ஸ்ரீதேவியை கவுரவித்த கூகுள்
இந்தியத் திரையுலகத்தின் கனவுக்கன்னியாக ஒரு காலத்தில் இருந்தவர் மறைந்த நடிகை ஸ்ரீதேவி. இன்று அவரது 61வது பிறந்தநாள். அவரை கவுரவிக்கும் விதத்தில் 'கூகுள்' இணையதளத்தில் இன்று 'ஸ்ரீதேவியின் டூடுள்' வெளியிடப்பட்டுள்ளது.
“எல்லா காலத்திலும் மிகவும் செல்வாக்குமிக்க பாலிவுட் நடிகைகளில் ஒருவர் என பரவலாகக் கருதப்படும் இந்திய நடிகை ஸ்ரீதேவியை இன்றைய டூடுள் கொண்டாடுகிறது” எனக் குறிப்பிட்டுள்ளது கூகுள்.
சமூக வலைத்தளங்களில் ரசிகர்களும், சினிமா பிரபலங்களும் மறைந்த நடிகை ஸ்ரீதேவிக்கு பிறந்தநாள் வாழ்த்துகளைத் தெரிவித்து நினைவு கூர்ந்து வருகிறார்கள்.
குழந்தை நட்சத்திரமாக அறிமுகமான ஸ்ரீதேவி சுமார் 5 தசாப்தங்களாக மொத்தம் 260 படங்களில் நடித்திருக்கிறார். 90 தெலுங்குப் படங்கள், 70 தமிழ்ப் படங்கள், 70 ஹிந்திப் படங்கள், 25 மலையாளத் திரைப்படங்கள், 5 கன்னடப் படங்கள் என இந்தியத் திரையுலகத்தின் முக்கிய மொழிகளில் நடித்திருக்கிறார்.