கேரள மாநிலம் கொல்லம் மாவட்டத்தை சேர்ந்தவர் சந்தீப். ஆசிரியரான இவர் போதைக்கு அடிமையாகி உள்ளார். இந்நிலையில் சந்தீப் வீடு புகுந்து தாக்குதல் நடத்திய வழக்கில் கைது செய்யப்பட்டுள்ளார். இந்நிலையில் உடல் நலக்குறைவால் பாதிக்கப்பட்டிருந்த சந்தீப்பை மருத்துவர்கள் சிகிச்சைக்காக கொட்டாரகரையில் உள்ள மருத்துவமனைக்கு அழைத்து வந்தனர்.
அங்கு அவருக்கு பயிற்சி மருத்துவர் வந்தனா சிகிச்சை அளித்தார். அப்போது திடீரென ஆவேசமடைந்த சந்தீப் கத்தரிக்கோலால் வந்தனாவை கொடூரமாக குத்தினார். கை, கழுத்து முதுகு மற்றும் மார்பு பகுதியில் குத்தப்பட்டதால் மருத்துவர் வந்தனா ரத்த வெள்ளத்தில் சரிந்தார். உடனடியாக அவருக்கு சிகிச்சை அளிக்கப்பட்டதும் பலனின்றி வந்தனா மரணமடைந்தார்.
இந்நிலையில் அவரது உடல் பிரேத பரிசோதனை செய்யப்பட்டு குடும்பத்தினரிடம் ஒப்படைக்கப்பட்டுள்ளது. கொல்லம் அஜிசியா கல்லூரியில் பொதுமக்கள் அஞ்சலிக்காக வைக்கப்பட்டிருந்த வந்தனா உடலுக்கு பலரும் அஞ்சலி செலுத்தினர். கேரள ஆளுநர் ஆரிஃப் முகமது கான் மற்றும் முதலமைச்சர் பினராயி விஜயன் உள்ளிட்டோர் மருத்துவர் வந்தனாவின் உடலுக்கு அஞ்சலி செலுத்தினர். வந்தனாவின் பெற்றோருக்கும் அவர்ககள் ஆறுதல் கூறினர்.
இதனை தொடர்ந்து நேற்று இரவு கோட்டயத்தில் உள்ள அவரது இல்லத்துக்கு உடல் கொண்டு செல்லப்பட்டது. வந்தனாவின் உடலுக்கு இன்று மதியம் இரண்டு மணிக்கு இறுதி சடங்குகள் நடைபெறவுள்ளன. இந்த நிலையில் மருத்துவர் வந்தனாவின் முதற்கட்ட பிரேத பரிசோதனை அறிக்கை தகவல்கள் வெளியாகியுள்ளன. அந்த அறிக்கையின்படி, கத்தியால் குத்தப்பட்டு இறந்த டாக்டர் வந்தனா உடலில் 11 கத்திக்குத்து காயங்கள் இருந்தன. பிரேத பரிசோதனை அறிக்கையின்படி தலையில் 3 முறையும் முதுகில் 6 முறையும் கத்தியால் குத்தப்பட்டுள்ளார்.
உடல் முழுவதும் 23 காயங்கள் இருப்பதாகவும் பிரேத பரிசோதனை அறிக்கையில் குறிப்பிடப்பட்டுள்ளது. முதுகு மற்றும் தலையில் குத்தப்பட்ட ஆழமான காயங்களால் தான் மருத்துவர் வந்தனா இறந்துள்ளார் என பிரேத பரிசோதனையில் தெரியவந்துள்ளது. இதனிடையே மருத்துவர் வந்தனா கொல்லப்பட்டதற்கு எதிர்ப்பு தெரிவித்தும் மருத்துவர்களின் பாதுகாப்பை உறுதி செய்ய வலியுறுத்தியும் கேரளாவில் மருத்துவர்கள் வேலை நிறுத்தத்தில் ஈடுபட்டுள்ளனர்.
Nayanthara: நயன்தாரா பத்தி ஷாருக்கான் என்ன சொல்லியிருக்கார் பாருங்க…
இளநிலை மற்றும் முதுகலை மருத்துவ மாணவர்களும் போராட்டத்தில் ஈடுபட்டுள்ளனர். ஆசிரியரான சந்தீப் பக்கத்து வீட்டுக்காரர்களுடன் ஏற்பட்ட மோதலில் கைது செய்யப்பட்டுள்ளார். சண்டையின் போது ஏற்பட்ட காயத்தால் அவருக்கு சிகிச்சை அளிக்க காவல்துறையினர் அவரை மருத்துவமனைக்கு அழைத்து வந்துள்ளனர். சிகிச்சை அளித்துக்கொண்டிருக்கும் போதே அங்கிருந்த கத்தரிக்கோளை எடுத்து வெளியில் நின்று கொண்டிருந்த அவரது உறவினர் பினு மற்றும் போலீஸ்காரர்களை குத்த சென்றுள்ளார். அப்போது திடீரென மருத்துவர் வந்தனா பக்கம் திரும்பிய சந்தீப் அவரை சரமாரியாக குத்தி கொன்றுள்ளார்.