்த இடத்தில் மட்டுமே ஊர்வலம் நடத்த வேண்டும். அனுமதிக்கப்பட்ட சாலையில் நான்கில் ஒரு பகுதியை மட்டுமே ஊர்வலத்திற்கு பயன்படுத்தலாம்.ஊர்வலம் நடத்த அனுமதிக்கப்பட்ட இடத்தில் இடதுபுறமாக மட்டுமே செல்ல வேண்டும்.ஊர்வலத்தின் போது தன்னார்வலர்களை நியமிக்க வேண்டும். அவர்கள் போக்குவரத்தை ஒழுங்குபடுத்துதல், ஊர்வலகத்தை ஒழுங்குபடுத்துதல் ஆகிய செயல்களில் போலீசாருக்கு உதவிகரமாக இருக்க வேண்டும்.இதில் கலந்து கொள்பவர்கள் பிறருக்கு காயம் ஏற்படுத்தும் வகையில் நடக்கக் கூடாது. கம்பு, ஆயுதங்கள் எதையும் கைகளில் ஏந்தி செல்லக் கூடாது.நாட்டின் இறையாண்மை, ஒருமைப்பாட்டிற்கு ஆகியவற்றுக்கு பாதிப்பு ஏற்படுத்தி விடக்கூடாது.