உதயநிதி ஸ்டாலின்
அமைச்சர் உதயநிதி ஸ்டாலின் டெங்கு, மலேரியா மற்றும் கொரோனா போல் சனாதனமும் ஒழிக்கப்பட வேண்டும் என்று கூறியிருந்தார். அவரது பேச்சுக்கு நாடு முழுவதும் எதிர்ப்பு கிளம்பியுள்ளது. தமிழ்நாடு, டெல்லி, உத்தரப்பிரதேசம் உட்பட பல்வேறு மாநிலங்களிலும் அமைச்சர் உதயநிதி ஸ்டாலின் மீது வழக்குப்பதிவு செய்யப்பட்டுள்ளது.
கூட்டணியில் சலசலப்பு
நாடு முழுவதும் பாஜகவினர் மட்டுமின்றி பல்வேறு கட்சியினரும் உதயநிதி ஸ்டாலினின் பேச்சுக்கு கண்டனம் தெரிவித்து வருகின்றனர். உதயநிதி ஸ்டாலினின் பேச்சு திமுக இடம்பெற்றுள்ள இந்தியா கூட்டணியிலும் சலசலப்பை ஏற்படுத்தியுள்ளது.
திருப்பதி : விஐபி தரிசனத்தில் சூப்பர் ஆஃபர்: தேவஸ்தானம் அதிரடி அறிவிப்பு!
தலைக்கு ரூ.10 கோடி
உத்தரப்பிரதேச மாநிலம் அயோத்தியை சேர்ந்த சாமியார் ஒருவர், உதயநிதி ஸ்டாலினின் தலையை கொண்டு வந்தால் 10 கோடி ரூபாய் வெகுமதி அளிப்பதாக கூறியுள்ளார். தொடர்ந்து தான் பேசியது சரிதான் என கூறி வருகிறார் உதயநிதி ஸ்டாலின். இந்நிலையில் உதயநிதி ஸ்டாலினின் இந்த பேச்சுக்கு திருப்பதி தேவஸ்தானம் கண்டனம் தெரிவித்துள்ளது.
திருப்பதி தேவஸ்தானம் கண்டனம்
திருமலை திருப்பதி தேவஸ்தானத்தின் அறங்காவலர் குழு ஆலோசனை கூட்டம் நேற்று நடைபெற்றது. இந்தக் கூட்டத்தில் அமைச்சர் உதயநிதி ஸ்டாலினின், சனாதனம் குறித்த பேச்சுக்கு கண்டனம் தெரிவிக்கப்பட்டது. தொடர்ந்து உதயநிதியின் பேச்சு குறித்து கருத்து தெரிவித்த திருமலை திருப்பதி தேவஸ்தான அறங்காவலர் குழு தலைவர் பூமனா கருணாகர் ரெட்டி, உதயநிதி ஸ்டாலின் பேசியதற்கு அறங்காவலர் குழு தலைவராக மட்டுமின்றி அரசியல் கட்சி தலைவராகவும் சனாதன தர்மத்தை கடைபிடிக்கும் நபராகவும் அதனை கண்டிப்பதாக தெரிவித்தார்.
கலவரரம் ஏற்படும்
சாதி, மத, அரசியல் ரீதியாக ஆதாயம் பெறுவதற்காகவே உதயநிதி ஸ்டாலின் இப்படி பேசியிருப்பதாகவும் சமூகத்தில் அமைதியின்மை கொண்டு வர நினைப்பவர்கள்தான் இப்படி பேசுவார்கள் என்றும் அவர் கூறினார். மேலும் சனாதன தர்மம் என்பது மதம் அல்ல என்றும் அது வாழ்க்கை முறை என்றும் பூமனா கருணாகர் ரெட்டி தெரிவித்தார். இதை அறியாமல் சாதியின் பெயரால் விமர்சித்தால், சமூகத்தில் கலவரம் உருவாகும் ஆபத்து ஏற்படும் என்றும் பூமனா கருணாகர் ரெட்டி தெரிவித்தார்.