கர்நாடகாவில் நேற்று புதிதாக
காங்கிரஸ்
அரசு ஆட்சியமைத்துள்ளது. கடந்த மே 10ம் தேதி மாநிலத்தில் மொத்தம் உள்ள 224 தொகுதிகளுக்கும் ஒரே கட்டமாக தேர்தல் நடைபெற்றது. அதைத் தொடர்ந்து மே 13ம் தேதி வாக்கு எண்ணிக்கை நடைபெற்று முடிவுகள் அறிவிக்கப்பட்டது. பெரும்பான்மைக்கு தேவையான 113 இடங்களைக்காட்டிலும் அதிகமாக 135 தொகுதிகளை கைப்பற்றி காங்கிரஸ் வெற்றி வாகை சூடியது.
மாநிலத்தில் ஆளும் கட்சியாக இருந்த பாஜக 36 சதவிகித வாக்குகளுடன் 65 தொகுதிகளைக் கைப்பற்றி எதிர்கட்சியாக மாறியுள்ளது. இந்தசூழலில் நேற்று நடைபெற்ற பதவி ஏற்பு விழாவில் சித்தராமையா முதல்வராகவும், மாநில காங்கிரஸ் தலைவர் டிகே சிவக்குமார் துணை முதல்வராகவும் பதவி ஏற்று கொண்டனர். அதேபோல் 8 எம்எல்ஏக்களும் அமைச்சர்களாக பதவி ஏற்றுக் கொண்டனர்.
இந்த பதவி ஏற்பு விழாவில் நாடு முழுவதும் உள்ள எதிர்கட்சி தலைவர்கள் கலந்துகொண்டனர். குறிப்பாக தமிழ்நாடு முதல்வர் முக ஸ்டாலின், விசிக தலைவர் திருமாவளவன், மநீம தலைவர் கமல்ஹாசன், ஜம்மு காஷ்மீர் முன்னாள் முதல்வர்கள் பரூக் அப்துல்லா மற்றும் மெஹபூபா முப்தி, தேசியவாத காங்கிரஸ் தலைவர் சரத் பவார், பீகார் முதல்வர் நிதிஷ்குமார் மற்றும் துணை முதல்வர் தேஜஸ்வி யாதவ் உள்ளிட்ட பெரும்பான்மையானோர் கலந்து கொண்டனர்.
இந்த நிகழ்வானது மிகுந்த முக்கியத்துவம் வாய்ந்ததாக கருதப்படுகிறது. ஏனெனில் அடுத்த ஆண்டு நடைபெற உள்ள 2024 மக்களவை தேர்தலுக்கு எதிர்கட்சிகளின் ஒற்றுமையை பறைசாற்றும் விதமாக கர்நாடகா முதல்வர் பதவி ஏற்பு விழா அமைந்தது. அதாவது எதிர்கட்சிகள் ஒன்றிணைந்தால் பாஜகவின் போலி பிம்பம் சுக்குநூறாக்கப்படும் என்பது எதிர்கட்சிகளின் கருத்தாக உள்ளது. இருப்பினும் கடந்த கால தவறுகளால் காங்கிரஸ் கட்சி மீது பல்வேறு மாநில கட்சிகள் கடும் கோபத்துடன் இருக்கின்றன.
இந்தசூழலில் எதிர்கட்சிகள் ஒன்றிணைய வேண்டும் என கூறிய பல்வேறு தலைவர்கள் கர்நாடகா முதல்வர் பதவி ஏற்பு விழாவில் கலந்து கொண்டனர். காங்கிரஸ் இல்லாத மூன்றாம் கூட்டணியை அமைக்க பாடுபட்ட மேற்கு வங்க முதல்வர் மம்தா பானர்ஜிக்கும் அழைப்பு விடுக்கப்பட்ட நிலையில், அவர் சார்பாக திரிணாமுல் எம்பி பதவி ஏற்பு விழாவில் கலந்து கொண்டார்.
இந்த சூழலில் 2024 நாடாளுமன்ற தேர்தலை மனதில் வைத்து கர்நாடகா துணை முதல்வர் டிகே சிவக்குமார், கட்சி தொண்டர்களுக்கு டார்கெட் நிர்ணயித்துள்ளார். இன்று காங்கிரஸ் சார்பில் பெங்களுருவில் நடந்த ஆலோசனையில் மாநில தலைவர் டிகே சிவக்குமார் கட்சி உறுப்பினர்களிடம் கூறும்போது, ‘‘அடுத்து வருகிற மக்களவை தேர்தல் தான் நமது இலக்கு. சட்டமன்ற தேர்தலில் 135 தொகுதிகளை கைப்பற்றியது நமக்கு போதாது. நாடாளுமன்ற தேர்தலுக்கு நாம் கடுமையாக உழைக்க வேண்டும். இது ஒரு ஆரம்பம் தான், இதையே முடிவாக நினைத்துக் கொண்டு சோம்பேறித்தனமாக நாம் இருக்கக்கூடாது. மொத்தம் உள்ள 28 எம்பி தொகுதிகளையும் நாம் கைப்பற்ற வேண்டும்’’ என பேசினார்.