கடார் 2 சக்சஸ் பார்ட்டியில் ஒன்றாக கலந்து கொண்ட மும்மூர்த்திகள்
சமீபத்தில் பாலிவுட்டில் கடார் 2 என்கிற படம் வெளியானது. சன்னி தியோல், அமிஷா படேல் நடித்திருந்த இந்த படத்தை அனில் சர்மா என்பவர் இயக்கி இருந்தார். இந்த படம் ரசிகர்களிடம் மிகுந்த வரவேற்பை பெற்று தற்போது 500 கோடிக்கும் அதிகமான வசூலை கடந்துள்ளது. இத்தனைக்கும் இந்த படத்துடன் அக்ஷய் குமாரின் ஓஎம்ஜி 2, ரஜினிகாந்த்தின் ஜெயிலர் உள்ளிட்ட படங்கள் வெளியானாலும் இந்த படம் அந்த போட்டியிலும் எதிர்நீச்சல் போட்டு அபரிமிதமாக வசூலித்துள்ளது.
இந்த நிலையில் கடார் 2 படக்குழுவினர் இந்த படத்தின் சக்சஸ் பார்ட்டியை வெகு விமர்சையாக கொண்டாடினர். இதில் பாலிவுட்டில் உள்ள பிரபலங்கள் பலரும் கலந்து கொண்டனர். குறிப்பாக ரொம்பவே அரிதாக பாலிவுட்டின் மும்மூர்த்திகளான ஷாரூக்கான், சல்மான்கான், அமீர்கான் ஆகிய மூவருமே இந்த சக்சஸ் பார்ட்டியில் நீண்ட நாளைக்கு பிறகு ஒன்றாக கலந்து கொண்டார்கள் என்பது குறிப்பிடத்தக்கது.