சென்னை:
பொதுமக்களுக்கு சென்னை மெட்ரோ ரயில் நிர்வாகம் ஒரு அசத்தலான அறிவிப்பை வெளியிட்டு இருக்கிறது. மெட்ரோ ரயில் பயணத்துக்கு டிக்கெட் எடுக்க நீண்டவரிசையில் காத்திருக்கும் நடைமுறைக்கு முடிவுகட்டும் வகையில் ஒரு ஹேப்பி நியூஸை மெட்ரோ ரயில் நிர்வாகம் தெரிவித்துள்ளது.
சென்னை மக்களின் அன்றாட வாழ்க்கையின் ஒருபகுதியாகவே மெட்ரோ ரயில் மாறிவிட்டது என்று சொல்லலாம். அந்த அளவுக்கு, நாள்தோறும் லட்சக்கணக்கான சென்னைவாசிகள் மெட்ரோ ரயிலில் பயணித்து வருகின்றனர்.
குறிப்பாக, கோடைக்காலத்தில் மெட்ரோ ரயில் நிரம்பி வழியும் அளவுக்கு கூட்டம் இருக்கிறது. குளுகுளு ஏசி, வேகம் என மக்கள் விரும்பும் அனைத்து வசதிகளும் இருப்பதால் மெட்ரோ ரயிலுக்கு மவுசு ஏறிக்கொண்டே தான் இருக்கிறது.
டிக்கெட் வாங்க நிண்ட க்யூ:
இருந்தபோதிலும், மெட்ரோ ரயில் பயணத்தில் மக்கள் எதிர்கொள்ளும் ஒரே பிரச்சினையாக இருப்பது டிக்கெட் எடுப்பது தான். நீண்டநெடிய க்யூவில் நின்று டிக்கெட் வாங்குவதற்குள் 2, 3 ரயில்கள் சென்றுவிடும். அந்த அளவுக்கு மெட்ரோ ரயில் நிலையங்களில் கூட்டம் இருக்கும். தினமும் மெட்ரோ ரயிலில் பயணிப்பவர்களுக்கு பிரச்சினை கிடையாது. அவர்கள் ஸ்மார்ட் டிக்கெட் அட்டையை வாங்கி பயன்படுத்திக் கொள்வார்கள். அவர்கள் க்யூவில் நிற்க வேண்டிய தேவை இல்லை.
வாட்ஸ் அப் மூலமே டிக்கெட்:
ஆனால், எப்போதாவது மெட்ரோ ரயிலில் செல்பவர்கள் இந்த நீண்ட க்யூவில் நின்றுதான் டிக்கெட் வாங்க வேண்டும். உண்மையில் சொல்லப்போனால், இந்தப் பயணிகளின் எண்ணிக்கைதான் மெட்ரோ ரயிலில் அதிகம். இந்நிலையில், பயணிகளின் இந்த சிரமத்தை புரிந்துகொண்டு ஒரு அட்டகாசமான வசதியை சென்னை மெட்ரோ ரயில் நிர்வாகம் செய்து தந்துள்ளது. அதுதான் வாட்ஸ் அப்பிலேயே டிக்கெட் எடுக்கும் வசதி.
என்ன செய்ய வேண்டும்:
எப்படி வாட்ஸ் அப்பில் டிக்கெட் எடுப்பது? அது ரொம்பவே ஈஸிதான். சென்னை மெட்ரோ நிறுவனத்தின் பொதுவான செல்போன் எண் பயணிகளுக்கு வழங்கப்படும். அந்த எண்ணுக்கு வாட்ஸ் அப் மூலம் Hi என்று அனுப்ப வேண்டும். பின்னர் நமது வாட்ஸ் அப்-க்கு சார்ட் பாட் என்ற மெசேஜ் வரும். அதில் டிக்கெட் எடுப்பது தொடர்பான தகவல்கள் இடம்பெற்றிருக்கும்.
இன்று முதல் அறிமுகம்:
பயணியின் பெயர், புறப்படும் மெட்ரோ ரயில் நிலையம், சேரும் ரயில் நிலையம் ஆகியவற்றை பதிவு செய்து வாடஸ் அப் மூலமாகவோ அல்லது ஜி-பே மூலமாகவோ பணம் செலுத்த வேண்டும். அவ்வளவுதான். அடுத்த செகண்டே வாட்ஸ் அப்பில் பயண டிக்கெட் வந்துவிடும். இந்த டிக்கெட்டை ரயில்நிலைய நுழைவு வாயிலில் உள்ள க்யூ ஆர் கோடு ஸ்கேனரில் காண்பித்தால் கதவு திறந்துவிடும். பின்னர் நாம் ஜாலியாக மெட்ரோ ரயிலில் பயணிக்கலாம். இந்த வசதி இன்று முதல் அறிமுகமாகி இருக்கிறது.