நடன இயக்குனர் ராகேஷ் திடீர் மரணம்
தெலுங்கு சினிமாவின் முன்னணி நடன இயக்குனர் ரகேஷ். 2011ம் ஆண்டு 'அவ்வா' என்ற படத்தின் மூலம் அறிமுகமான இவர் அதன்பிறகு பிரபாஸ், மகேஷ்பாபு, வெங்கடேஷ் ராம் பொத்தனேனி உள்ளிட்ட முன்னணி நடிகர்களின் படங்களுக்கு நடன இயக்குனராக பணியாற்றினார். ரியாலிட்டி ஷோக்களில் நடுவாராக இருந்தார். ஒரு கட்டத்தில் சினிமா வாய்ப்புகள் இன்றி சிரமப்பட்டர். நடன பள்ளியை நடத்தினார்.
53 வயதான ரகேஷ் சர்க்கரை வியாதியால் அவதிப்பட்டு வந்தார். அதற்கான சிகிச்சையும் பெற்று வந்தார். கடந்த வாரம் விசாகப்பட்டினத்தில் நடந்த படப்பிடிப்பில் கலந்துகொண்டார். படப்பிடிப்பை முடித்துக் கொண்டு ஐதராபாத் திரும்பிய அவருக்கு திடீரென உடல் நலக்குறைவு ஏற்பட்டது. அதனால் அவர் ஐதராபாத்தில் உள்ள மருத்துவமனையில் நேற்று முன்தினம் சேர்க்கப்பட்டார். ஏற்கனவே நீரிழிவு நோயால் பாதிக்கப்பட்டிருந்த அவருக்கு அதன் தீவிரம் அதிகமாக திடீர் மாரடைப்பு ஏற்பட்டு மரணம் அடைந்தார். அவரது மறைவுக்கு தெலுங்கு திரையுலகினர், அரசியல் பிரபலங்கள், ரசிகர்கள் இரங்கல் தெரிவித்துள்ளனர்.