சென்னை:
சென்னை, கோவை, மதுரை உட்பட தமிழகம் முழுவதும் என்ஐஏ எனப்படும் தேசிய பாதுகாப்புப் படை அதிகாரிகள் திடீர் சோதனை நடத்தி வருகின்றனர். தீவிரவாத அச்சுறுத்தல் இருப்பதாக ரகசிய தகவல் கிடைத்ததை அடுத்து இந்த ரெய்டு நடத்தப்பட்டு வருவதாக என்ஐஏ வட்டாரங்கள் தெரிவிக்கின்றன. இதன் ஒருபகுதியாக, திண்டுக்கல்லில் ஒருவரை போலீஸார் கைது செய்துள்ளனர்.
கார் வெடிப்பு சம்பவம்: என்ஐஏ அதிகாரிகள் அதிரடி சோதனை!
நாடு முழுவதும் பாப்புலர் ப்ரண்ட் ஆப் இந்தியா (பிஎப்ஐ) அமைப்பை கடந்த ஆண்டு செப்டம்பர் மாதம் மத்திய அரசு அதிரடியாக தடை செய்தது. தீவிரவாத இயக்கங்களுடன் தொடர்பில் இருந்ததாகவும், தீவிரவாத நடவடிக்கையில் ஈடுபட்டு வந்ததாகவும் கூறி அந்த அமைப்பு தடை செய்யப்பட்டது.
இதற்கு பிஎப்ஐ சார்பில் கடும் எதிர்ப்பு தெரிவிக்கப்பட்டது. இந்த தடையை தொடர்ந்து நாடு முழுவதும் சில இடங்களில் குண்டுவெடிப்பு சம்பவங்கள் நடைபெற்றன.
கோவை கார் வெடிப்பு:
குறிப்பாக, பாஜக, ஆர்எஸ்எஸ் பிரமுகர்களின் வீடுகளில் குண்டு வீசப்பட்டதாக செய்திகள் வெளியாகின. மேலும், கோவை மாவட்டம் உக்கடத்தில் காரில் குண்டுவெடிப்பு நிகழ்ந்தது. இது தீவிரவாத தாக்குதல் என்ஐஏ தரப்பில் கூறப்படுகிறது. இந்த சம்பவம் தொடர்பாக 10-க்கும் மேற்பட்டோரை என்ஐஏ அதிகாரிகள் கைது செய்தனர். அவர்களிடம் தொடர்ந்து விசாரணை நடத்தப்பட்டு வருகிறது.
என்ஐஏ சோதனை:
இந்த சூழலில், இன்று அதிகாலை முதலாக சென்னை, கோவை, மதுரை, திண்டுக்கல், நெல்லை உட்பட தமிழகம் முழுவதும் பல்வேறு இடங்களில் என்ஐஏ அதிகாரிகள் திடீர் சோதனை மேற்கொண்டு வருகின்றனர். தடை செய்யப்பட்ட போதிலும் பல பகுதிகளில் பிஎப்ஐ ரகசியமாக இயங்குவதாகவும், அதன் உறுப்பினர்கள் பல சதிச்செயல்களில் ஈடுபட்டு வருவதாகவும் என்ஐஏ அதிகாரிகளுக்கு தகவல் கிடைத்ததாக கூறப்படுகிறது. இதன் பேரிலேயே, இந்த சோதனையை என்ஐஏ மேற்கொண்டு வருகிறது.
ஒருவர் கைது:
இந்நிலையில், திண்டுக்கல் மாவட்டம் பழனி நேதாஜி நகரை சேர்ந்த முகமது கைசர் (50) என்பவரின் வீட்டில் என்ஐஏ அதிகாரிகள் சோதனை செய்தனர். முகமது கைசர் பிஎப்ஐ அமைப்பின் மதுரை மண்டல தலைவராக செயல்பட்டு வந்தவர் ஆவார். இந்த சோதனையை தொடர்ந்து, முகமது கைசரை என்ஐஏ அதிகாரிகள் கைது செய்து அழைத்துச் சென்றனர். இதனால் அந்தப் பகுதியில் பெரும் பதற்றமும், பரபரப்பும் நிலவியது.
முக்கிய ஆவணங்கள்:
முகமது கைசர் வீட்டில் இருந்து பல முக்கிய ஆவணங்கள் கைப்பற்றப்பட்டதாக என்ஐஏ வட்டாரங்கள் தெரிவிக்கின்றன. இவரது வீட்டில் கடந்த ஜனவரி மாதமும் என்ஐஏ சோதனை நடைபெற்றது. தற்போது திருப்புவனம் ராமலிங்கம் படுகொலை, கோவை கார் குண்டுவெடிப்பு ஆகியவை தொடர்பாக இந்த சோதனை நடைபெற்றதாக கூறப்படுகிறது.