மும்பை:
ஏர் இந்தியா விமானத்தில் பயணம் செய்த பெண் பயணியை தேள் கொட்டிய சம்பவம் பெரும் பரபரப்பை ஏற்படுத்தியுள்ளது. ஏர் இந்தியா விமான நிறுவனத்துக்கு இது போதாத காலம் போலிருக்கிறது. சமீபகாலமாக அந்த விமானத்தில் நடக்கும் சம்பவங்கள் பெரும் அதிர்ச்சியையும், அதிர்வலைகளையும் ஏற்படுத்தி வருகின்றன.
கடந்த ஆண்டு நவம்பர் மாதம் அமெரிக்காவின் நியூயார்க்கில் இருந்து டெல்லி வந்த ஏர் இந்தியா விமானத்தில் பெண் பயணி மீது போதை ஆசாமி ஒருவர் சிறுநீர் கழித்தார். முதலில், இந்த சம்பவம் குறித்து அந்தப் பெண் புகார் அளித்து ஏர் இந்தியா நிறுவனம் அவர் மீது எந்த புகாரும் அளிக்கவில்லை.
பின்னர், இந்த விவகாரம் ஊடகங்களில் வெளியாகி பரபரப்பை ஏற்படுத்தியதை அடுத்து, சம்பந்தப்பட்ட பயணி மீது போலீஸில் புகார் அளிக்கப்பட்டது. இதன்பேரில், அந்த நபரை போலீஸார் கைது செய்தனர். அதேபோல, கடந்த மார்ச் மாதம் லண்டனில் இருந்து மும்பை வந்த விமானத்தில் எமர்ஜென்சி கதவை ஒருவர் திறக்க முயன்றார். தக்க சமயத்தில் பயணிகள் அவரை தடுத்து நிறுத்தியதால் பெரும் விமான விபத்து தவிர்க்கப்பட்டது.
அலறிய பெண் பயணி:
இந்நிலையில், தற்போது அதை விட மோசமான சம்பவம் ஒன்று அரங்கேறி இருக்கிறது. மகாராஷ்டிராவின் நாக்பூரில் இருநது மும்பைக்கு கடந்த 23-ம் தேதி AI 630 என்ற ஏர் இந்தியா விமானம் புறப்பட்டது. விமானம் புறப்பட்டு சுமார் அரைமணிநேரம் ஆன நிலையில், பெண் பயணி ஒருவர் திடீரென பயங்கரமாக அலறினார்.
கொட்டிய விஷத்தேள்:
அவரது அலறல் சத்தத்தை கேட்ட மற்ற பயணிகள் அதிர்ச்சி அடைந்தனர். அந்தப் பெண்ணோ தனது காலில் ஏதோ ஒன்று அறுத்துவிட்டதாகவும், தனக்கு மயக்கம் வருவதாகவும் கூறியுள்ளார். இதையடுத்து, அவரது காலை பார்த்த போது காயம் பட்ட இடம் நன்றாக வீங்கி இருந்தது. பின்னர் இருக்கைக்கு அடியில் சிலர் குனிந்து பார்த்தனர். அப்போது அங்கு ஒரு தேள் இருந்ததை பார்த்து அவர்கள் திடுக்கிட்டனர்.
தீவிர சிகிச்சை:
இதையடுத்து, தேள்தான் அவரை கடித்திருப்பது தெரியவந்தது. இதனிடையே, தேளால் கொட்டப்பட்ட பெண், வலியால் அலறித் துடித்து கடைசியில் மயக்கம் அடைந்தார். அவருக்கு விமான ஊழியர்கள் முதலுதவி அளித்தனர். பின்னர், மும்பை விமான நிலையத்தில் விமானம் இறங்கியதும், அவர் உடனடியாக மருத்துவமனையில் அனுமதிக்கப்பட்டார். அங்கு அவருக்கு தீவிர சிகிச்சை அளிக்கப்பட்டது. பின்னர் சில நாட்களில் அவர் டிஸ்சார்ஜ் செய்யப்பட்டார்.
ஏர் இந்தியா விளக்கம்:
இந்நிலையில், இந்த தகவல் இன்றுதான் வெளியே தெரியவந்தது. இதுகுறித்து ஏர் இந்தியா விமான நிறுவனம் வெளியிட்டுள்ள அறிக்கையில், “இது ஒரு அரிய நிகழ்வு. இதற்காக நாங்கள் மன்னிப்புக் கேட்டுக்கொள்கிறோம். விமானத்தை சுத்தம் செய்த போது அந்த தேள் அகப்பட்டது. இனி இதுபோன்ற சம்பவம் நிகழாது” என அதில் கூறப்பட்டுள்ளது. இது ஒருபுறம் இருக்க, கடந்த ஆண்டு டிசம்பர் மாதம் கோழிக்கோட்டில் இருந்து துபாய்க்கு சென்ற ஏர் இந்தியா எக்ஸ்பிரஸ் விமானத்தில் பாம்பு இருந்தது குறிப்பிடத்தக்கது.