பிகாரில் 40 பெண்களுக்கு ஒரே கணவர் இருப்பது தெரியவந்துள்ளது.
இடஒதுக்கீடு
நாடு முழுவதும் சமூகநீதி திட்டங்களை சாதிவாரி கணக்கெடுப்பு என்பது அவசியமாகிறது. எனெனில் இந்தியா என்பது சாதி அமைப்பால் பிளவுண்டு கிடப்பதால், அனைத்து மக்களுக்கும் வளர்ச்சி, சமமான உரிமை கிடைக்க இடஒதுக்கீடு என்பது இன்றியமையாததாக உள்ளது. இடஒதுக்கீடை அமல்படுத்த சாதிவாரி கணக்கெடுப்பு அவசியமாகிறது. ஆனால் துரதிஷ்டவசமாக 2011ம் ஆண்டு எடுத்த சாதிவாரி கணக்கெடுப்புகளின் முடிவை, பாஜக அரசு வெளியிட மறுத்து வருகிறது.
பட்டியலினத்தவர்கள், பழங்குடியினர் கணக்கெடுப்பைத் தவிர, இதர சாதிகளின் கணக்கெடுப்பை நடத்த வேண்டாம் என்று மத்திய அரசு கொள்கை முடிவு எடுத்துள்ளது என்று மத்திய உள்துறை இணையமைச்சர் நித்யானந்த் ராய் அமைச்சர் கூறியுள்ளார். இந்த சூழலில் ஒன்றிய பாஜக அரசை எதிர்பார்க்காமல் பீகாரில் சாதி வாரி கணக்கெடுப்பு அம்மாநில முதலமைச்சர் நிதிஷ்குமாரால் கடந்த ஜனவரி மாதம் தொடங்கப்பட்டது.
சாதிவாரி கணக்கெடுப்பு
இரண்டு கட்டங்களாக 45 நாட்கள் இந்த சாதிவாரி கணக்கெடுப்பு நடைபெறும் என்று அறிவிக்கப்பட்டு பணிகள் முடுக்கி விடப்பட்டன. 500 கோடி ரூபாய் நிதி ஒதுக்கப்பட்டு ஜனவரி 7ம் தேதி தொடங்கிய முதல் கட்ட கணக்கெடுப்பு, அதேமாதம் 21ஆம் தேதி வரை நடைபெற்றது. இந்த சூழலில் இரண்டாம் கட்ட கணக்கெடுப்பு ஏப்ரல் மாதம் நடைபெறும் என தெரிவிக்கப்பட்ட நிலையில், தீவிரமாக கணக்கெடுக்கும் பணிகள் நடைபெற்று வருகிறது. இந்த கணக்கெடுப்பில் மக்களின் சாதி, துணை சாதி, மதம், பொருளாதார நிலை ஆகியவை குறித்த விவரங்கள் சேகரிக்கப்படுகின்றன.
இந்த பணிகளை மேற்கொள்ள 5 லட்சத்திற்கும் மேற்பட்ட பணியாளர்கள் நியமிக்கப்பட்டு மக்களின் கல்வி, பொருளாதாரம், இன்னபிற தகவல்கள் சேகரிக்கப்பட்டு வருகின்றன. மாநிலத்தில் உள்ள 12.7 கோடி மக்களின் தகவல்கள் இரண்டு கட்ட கணக்கெடுப்புகளின் மூலம் திரட்டப்பட்டு, மே மாதம் முடிவுகளை அறிவிக்க பீகார் அரசு திட்டமிட்டுள்ளது.
40 மனைவிகள்
இந்தநிலையில் ஒரு கணவருக்கு 40 மனைவிகள் இருப்பது இந்த சாதிவாரி கணக்கெடுப்பின் போது தெரியவந்துள்ளது. பீகாரின் அர்வால் மாவட்டத்தில் உள்ள ரெட் லைட் ஏரியாவில் உள்ள 40 பெண்களின் விவரங்களை அதிகாரிகள் சேகரித்த போது, அந்த 40 பெண்களுக்கும் ரூப்சந்த் என்ற ஒரே நபர் கணவராக இருந்தது தெரியவந்துள்ளது.
இதை நம்பாத அதிகாரிகள் பெண்களின் குழந்தைகளின் சான்றிதழை பார்த்தபோது, 40 பெண்களும் தங்கள் குழந்தைகளின் தந்தையாக ரூப்சந்த் என்ற பெயரை பதிவு செய்திருந்தது தெரியவந்தது. இந்த பெண்கள் நிலையான இடங்களில் வசிக்காமல் நடோடி வாழ்க்கை மேற்கொள்வதாகவும், மேலும் பாடுவதும் நடனமாடுவதும் அவர்களின் தொழிலாக செய்து வருவதும் தற்போது தெரியவந்துள்ளது.