வங்கக்கடலில் உருவாகியுள்ள மோக்கா புயல் நேற்று அதிதீவிர புயலாக வலுவடைந்தது. இந்த புயல் நாளை காலை கரையை கடக்கும் என்றும் கரையை கடக்கும் போது மணிக்கு 175 கிலோ மீட்டர் வரை காற்று வீசும் என்றும் வானிலை மையம் தெரிவித்திருந்தது.
இந்நிலையில் புயல் கரையை கடக்கும் போது 220 கிலோ மீட்டர் வேகத்தில் காற்று வீசும் என வானிலை மையம் கூறியுள்ளது. மேலும் இது நான்காம் வகை சூறாவளிக்கு சமமானது என்றும் கூறப்படுகிறது. வங்கக்கடலில் தீவிரமடைந்து வரும் மோக்கா புயல் தற்போது வடக்கு திசையில் நகர்ந்து வருகிறது.
இந்த புயல் நாளை காலை மியான்மரின் சித்வே மற்றும் காஸ் பஜார் இடையே கரையை கடக்கும் என கூறப்படுகிறது. மோக்கா புயலின் தீவிரம் அதிகரித்து வரும் நிலையில் பாதுகாப்பு நடவடிக்கைகளும் தீவிரப்படுத்தப்பட்டுள்ளன. மியான்மரின் மேற்கு கடற்கரை பகுதியில் உள்ள ஆயிரக்கணக்கான மக்கள் முன்னெச்சரிக்கை நடவடிக்கையாக வெளியேற்றப்பட்டுள்ளனர்.
மேலும் அண்டை நாடான வங்கதேசத்திலும் முன்னெச்சரிக்கை நடவடிக்கைகள் தீவிரப்படுத்தப்பட்டுள்ளன. அங்கு கடலோர பகுதிகளில் வசிக்கும் ரோஹிங்கியா அகதிகள் வெளியேற்றப்பட்டுள்ளனர். மோக்கா புயலால் தென் கிழக்கு வங்க தேசம் மற்றும் மியான்மர் பகுதிகளில் 220 கிலோ மீட்டல் வேகத்தில் காற்று வீசும் என வானிலை மையம் அறிவித்ததால் மக்கள் வெளியேற்றப்பட்டு வருகின்றனர்,
இதேபோல் மேற்கு வங்க மாநிலத்திலும் முன்னெச்சரிக்கை நடவடிக்கைகள் மேற்கொள்ளப்பட்டுள்ளன. மேற்குவங்க மாநிலத்தின் திகாவில் தேசிய பேரிடர் மீட்புப் படையின் 8 குழுக்கள் மற்றும் 200 மீட்புப் பணியாளர்கள் குவிக்கப்பட்டுள்ளனர். இதனிடையே மோக்கா புயலை மிகவும் ஆபத்தான புயல் என்றும் வானிலை ஆய்வு மையம் தெரிவித்துள்ளது.
மோக்கா புயல் காரணமாக பலத்த காற்று வீசும், கடல் சீற்றத்துடன் காணப்படும் என்றும் கனமழை பெய்யும் என்றும் வானிலை மையம் எச்சரித்துள்ளது. வங்க தேசம் மற்றும் மியான்மர் கடற் பகுதியில் 2 லிருந்து 2.5 மீட்டர் வரை கடல் அலைகள் எழும்பும் என்றும் குறிப்பாக வடக்கு மியான்மர் மற்றும் வங்கதேசத்தில் தாழ்வான பகுதிகளில் வெள்ளப்பெருக்கு ஏற்படும் என்றும் சில இடங்களில் நிலச்சரிவு ஏற்படும் என்றும் வானிலை ஆய்வு மையம் எச்சரித்துள்ளது.