சென்னை:
கர்நாடகாவில் பாஜக தோல்வி அடைந்ததை அடுத்து, அங்கு தேர்தல் பொறுப்பாளராக இருந்த தமிழ்நாடு பாஜக தலைவர் அண்ணாமலையை பலரும் சகட்டுமேனிக்கு கலாய்த்து வருகின்றனர். அந்த வகையில், தர்மபுரி திமுக எம்.பி. செந்தில்குமார் அடுக்கடுக்கான ட்வீட்டுகளை போட்டு அண்ணாமலையை கிண்டல் செய்துள்ளார்.
செய்தியாளர்களிடம் Sorry சொன்ன அண்ணாமலை
கர்நாடகா சட்டமன்றத் தேர்தல் முடிவுகள் பாஜகவுக்கு மிகப்பெரிய ஏமாற்றத்தையும், அதிர்ச்சியையும் கொடுத்திருக்கிறது. மொத்தமுள்ள 224 தொகுதிகளில் 135 தொகுதிகளில் வெற்றி பெற்று அதகளப்படுத்தி உள்ளது காங்கிரஸ்.
அதே சமயத்தில், பாஜகவோ வெறும் 66 தொகுதிகளை மட்டுமே கைப்பற்றி படுதோல்வியை சந்தித்திருக்கிறது.
ரவுண்டு கட்டப்படும் அண்ணாமலை:
இதனிடையே, அங்கு துணைத் தேர்தல் பொறுப்பாளராக அண்ணாமலை இருந்ததால் அவரை தமிழக அரசியல் கட்சித் தலைவர்கள் கிண்டல் செய்து வருகின்றனர். திமுக அமைப்புச் செயலாளர் ஆர்.எஸ். பாரதி, “ஆமை புகுந்த இடமும் அண்ணாமலை சென்ற இடமும் உருப்படாது” என விமர்சித்தார். முன்னாள் அதிமுக எம்.பி. கே.சி. பழனிசாமியோ, “அண்ணாமலை தீவிரமாக களப்பணி செய்தால் மோடியையே ஆட்சியமைக்க விடாமல் செய்து விடுவார்” எனக் கிண்டல் அடித்தார்.
திமுக எம்.பி. செந்தில்குமார் ட்வீட்:
இந்நிலையில், தருமபுரி திமுக எம்.பி. செந்தில்குமார் தன் பங்குக்கு அண்ணாமலையை வெச்சு செய்துள்ளார். அண்ணாமலை பிரச்சாரம் செய்த கிட்டூர் தொகுதியில் உள்ள ஒரு வாக்குச்சாவடியில் 10 வாக்குகள் மட்டுமே கிடைத்ததாக கூறப்படுகிறது. இந்த செய்தியை தனது ட்விட்டர் பக்கத்தில் பதிவிட்ட செந்தில்குமார், “இன்றைய பழமொழி: உள்ளூரில் விலைபோகாத மாடு, வெளியூரில் சலங்கை கட்டி ஆடுமாம்” என்று குறிப்பிட்டிருந்தார்.
உள்ளூரில் விலைபோகாத மாடு..
இதற்கு அடுத்த சில நிமிடங்களில் அவர் வெளியிட்ட மற்றொரு பதிவில், “Correction: ஒரு சிறு திருத்தம்: கர்நாடகாவில் நம்ம ஆளு பிரச்சாரம் செய்த தொகுதியில் 10 வாக்குகள்தான் விழுந்தன என்பது தவறு. 4 வாக்குகள்தான் விழுந்ததாம். so மீண்டும் இன்றைய பழமொழி: உள்ளூரில் விலைபோகாத மாடு, வெளியூரில் சலங்கை கட்டி ஆடுமாம் (Pun Unintended) எனப் பதிவிட்டார்.
ஒத்த ஓட்டு சிங்கம்:
இந்நிலையில், தனது ட்விட்டர் பதிவில், “நான் பதிவிட்ட பழமொழியை screenshot போட்டு சிங்கத்தை மேலும் அவமானப்படுத்தும் டியர் வார் ரூம் கத்துக்குட்டிகளா! நான் பாராட்டிதான் சொன்னேன். அரவக்குறிச்சியில் பூத் 214ல் பதிவான 927 வாக்குகளில் ஒத்த ஓட்டு வாங்குன சிங்கம், கர்நாடகாவில் ஒதுக்கப்பட்ட பூத்தில் 4 வாக்கு வாங்கியது முன்னேற்றமே” என்று பதிவிட்டுள்ளார்.