மத்திய புலனாய்வு அமைப்பான சிபிஐக்கு புதிய இயக்குநராக கர்நாடகா டிஜிபி பிரவீன் சூட்டை நியமித்துள்ளது மத்திய அரசு. மே 25ம் தேதி தற்போதைய சிபிஐ இயக்குநரின் பதவி காலம் முடிவடைய உள்ள நிலையில், இந்த அறிவிப்பு தற்போது வெளியாகியுள்ளது. பிரதமர் நரேந்திர மோடி, உச்சநீதிமன்ற தலைமை நீதிபதி சந்திரசூட் மற்றும் எதிர்கட்சி தலைவர் ஆதிர் ரஞ்சன் சவுத்ரி ஆகிய உயர்மட்ட குழுவின் பரிந்துரைகளின் அடிப்படையில் இந்த அறிவிப்பு வெளியாகியுள்ளது.
கர்நாடகா சட்டமன்ற தேர்தல் முடிந்து முடிவுகள் வெளியான அடுத்த நாளே அம்மாநிலத்தின் டிஜிபி சிபிஐ இயக்குநராக மாற்றப்பட்டுள்ளது பேசு பொருளாகியுள்ளது. பாஜக ஆதரவு நிலைப்பாட்டை எடுத்து வந்ததாக கர்நாடகா டிஜிபி மீது குற்றச்சாட்டு உள்ளதால், எதிர்கட்சி கட்சி தலைவர் ஆதிர் ரஞ்சன் சவுத்ரி இந்த நியமனத்தை எதிர்த்தார். இருப்பினும் பிரவீன் சூட்டே சிபிஐ இயக்குநராக நியமிக்கப்பட்டுள்ளார்.
கர்நாடகா டிஜிபி பிரவீன் சூட் மீது பல்வேறு குற்றச்சாட்டுக்கள் உள்ளது. கர்நாடகாவில் பாஜக ஆட்சிகாலத்தில் அவர்களுக்கு ஆதரவாக தொடர்ந்து செயல்பட்டதாக, அம்மாநில
காங்கிரஸ்
தலைவர் டிகே சிவக்குமார் பலமுறை குற்றம்சாட்டியுள்ளார். கடந்த மூன்றரை ஆண்டுகால ஆட்சியில் வன்முறை மற்றும் வெறுப்பு பேச்சுக்களை பேசி வந்த பாஜகவினர் மீது எந்த நடவடிக்கையும் எடுக்காத டிஜிபி பிரவீன், காங்கிரஸ் கட்சியினர் மீது மட்டும் 25 வழக்குகளை பதிவு செய்துள்ளதாக காங்கிரஸ் தலைவர் டிகே சிவக்குமார் கடந்த காலங்களில் குற்றம்சாட்டினார்.
காங்கிரஸ் ஆட்சிக்கு வந்தால் டிஜிபி பிரவீன் சூட் மீது கடுமையாக நடவடிக்கை எடுப்போம் எனவும் டிகே சிவக்குமார் உறுதி கொடுத்தார். இந்த நிலையில் பெரும்பான்மைக்கு தேவையான இடங்களை விடவும் கூடுதல் தொகுதிகளை கைப்பற்றி, அதாவது 135 தொகுதிகளில் காங்கிரஸ் கட்சி தற்போது வெற்றி அடைந்துள்ளது. விரைவில் அரசமைக்க போகும் நிலையில், கர்நாடகா டிஜிபி தற்போது சிபிஐ இயக்குநராக பதவி உயர்வு பெற்றுள்ளார்.
1986 பேட்ச் ஐபிஎஸ் அதிகாரியான பிரவீன் சூட், அடுத்த இரண்டு ஆண்டுகளுக்கு சிபிஐ இயக்குநராக இருப்பார் என தெரிவிக்கப்பட்டுள்ளது. டெல்லி ஐஐடியில் படித்த பிரவீன் சூட், மைசூரில் துணை காவல் கண்காணிப்பாளராக பணியைத் தொடங்கினார். தொடர்ந்து பல்வேறு நிலைகளைக் கடந்து டிஜிபியாக உயர்வு பெற்றுள்ளார் என்பது குறிப்பிடதக்கது.