டெல்லி:
அமெரிக்காவில் இருந்து டெல்லி வந்த விமானத்தில் இந்தியப் பயணி ஒருவர் தனது அருகே அமர்ந்திருந்த சக பயணி மீது சிறுநீர் கழித்த சம்பவம் பெரும் பரபரப்பை ஏற்படுத்தியுள்ளது. ஏற்கனவே இதுபோன்ற 2 சம்பவங்கள் நடைபெற்றிருக்கும் நிலையில், தற்போது இந்த நிகழ்வு மேலும் அதிர்வலைகளை ஏற்படுத்தியுள்ளது.
சமீபகாலமாக நடைபெறும் சம்பவங்களை பார்க்கும் போது, மக்களுக்கு விமானப் பயணமே வேண்டாம் என்ற மனநிலைதான் ஏற்படுகிறது.
சிலரின் அநாகரீகமாக செயல்களே இதற்கு காரணம். ஓடும் விமானத்தில் புகைப்பிடிப்பது, எமர்ஜென்சி கதவை திறப்பது என ஒருபுறம் ஆபத்தான செயல்கள் நடந்து கொண்டிருக்க, மறுபுறம் அருவருப்பான செயல்களும் அரங்கேறி வருகின்றன.
அமெரிக்கன் ஏர்லைன்ஸ்:
அந்த வகையில், நேற்று நடந்த ஒரு சம்பவம் மக்களை கொதிப்படைய செய்துள்ளது. அப்படி என்னதான் நடந்தது.. இங்கு பார்க்கலாம். அமெரிக்காவின் நியூயார்க்கில் உள்ள ஜான் கென்னடி சர்வதேச விமான நிலையத்தில் இருந்து டெல்லிக்கு நேற்று முன்தினம் இரவு, ‘அமெரிக்கன் ஏர்லைன்ஸ்’ விமானம் புறப்பட்டது. விமானத்தில் 100-க்கும் மேற்பட்ட பயணிகள் இருந்துள்ளனர்.
தலைக்கேறிய போதை:
இந்நிலையில், நேற்று மதியம் அதில் இருந்த இந்தியப் பயணி ஒருவர், அளவுக்கு அதிகமாக மது வாங்கி அருந்திக் கொண்டிருந்தார். ஒருகட்டத்தில், போதை அதிகமானதால் அவர் உளறிக்கொண்டும், விமானத்தில் அங்குமிங்கும் நடந்து கொண்டும் இருந்துள்ளார். இதனால் அவரது அருகே இருந்த பயணிக்கும், அவருக்கும் இடையே தகராறு ஏற்பட்டுள்ளது. இருவரும் ஒருவரையொருவர் பயங்கரமாக திட்டியுள்ளனர். இதையடுத்து, விமானக் குழுவினர் அங்கு வந்து அவர்களை சமாதானம் செய்து அமர வைத்தனர்.
சிறுநீர்.. அலறல்..
இந்நிலையில் சிறிது நேரம் கழித்து தனது இருக்கையில் இருந்து எழுந்த அந்த போதை ஆசாமி, தன்னிடம் தகராறில் ஈடுபட்ட பயணி மீது அப்படியே சிறுநீர் கழித்தார். இதில் தூங்கிக் கொண்டிருந்த பயணி அலறியடித்து எழுந்து பார்த்தார். அப்போது தன் மீது போதை ஆசாமி சிறுநீர் கழிப்பதை பார்த்த அவர், சத்தமாக கூச்சலிட்டார். இதனைத் தொடர்ந்து, பாதிக்கப்பட்ட பயணிக்கு தனி இருக்கை அளிக்கப்பட்டது. மேலும், சிறுநீர் கழித்த பயணி குறித்து டெல்லி விமான நிலைய போலீஸாருக்கும் தகவல் அளிக்கப்பட்டது.
அதிரடி கைது:
இதையடுத்து, டெல்லி விமான நிலையத்தில் நேற்று இரவு விமானம் தரையிறங்கியதும், சம்பந்தப்பட்ட போதை ஆசாமியை போலீஸார் கைது செய்தனர். அவரிடம் தொடர்ந்து விசாரணை நடத்தப்பட்டு வருகிறது. எனினும், அவர் பெயர் உள்ளிட்ட விவரங்களை போலீஸார் வெளியிடவில்லை. முன்னதாக, கடந்த நவம்பர் மாதம் இதேபோல அமெரிக்காவில் இருந்து டெல்லி வந்த ஏர் இந்தியா விமானத்தில் சக பெண் பயணி மீது மதுபோதையில் சிறுநீர் கழித்த சங்கர் மிஸ்ரா என்பவரை போலீஸார் கைது செய்தது குறிப்பிடத்தக்கது.