தேர்தல் அரசியல் என்றாலே சாதி வாரியாக வாக்குகளை கவரும் யுக்தி என்பது கட்சிகள் மத்தியில் எழுதப்படாத விதியாக இருந்து வருகிறது. அதில் கர்நாடகா சட்டமன்ற தேர்தல் மட்டும் விதிவிலக்கல்ல. இன்னும் 20 நாட்கள் தான் இருக்கிறது. மே 10ஆம் தேதி வாக்குப்பதிவு, மே 13ஆம் தேதி வாக்கு எண்ணிக்கையும் நடைபெறுகிறது. கர்நாடக மாநிலத்தில் பெரும்பான்மை சமூகங்கள் வரிசையில் லிங்காயத்து முதன்மையானதாக வந்து நிற்கிறது.
லிங்காயத்து வாக்குகள்
இதன் முகமாகவே பார்க்கப்பட்டவர் எடியூரப்பா. பாஜகவின் மூத்த தலைவராக 4 முறை கர்நாடக முதல்வர் நாற்காலியை அலங்கரித்தவர். ஆனால் ஒருமுறை கூட 5 ஆண்டுகளை முழுமை செய்யவில்லை. பாஜக விதிகளின் படி 70 வயதுக்கு மேல் தேர்தல் அரசியலுக்கு குட்பை சொல்லிவிட வேண்டும். அந்த வகையில் எடியூரப்பா ஒதுங்கி கொண்டார். இருப்பினும் லிங்காயத்து வாக்குகளை மனதில் வைத்துக் கொண்டு தேர்தலுக்காக சில முக்கிய பொறுப்புகள் வழங்கப்பட்டுள்ளன.
பாஜகவினர் அதிருப்தி
முன்னதாக எடியூரப்பா முதல்வர் நாற்காலியில் இருந்து ஓரங்கட்டப்பட்ட போதே பாஜக மீது லிங்காயத்துகளின் அதிருப்தி வலுப்பெற தொடங்கிவிட்டது. தற்போது தேர்தல் நெருங்கும் சூழலில் சீட் கிடைக்காத பாஜகவினர் பலரும் மாற்று கட்சிகளுக்கு தாவும் நடவடிக்கைகளில் ஈடுபட்டு வருகின்றனர். அதில் லேட்டஸ்ட் வரவாக பாஜக மேலவை உறுப்பினர் அயனூர் மஞ்சுநாத் மதச்சார்பற்ற ஜனதா தளத்திற்கு (JDS) தாவியுள்ளார்.
அயனூர் மஞ்சுநாத் வெளியேறினார்
இவர் பாஜகவில் இருந்து வெளியேறும் 10வது நபர் என்பது குறிப்பிடத்தக்கது. ஜேடிஎஸ்க்கு மாறியது மட்டுமின்றி சிவமொக்கா தொகுதியில் போட்டியிட சீட்டும் பெற்றுவிட்டார். அயனூர் மஞ்சுநாத்தை பொறுத்தவரை லிங்காயத்து சமூகத்தின் முக்கிய தலைவர்களில் ஒருவராக திகழ்ந்து வருகிறார். இவர் விலகியது அந்த சமூக வாக்குகளை பெறுவதில் பாஜகவிற்கு பின்னடைவை ஏற்படுத்தும் எனச் சொல்லப்படுகிறது.
பாஜக வியூகம்
இந்நிலையில் சிவமொக்கா தொகுதியில் அயனூர் மஞ்சுநாத்திற்கு எதிராக சன்னபசப்பாவிற்கு பாஜக சீட் வழங்கியுள்ளது. முன்னாள் துணை முதல்வரும், பாஜக எம்.எல்.ஏவுமான கே.எஸ்.ஈஸ்வரப்பா தேர்தல் அரசியலில் இருந்து ஓய்வு பெறுவதாக அறிவித்திருந்தார். இதனால் தனது மகன் கந்தேஷிற்கு சீட் கேட்டிருந்தார்.
12 தொகுதிகளில் மாற்றம்
ஆனால் கடைசி நேர திருப்பமாக சிவமொக்கா நகரை சேர்ந்த கார்ப்பரேட்டர் சன்னபசப்பாவிற்கு சீட் வழங்கப்பட்டது. இவர் கே.எஸ்.ஈஸ்வரப்பாவிற்கு நெருங்கிய நண்பர் எனச் சொல்லப்படுகிறது. அதுமட்டுமின்றி ஆர்.எஸ்.எஸ் பின்புலம் கொண்டவர். இதனால் சிவமொக்காவில் பாஜக, மதச்சார்பற்ற ஜனதா தளம் இடையிலான போட்டி மிகுந்த சுவாரஸியமாக இருக்கும் என எதிர்பார்க்கப்படுகிறது.
இதையடுத்து காங்கிரஸில் சீட் மறுக்கப்பட்ட அனில் லாட், மதச்சார்பற்ற ஜனதா தளம் சார்பில் பல்லாரி தொகுதியில் களமிறங்குகிறார். இதேபோல்
காங்கிரஸ்
, பாஜகவில் இருந்து வந்த நபர்களால் 12 தொகுதிகளில் தங்கள் வேட்பாளர்களை மாற்ற வேண்டிய கட்டாயத்திற்கு மதச்சார்பற்ற ஜனதா தளம் தள்ளப்பட்டது. இருப்பினும் கிங் மேக்கர் கனவில் கச்சிதமாக காய்களை நகர்த்தி வருவதாக தகவல்கள் தெரிவிக்கின்றன.