”அரசின் சிஸ்டம் சரியில்லை என்றும் இங்கு மாற்றப்பட வேண்டியதும் மாற வேண்டியதும் நிறைய உள்ளது” என்று அவ்வப்போது அமைச்சர் பழனிவேல் தியாகராஜன் விவாத நிகழ்ச்சிகளில் உடைத்து பேசி வருகிறார். பெரும்பாலும் அவர் கார்ப்பரேட் நிகழ்ச்சிகளிலும், தேசிய ஊடக விவாதத்திலும் கலந்துகொள்வதால் ஆங்கிலத்தில் பேச வேண்டியுள்ளது. இதனால் அவரது கருத்துக்கள் எளிய மக்கள் உட்பட வெகுஜன மக்களை சென்றடைவதில் சிக்கல் உள்ளது.
இந்த நிலையில் திமுக ஆட்சியில் கட்டிங், கமிஷன் போன்ற விஷயங்களில் அமைச்சர்கள் பல பேர் மீதும் பிடிஆர் அதிருப்தியில் இருப்பதாக கூறப்படுகிறது. அதே சமயம், டெண்டர், கமிஷன் விவகாரங்களில் அமைச்சர்களுக்கு ஒத்துழைக்காமல் இருப்பதால் பிடிஆர் மீது சக அமைச்சர்கள் அதிருப்தியில் இருக்கிறார்களாம். இந்த நிலையில், அமைச்சர் பழனிவேல் தியாகராஜன் டெல்லி நிருபரிடம் ஆங்கிலத்தில் பேசியதாக ஆடியோவை இணையத்தில் சவுக்கு சங்கர் வெளியிட்டுள்ளார். அதை தமிழக பாஜக தலைவர் அண்ணாமலையும் தற்போது பகிர்ந்துள்ளார்.
அந்த ஆடியோவில், திமுக ஆட்சிக்கு வந்த ஒரே வருடத்தில்
ஸ்டாலினும், மருமகன் சபரீசனும் அவர்களது மூதாதையரை விட அதிகமாக பணம் சம்பாதித்துள்ளனர். 10 கோடி 20 கோடி என சிறுக சிறுக ஓராண்டில் மட்டும் தோராயமாக 30 ஆயிரம் கோடி இருக்கும். இப்போது அது பிரச்சினையாக இருக்கிறது. இதை எப்படி கையாளுவது? எப்படி மாட்டிக்கொள்ளாமல் இருப்பது? என்று அமைச்சர் பழனிவேல் தியாகராஜன் பேசியதாக பதிவாகியுள்ளது. இந்த ஆடியோ பதிவு மிகுந்த பரபரப்பை ஏற்படுத்தி வருகிறது.
பாஜக மாநில தலைவர் அண்ணாமலை அண்மையில் திமுகவின் சொட்டு பட்டியலை வெளியிட்டார். அதில், கனிமொழி- ரூ.830.33 கோடி, கலாநிதிமாறன் – ரூ.12,450 கோடி, டிஆர் பாலு – ரூ.10,841.10 கோடி, துரைமுருகன் மகன் கதிர் ஆனந்த் – ரூ.579.58 கோடி, கலாநிதி வீராசாமி – ரூ.2,923.29 கோடி, பொன்முடி மற்றும் கவுதம் சிகாமணி – ரூ.581.20 கோடி, திமுக கட்சியின் சொத்து மதிப்பு – ரூ.1,408.94 கோடி, அன்பில் மகேஷ் பொய்யாமொழி ரூ.1,023.22 கோடி, உதயநிதி – ரூ.2,039 கோடி, சபரீசன் – ரூ.902.46 கோடி மற்றும் ஜி ஸ்கொயர் வருமானம் – ரூ.38,827.70 கோடி, ஜெகத்ரட்சகன் – ரூ.50 ஆயிரத்து 219.37 கோடி, எ.வ.வேலு – ரூ.5,442.39 கோடி,கே.என்.நேரு – ரூ.2,495.14 கோடி என மொத்தம் ரூ.1,34,317 கோடி சொத்து சேர்த்துள்ளனர் என்று அண்ணாமலை வெளியிட்டிருந்தார்.
அண்ணாமலை வெளியிட்ட பட்டியல்: துரைமுருகன் பரபரப்பு பேட்டி!
ஆனால், இந்த சொத்து விவரங்களை சம்மந்தப்பட்டவர்கள் மறுக்கவில்லை. அதே சமயம் ஆதாரம் கேட்டு அண்ணாமலைக்கு நோட்டீஸ் அனுப்பியுள்ளனர். அதற்கு பதில் அளித்த அண்ணாமலை சட்ட நடவடிக்கைகளுக்கு தயார் என்று கூறினார். இதற்கு மத்தியில் நிதி அமைச்சர் பழனிவேல் தியாகராஜன் பேசியதாக ஆடியோ பகீர் கிளப்பியுள்ளது. அதனை பகிர்ந்துள்ள அண்ணாமலை, நான் வெளியிட்ட சொத்து விவரங்களை இந்த ஆடியோ உறுதி படுத்தியுள்ளதாக தெரிவித்துள்ளார். அமைச்சர் பிடிஆர் இடம் இருந்து எந்த விளக்கமும் இதுவரை வரவில்லை. அண்ணாமலைக்கு சாதகமாக அமையும் இந்த ஆடியோ சரியான நேரம் பார்த்து சவுக்கு சங்கர் வெளியிட்டிருப்பதாகவும் பார்க்கப்படுகிறது.