அமலாக்கத்துறையால் கைது செய்யப்பட்டு நீதிமன்ற காவலில் இருக்கும் செந்தில் பாலாஜி ஓமந்தூரார் மருத்துவமனையில் சிகிச்சை பெற்று வருகிறார். சிறைத் துறை கட்டுப்பாட்டில் இருக்கும் அவரை குடும்பத்தினர் மட்டுமே சந்திக்க அனுமதியளிக்கப்படுகிறது.
கட்சியினரோ, திமுக அமைச்சர்களோ சந்திக்க அனுமதிக்கப்படவில்லை. இன்று அமைச்சர் சேகர் பாபு மருத்துவமனை சென்ற போதுகூட அனுமதியளிக்கப்படவில்லை. எனவே செந்தில் பாலாஜியின் குடும்பத்தினரை மட்டும் சந்தித்து உடல்நிலை குறித்து கேட்டறிந்தார்.
செந்தில் பாலாஜியின் கைது செய்யப்பட்டதில் மனித உரிமை மீறல் நடந்ததாக புகார்கள் எழுந்தன. இந்நிலையில் மனித உரிமைகள் ஆணைய உறுப்பினர் கண்ணதாசன் ஓமந்தூரார் மருத்துவமனை சென்று செந்தில் பாலாஜியிடம் விசாரணை நடத்தினார். அதன் பின்னர் கண்ணதாசன் செய்தியாளர்களைச் சந்தித்தார்.
அப்போது பேசிய அவர், “அமைச்சர் செந்தில் பாலாஜி கைது விவகாரம் தொடர்பாக பெறப்பட்ட புகார்களின் அடிப்படையில் விசாரணை நடத்தினோம். அமைச்சர் செந்தில் பாலாஜி மிகவும் சோர்வாக காணப்பட்டார். தன்னை கைது செய்யும் போது கடுமையாக நடந்து கொண்டதாக தெரிவித்தார். தரையில் தள்ளியதால் தலையில் காயம் ஏற்பட்டது. நெஞ்சு வலி இருப்பதால் அதிகம் பேச முடியவில்லை என்று கூறினார்.
இது போன்ற விவகாரங்களில் மனித உரிமை மீறல் நடந்துள்ளதா என்று ஆணையம் தாமாக முன்வந்து விசாரணை நடத்தலாம். அமைச்சர் மட்டுமல்ல, மற்ற நிகழ்வுகளிலும் நேரடியாக சென்று விசாரணை நடத்துகிறோம்” என்று கூறினார்.
மனித உரிமைகள் ஆணைய உறுப்பினர் கண்ணதாசன் விசாரணை நடத்துவதற்கு அதிமுகவைச் சேர்ந்த வழக்கறிஞர் இன்பதுரை எதிர்ப்பு தெரிவித்துள்ளார்.
“திமுகவுக்காக தொலைக்காட்சி விவாதங்களில் கலந்து கொண்டு பேசிவந்தவர் கண்ணதாசன். அவர் திமுக அமைச்சரின் கைது விவகாரம் தொடர்பாக விசாரணை நடத்துவதும் அறிக்கை அளிப்பதும் ஏற்றுக்கொள்ள முடியாதது. அவர் அளிக்கும் அறிக்கை போலியானதாக இருக்கும்” என்று இன்பதுரை கருத்து தெரிவித்துள்ளார்.