ரஜினி நடிப்பில் அடுத்ததாக ‘ஜெயிலர்’ படம் வெளியாகவுள்ளது. நெல்சன் திலீப்குமார் இயக்கத்தில் உருவாகியுள்ள இந்தப்படத்திற்கான புரமோஷன் பணிகள் மும்முரமாக நடந்து வருகிறது. ஒன்றரை ஆண்டுகளுக்கு பிறகு வெளியாகும் ரஜினி படம் என்பதால் ரசிகர்கள் மத்தியில் உச்சக்கட்ட எதிர்பார்ப்பு நிலவி வருகிறது. மேலும், ‘ஜெயிலர்’ படம் சிறப்பாக வந்துள்ளதால் உற்சாகத்தில் உள்ளார் ரஜினிகாந்த்.
சிறுத்தை சிவா இயக்கத்தில் வெளியாகி சுமாரான விமர்சனங்களை பெற்ற ‘அண்ணாத்த’ படத்திற்கு பிறகு ஜெயிலரில் நடித்துள்ளார் ரஜினிகாந்த். தமிழ் சினிமாவில் டாக்டர், கோலமாவு கோகிலா போன்ற டார்க் காமெடி படங்களை இயக்கிய நெல்சன் திலீப்குமாரின் புதிய படைப்பாக ‘ஜெயிலர்’ உருவாகியுள்ளது. சன் பிக்சர்ஸ் தயாரித்துள்ள இந்தப்படத்திற்கு அனிருத் இசையமைத்துள்ளார்.
அண்மைச் செய்திகளை உடனடியாக படிக்க கூகுள் நியூஸில் தமிழ் சமயம் இணையதளத்தை பின் தொடரவும்
அண்மையில் ‘ஜெயிலர்’ படத்தின் மிரட்டலான டிரெய்லர் வெளியாகி ரசிகர்கள் மத்தியில் அமோகமான வரவேற்பை பெற்றது. டார்க் காமெடி பாணியில் ரஜினியின் அதிரடி ஆக்ஷனில் இந்தப்படம் உருவாகியுள்ளது. பல மொழி பிரபலங்கள் கேமியோ ரோலில் நடித்துள்ள இந்தப்படம் பான் இந்தியா ரிலீசாக வரும் 10 ஆம் தேதி வெளியாகயிருக்கிறது.
இந்நிலையில் ‘ஜெயிலர்’ படத்தை முடித்த கையோடு ரஜினியின் ‘தலைவர் 170’ படத்திற்கான வேலைகள் துவங்கியுள்ளன. லைகா நிறுவனத்தின் தயாரிப்பில் இந்தப்படம் உருவாகவுள்ளது. ‘ஜெயிலர்’ படப்பிடிப்பின் போதே ‘தலைவர் 170’ படத்திற்கான அறிவிப்பு வெளியானது. த.செ. ஞானவேல் இந்தப்படத்தை இயக்குகிறார். சூர்யா நடிப்பில் வெளியாகி விமர்சனரீதியாக பெரும் வரவேற்பை பெற்ற ‘ஜெய் பீம்’ பட இயக்குனரான ஞானவேல் இயக்கத்தில் ரஜினி நடிக்கவுள்ளது ரசிகர்களிடையே மிகுந்த எதிர்பார்ப்பை கிளப்பியுள்ளது.
Thangalaan: ‘தங்கலான்’ படத்திற்காக புதிய அவதாரம்: ஆரத்தியாக மிரள விடும் மாளவிகா மோகனன்.!
இந்தப்படத்திற்கான டெஸ்ட் லுக் சில தினங்களுக்கு முன்பாக நடந்து முடிந்துள்ளது. தாடியை ட்ரிம் செய்து அட்டகாசமான புதிய தோற்றத்தில் ரஜினி இருக்கும் புகைப்படம் தற்போது சோஷியல் மீடியாவில் வைரலாகி வருகின்றன. இந்நிலையில் ‘தலைவர் 170’ படத்திற்கு ‘வேட்டையன்’ என டைட்டில் வைக்க வாய்ப்புள்ளதாக வலைப்பேச்சு பிஸ்மி கூறியுள்ளார். பி. வாசு இயக்கத்தில் வெளியாகி சக்கை போடு போட்ட ‘சந்திரமுகி’ படத்தில் வேட்டையன் என்ற கதாபாத்திரத்தில் நடித்திருந்தார் ரஜினி.
தற்போது அவரின் கதாபாத்திரத்தின் பெயரையே ‘தலைவர் 170’ படத்திற்கு டைட்டிலாக வைத்தால் பயங்கரமாக இருக்கும் என ரசிகர்கள் கூறி வருகின்றனர். ரஜினி இஸ்லாமியராக நடிக்கும் இந்தப்படம் உண்மை சம்பவங்களை அடிப்படையாக வைத்து உருவாகவிருப்பதாக கூறப்படுகிறது. மேலும், போலி என்கவுண்டர்களுக்கு எதிராக போராடும் ஓய்வுபெற்ற போலீஸ் அதிகாரியாக ரஜினி இந்தப்படத்தில் நடிக்கவுள்ளது குறிப்பிடத்தக்கது.
மணிரத்னம் வீட்டில் திடீரென நடந்த முன்னணி இயக்குனர்களின் சந்திப்பு: தீயாய் பரவும் புகைப்படம்.!