திமுக அரசுக்கு எதிராக பாஜக அரசு பழிவாங்கும் நடவடிக்கையாகவே ஐ.டி ரெய்டை நடத்துகிறது என்று திமுக தரப்பில் கூறப்பட்டாலும் அமைச்சரவையில் 35 பேர் இருக்கையில் ஏன் செந்தில் பாலாஜி என்று விசாரிக்கையில் முக்கிய தகவல்கள் வெளியாகின்றன.
செழிப்பான செந்தில் பாலாஜி“திமுகவுக்குள் ரீ எண்ட்ரி கொடுத்த குறுகிய காலத்தில் கட்சி மேலிடத்தின் நம்பிக்கையை பெற்றார் செந்தில் பாலாஜி. மாற்று கட்சியிலிருந்து ஆள்களை நகர்த்தி வருதல், ஆயிரக்கணக்கில் கட்சியில் புதியவர்களை இணைத்தல், என பம்பரமாக சுழன்றார் செந்தில் பாலாஜி. இதனாலே மின்சாரம், மதுவிலக்கு மற்றும் ஆயத்தீர்வை என செழிப்பான துறை அவருக்கு வழங்கப்பட்டது.
டாஸ்மாக் வருமானம்!டாஸ்மாக் மூலம் ‘மேற்படி’ வரும் வருவாயைக் கொண்டே அந்தந்த மாவட்டச் செயலாளர்கள், கிளைச் செயலாளர்கள் கட்சி செலவை இதற்கு முன்னர் பார்த்து வந்தனர். செந்தில் பாலாஜி இந்த துறை அமைச்சராக வந்த பின்னர் தமிழகம் முழுவதும் ஒரே சிஸ்டத்தை கொண்டு வந்தார். இதனால் ஏதாவது ஒரு பகுதியில் சாதாரண அட்டைபெட்டி டெண்டர் கூட அவர் பார்வைக்கு வராமல் செல்ல முடியாது. இதனால் கட்சியினர் கடும் அதிருப்தி அடைந்தனர். ஆனால் மேலிடத்துக்கும் சிறப்பு கவனிப்பு வழங்க அவருக்கு கிரீன் சிக்னல் காட்டப்பட்டது.
செந்தில் பாலாஜி ஆதரவு எம்.எல்.ஏக்கள்!செந்தில் பாலாஜியின் நடவடிக்கையால் மற்ற மாவட்டச் செயலாளர்கள், சில அமைச்சர்கள் அதிக அளவில் கட்சிக்கு செலவு செய்ய முடியவில்லையாம். அதுவும் அவருக்கு சாதகமாகிவிட்டதாக சொல்கிறார்கள். அதாவது கொங்கு மண்டலத்தில் பல எம்.எல்.ஏக்களுக்கான செலவை செந்தில் பாலாஜி பார்த்துக் கொள்கிறாராம். அவர்கள் அனைவரும் அவரது ஆதரவாளர்களாக மாறியுள்ளனர். இதனால் சீனியர் அமைச்சர்கள் பலரும் கடும் அதிருப்திக்கு உள்ளாகியுள்ளனர்.
பாதை மாறுவாரா செந்தில் பாலாஜி?தலைமைக்கு நெருக்கமானவர் என்பதால் அவரை குறிவைத்தால் ஸ்டாலினுக்கு கடும் நெருக்கடியை உருவாக்கலாம் என்பது ஒரு கணக்கு. தன் பக்கம் கணிசமான எம்.எல்.ஏக்கள் கொண்டுள்ள அவருக்கு அதிக நெருக்கடிகள் கொடுத்தால் ஒருவேளை மனம் மாறி பாதை மாறலாம் என்பது மற்றொரு கணக்கு” இதனாலே செந்தில் பாலாஜி குறி வைக்கப்பட்டுள்ளதாக சொல்கிறார்கள்.