ஓபிஎஸ் அணியின் தளபதியாக வலம் வருபவர் வைத்திலிங்கம். ஓபிஎஸ்ஸுக்கு பக்க பலமாக இருப்பதோடு சசிகலாவுடன் ஆரம்பத்தில் இருந்தே நல் உறவை பேணிவருபவர். வைத்திலிங்கத்தின் மகன் சண்முக பிரபுவுக்கும், யாழினி என்பவருக்கும் ஜூன் 7ஆம் தேதி தஞ்சாவூரில் திருமணம் நடைபெற உள்ளது. இந்த திருமண விழாவைத் தான் எடப்பாடி பழனிசாமி தரப்பு உற்று கவனித்து வருகிறது.
எடப்பாடி பழனிசாமியின் கவலை!எடப்பாடி பழனிசாமி பக்கம் பெரும்பான்மையான நிர்வாகிகள் இருக்கின்றனர். ஓபிஎஸ் பக்கம் குறைவான நிர்வாகிகளே உள்ளனர். சசிகலா பக்கம் பெரிய அளவில் ஆதரவாளர்கள் இல்லையோ என்ற நிலைமை தான் உள்ளது. ஆனாலும் இவர்கள் இருவரும் இணைந்து விடக்கூடாது, அதிலும் முக்கியமாக அமமுக டிடிவி தினகரன் இவர்களோடு கரம் கோர்த்துவிடக்கூடாது என்பதில் எடப்பாடி பழனிசாமி தரப்பு கவனமாக இருக்கிறதாம்.
இணைக்கும் வைத்திலிங்கம்தென் மாவட்டங்களில் அதிமுகவின் வாக்கு வங்கியை கடந்த சட்டமன்றத் தேர்தலில் அமமுக பதம் பார்த்தது. தற்போது சசிகலா, ஓபிஎஸ், தினகரன் ஆகிய மூவரும் ஓர் அணியில் நின்றால் தென் மாவட்டங்களில் எடப்பாடி பழனிசாமி தரப்பால் கால் ஊன்ற முடியாது, மற்ற மாவட்டங்களிலும் வாக்குகள் சிதறும் என்ற நிலையே உள்ளது. இதனால் மூவரும் ஆளுக்கொரு திசையில் இருப்பதே தனது அணிக்கு நல்லது என நினைக்கிறார் எடப்பாடி. ஆனால் வைத்திலிங்கம் அதை மாற்றிக் காட்ட எடுத்திருக்கும் முயற்சி கவனித்தில் கொள்ளத் தக்கது.
தினகரன் எடுத்த முடிவு!திருச்சி மாநாட்டிலேயே இணைப்பு தொடர்பாக பேசப்பட்டது. ஆனால் அப்படியான சம்பவங்கள் நடைபெறவில்லை. அதாவது ஓபிஎஸ் அணி தனிப்பட்ட முறையில் கூட்டிய மாநாடு. தற்போது திருமண விழா என்பதால் அனைவரும் ஒன்றாக இணைந்து வர வாய்ப்பு உள்ளது. ஜூன் 7ஆம் தேதி அமமுக செயற்குழு கூட்டம் இருந்தது. அதையும் தள்ளி வைத்து தஞ்சாவூர் செல்வதற்கான ஏற்பாட்டில் இறங்கியுள்ளார் தினகரன்.
திருமண விழாவில் ஏற்படுமா திருப்பம்?தமிழ்நாட்டு அரசியல் பல திருமண மேடைகளில் மாற்றங்களைச் சந்தித்துள்ளது கடந்தகால வரலாறு. அந்த வகையில் வைத்திலிங்கம் மகன் திருமணத்தில் திருப்பம் ஏற்பட்டு மூவரும் இணைந்தால் மக்களவைத் தேர்தலுக்கு முன்னர் எடப்பாடி பழனிசாமி சில சமரசங்களுக்கு இறங்கி வரும் நிலை ஏற்பட அதிக வாய்ப்புகள் உள்ளதாக கணிக்கின்றனர் அரசியல் வானிலையை உற்றுநோக்குபவர்கள்.