திருவனந்தபுரம்:
கேரளாவில் மனைவிகளை மாற்றி உல்லாசம் அனுபவித்து வந்த கும்பல் குறித்து போலீஸில் புகார் அளித்த பெண் கொடூரமாக கொலை செய்யப்பட்டுள்ளார். அவரது கணவரே இந்தக் கொலையை செய்திருப்பது தெரியவந்திருக்கிறது.
கையில் கொஞ்சம் பணம் புரள ஆரம்பித்துவிட்டாலே, நாகரீகம் என்ற பெயரில் கேடுகெட்ட விஷயங்களை நோக்கி சிலர் செல்ல தொடங்கி விடுகின்றனர். ஓரினச்சேர்க்கை, லிவ் இன் உறவு முறை என ஏதோ தங்களை வெளிநாட்டுக்காரர்களாக பாவித்துக் கொண்டு சிலர் செய்யும் செயல்கள் அத்துமீறி செல்கின்றன. அதுபோன்ற ஒரு விஷயம்தான் கேரளாவில் நடந்திருக்கிறது.
கேரள மாநிலம் கோட்டயத்தைச் சேர்ந்தவர் ஷினோ மேத்யூ (32). இவருக்கு பாலக்காட்டைச் சேர்ந்த பெண்ணுடன் கடந்த 5 ஆண்டுகளுக்கு முன்பு திருமணம் நடைபெற்றது. இவர்களுக்கு 2 குழந்தைகளும் உள்ளனர். முதலில் நன்றாக சென்று கொண்டிருந்த இவர்களின் இல்லற வாழ்க்கையில் சில ஆண்டுகளில் புயல் வீசத் தொடங்கியது.
மனைவிகளை மாற்றி ‘செக்ஸ்’:
ஷினோ மேத்யுக்கு சில பணக்காரர்களின் நட்பு கிடைத்துள்ளது. அடிக்கடி நட்சத்திர ஓட்டல்களில் பார்ட்டிக்கு போவது, மது அருந்துவது என அவர்களுடன் சேர்ந்து ஷினோ மேத்யூவும் மாறி இருக்கிறார். இந்த நட்பு போக போக இன்னும் விபரீதமானது. தங்கள் மனைவிகளை மாற்றிக்கொண்டு அவர்கள் உல்லாசம் அனுபவிக்க தொடங்கி இருக்கிறார்கள். அதாவது, அக்குழுவில் உள்ள ஒருவரின் மனைவியுடன் மற்றொருவரும், மற்றொருவரின் மனைவியுடன் வேறொருவரும் உடலுறவுக் கொள்வார்கள்.
“குழந்தைகளை கொன்றுவிடுவேன்”:
இதனிடையே, கடந்த 2020-ம் ஆண்டு ஷினோ மேத்யூ தனது மனைவியிடம், தன் நண்பர்களுடன் உல்லாசமாக இருக்குமாறு கூறியுள்ளார். இதனைக் கேட்டு அதிர்ந்து போன அவரது மனைவி, இதற்கு சம்மதிக்கவில்லை. இதனால் ஆத்திரமடைந்த அவர், நீ இதற்கு சம்மதிக்கவில்லை என்றால் குழந்தைகளை கொன்றுவிடுவேன் என மிரட்டி இருக்கிறார். பின்னர், வலுக்கட்டாயமாக மேத்யூ தனது மனைவியை இந்த கீழ்த்தமரான செயலில் ஈடுபடச் செய்திருக்கிறார்.
அதிரடி கைது:
இதையடுத்து, தனக்கு நேர்ந்த கொடுமை குறித்து அப்பெண் போலீஸில் புகார் அளித்துள்ளார். அப்பொழுதுதான், இப்படியொரு விஷயம் சமூகத்தில் நடந்து கொண்டிருக்கிறது என்பது வெளியுலகுக்கு தெரியவந்தது. இது கேரளாவில் மட்டுமல்லாமல் இந்தியா முழுவதுமே பெரும் அதிர்வலைகளை ஏற்படுத்தியது. இதனைத் தொடர்ந்து, இக்குழுவைச் சேர்ந்த 6 பேரை போலீஸார் கைது செய்தனர்.
கொடூரக் கொலை:
இதன் தொடர்ச்சியாக, ஷீனோ மேத்யூவிடம் இருந்து அவரது மனைவி பிரிந்து சென்று தனியாக வசித்து வந்தார். இந்நிலையில், நேற்று தனது வீட்டு வாசலில் அப்பெண் கொடூரமாக கொலை செய்யப்பட்டு பிணமாக கிடந்தார். இதுகுறித்து தகவலறிந்த போலீஸார் அங்கு வந்து அவரது உடலை கைப்பற்றினர். பின்னர் அவரது கணவர் மீது போலீஸாருக்கு சந்தேகம் வரவே, ஷீனோ மேத்யூவின் வீட்டுக்கு சென்றனர்.
விஷம் குடித்த கணவன்:
அங்கு அவர் வாயில் நுரைதள்ளியபடி கிடந்தார். அவரை பரிசோதித்த மருத்துவர்கள் அவர் விஷம் குடித்திருப்பதாக தெரிவித்தனர். அவருக்கு சிகிச்சை அளிக்கப்பட்டு வருகிறது. தன்னையும், நண்பர்களையும் போலஸீல் சிக்க வைத்த தனது மனைவியை பழிவாங்கவே ஷீனோ மேத்யூ அவரை கொலை செய்திருப்பது தெரியவந்தது. பின்னர் போலீஸிடம் மாட்டிக்கொள்வோம் என்ற பயத்தில் அவரும் விஷம் சாப்பிட்டுள்ளார் என போலீஸ் வட்டாரங்கள் தெரிவிக்கின்றன.