கர்நாடக மாநிலத்தில் நந்தினி vs அமுல் இடையிலான மோதல் அரசியல் மிகுந்த முக்கியத்துவம் பெற்றுள்ளது. இது மாநிலத்தின் தனித்துவத்தை அழிக்கும் முயற்சி என எதிர்க்கட்சிகள் குற்றம்சாட்டுகின்றன. குஜராத் மாநில கூட்டுறவு பால் உற்பத்தி பிராண்ட்டான அமுலை சம்பந்தமே இல்லாமல் இம்மாநிலத்தில் திணிக்க நினைப்பது ஏன் என்ற கேள்வியை பலரும் முன்வைத்தனர்.
பாஜக அரசு திட்டம்
ஏனெனில் கர்நாடகாவின் பிரத்யேக பிராண்ட்டான நந்தினி சுமார் 50 ஆண்டுகள் பாரம்பரியம் கொண்டது. மத்திய ஆளும் பாஜக அரசு ’ஒரே நாடு ஒரே அமுல்’ என்ற முடிவை நோக்கி நகர்வதாக குற்றச்சாட்டுகள் எழுந்தன. அதுமட்டுமின்றி நந்தினி பிராண்ட்டை விற்க பாஜக முயற்சிக்கிறது. அமுல் உடன் இணைக்க திட்டமிடுகின்றனர் என்றெல்லாம் தகவல்கள் பரவின.
கர்நாடக தேர்தல்
வரும் மே 10ஆம் தேதி சட்டமன்ற தேர்தல் நடைபெறவுள்ள நிலையில் நந்தினி vs அமுல் விவகாரம் ஆளும் பாஜக அரசிற்கு நெருக்கடியாக மாறியது. தேர்தல் நேரத்தில் இந்த விஷயத்தை தங்களுக்கு சாதகமாக பயன்படுத்த காங்கிரஸ், மதச்சார்பற்ற ஜனதா தளம் ஆகிய கட்சிகள் தீவிரம் காட்டின. மறுபுறம் எங்கள் மாநிலத்தின் தனித்துவமிக்க நந்தினி பிராண்டிற்கே முக்கியத்துவம் அளிப்போம் என்று பெங்களூரு ஓட்டல் சங்கம் தெரிவித்தது.
நந்தினிக்கு ஆதரவு
மேலும் பல்வேறு சங்கத்தினர், சமூக ஆர்வலர்கள் உள்ளிட்டோர் ஆதரவாக குரல் கொடுத்தனர். இதை கவனித்த முதல்வர் பசவராஜ் பொம்மை, நந்தினி பிராண்டிற்கு அமுலால் எந்தவித சிக்கலும் வராது என்று உறுதி அளித்தார். இந்நிலையில் இரண்டு நாட்கள் சுற்றுப்பயணமாக கர்நாடகாவிற்கு காங்கிரஸ் தலைவர் ராகுல் காந்தி சென்றுள்ளார். பெங்களூருவில் உள்ள நந்தினி கடைக்கு சென்று ஐஸ்கிரீம் வாங்கி சாப்பிட்டார்.
ராகுல் காந்தி ட்வீட்
அவருடன் மாநில காங்கிரஸ் கமிட்டி தலைவர் டி.கே.சிவக்குமார், பொதுச் செயலாளர் கே.சி.வேணுகோபால் மற்றும் கட்சி நிர்வாகிகளும் நந்தினி பிராண்ட் பொருட்களை வாங்கி சாப்பிட்டனர். பின்னர் தனது ட்விட்டரில்,
”கர்நாடகாவின் பெருமை நந்தினி தான் சிறந்தது”
என ராகுல் காந்தி பதிவிட்டுள்ளார். இதற்கு கர்நாடகாவை சேர்ந்த பலரும் வரவேற்பு தெரிவித்தனர்.
தேஜஸ்வி சூர்யா கேள்வி
இந்நிலையில் தெற்கு பெங்களூரு பாஜக எம்.பி தேஜஸ்வி சூர்யா தனது ட்விட்டரில், நந்தினி சிறந்தது என ராகுல் காந்தி கூறுவது வரவேற்கத்தக்கது. அதில் சந்தேகமே இல்லை. அதேசமயம் நந்தினி பிராண்ட்டை கேரளாவில் விற்பனை செய்ய நடவடிக்கை எடுப்பாரா? அப்படி செய்யவில்லை எனில் ராகுல் காந்தியின் செயல் வித்தை காட்டும் செயலாகும். நான் காத்திருக்கிறேன். கேரளாவில் இலவசமாக நந்தினி பிராண்ட்டை பெறும் வகையில் ராகுல் காந்தி பொது அறிவிப்பை வெளியிடுவார் என்று எதிர்பார்ப்பதாக குறிப்பிட்டுள்ளார்.