புவனேஸ்வர்:
ஓய்வூதியம் வாங்குவதற்காக தள்ளாத வயதில் மூதாட்டி ஒருவர் உச்சி வெயிலில் நாற்காலி உதவியுடன் நடந்து செல்லும் வீடியோ சமூக வலைதளங்களில் வேகமாக பரவி வருகிறது.
இந்தியா அனைவருக்கும் சம உரிமை வழங்கும் நாடு என நாம் கூறிக்கொண்டாலும், சமூக அந்தஸ்தை அடிப்படையாக வைத்து மக்கள் மத்தியில் காட்டப்படும் பாரபட்சங்கள் மிக அதிகம்.
ஏழை என்ற ஒரே காரணத்துக்காக ஆம்புலன்ஸ் மறுக்கப்படுவதும், பிணத்தை தூக்கிச் செல்ல கூட அமரர் ஊர்தி தராத கொடுமைகளையும் நாம் கேள்விப்பட்டிருப்போம். அதுபோன்ற ஒரு சம்பவம்தான் ஒடிசாவில் நடந்துள்ளது.
மூதாட்டி சூர்யா அரிஜன்
ஒடிசா மாநிலம் நப்ராங்பூர் மாவட்டத்தைச் சேர்ந்தவர் சூர்யா அரிஜன். 70 வயது ஆகிறது. மிகவும் ஏழ்மையான குடும்பத்தைச் சேர்ந்த இவருக்கு 2 மகன்கள் உள்ளனர். மூத்த மகன் வெளிமாநிலத்தில் கூலி தொழில் செய்து வருகிறார். இவர் தற்போது இளைய மகன் வீட்டில் வசித்து வருகிறார். இந்த தள்ளாத வயதிலும் அங்குள்ளவர்களின் கால்நடைகளை மேய்த்து அதன் மூலம் காலத்தை நகர்த்தி வருகிறார் மூதாட்டி சூர்யா ஹரிஜன்.
கைரேகையில் சிக்கல்
முதியோர்களுக்கான ஓய்வூதியமான ரூ.1000-ஐயும் இவர் பெற்று வந்தார். இந்த சூழலில், இவரது விரல் ரேகை பதிவு, வங்கியில் ஏற்கனவே இருக்கும் பதிவுடன் ஒத்துப்போகவில்லை என எஸ்பிஐ வங்கி அதிகாரிகள் தெரிவித்துள்ளனர். இதனால் மூதாட்டியின் வங்கிக்கணக்கில் ஓய்வூதியம் போடப்படவில்லை. இதனால் பல கி.மீ. தூரத்தில் உள்ள வங்கிக்கு நேரில் நடந்து சென்று இவர் பென்சன் வாங்கி வந்துள்ளார்.
உச்சி வெயிலில் நடந்த மூதாட்டி
அந்த வகையில், நேற்று அவர் உச்சிவெயிலில் ஒரு உடைந்த நாற்காலி உதவியுடன் காலில் செருப்பு கூட இல்லாமல் நடந்து சென்றதை அங்கிருந்தவர்கள் தஙகள் செல்போனில் வீடியோ எடுத்து சமூக வலைதளங்களில் பதிவிட்டனர். இந்த வீடியோ வைரலாக பரவிய நிலையில், இதுகுறித்து சம்பந்தப்பட்ட வங்கி மேலாளர் விளக்கம் அளித்துள்ளார்.
மேனேஜர் விளக்கம்
அவர் கூறுகையில், “மூதாட்டி சூர்யா ஹரிஜனின் விரல்களில் அடிபட்டுள்ளதால் அவரால் ஓய்வூதிய பணத்தை எடுக்க முடியவில்லை. இதனால் வங்கிக்கு நேரடியாக வந்து அவர் ஓய்வூதியம் பெற்று வருகிறார். விரைவில் இந்த பிரச்சினையை தீர்க்க நடவடிக்கை எடுக்கப்படும்” என்றார்.