கர்நாடகா மாநிலத்தின் வடக்கு பகுதியில் அமைந்துள்ள பிடார், யத்கிர், ராய்ச்சூர், கொப்பல், கலபுர்கி, பல்லாரி, விஜயநகரா என 7 மாவட்டங்களை உள்ளடக்கியது கல்யாண கர்நாடகா. ஹைதராபாத் நிஜாம் ஆட்சியில் இருந்த பகுதிகள் சுதந்திர இந்தியாவில் கர்நாடகா உடன் இணைந்த நிலையில் இவற்றுக்கு “கல்யாண கர்நாடகா” என்று பெயர் வைத்து அழைத்து வருகின்றனர். இந்தப் பகுதியில் பேருந்து சேவைகளை கல்யாண கர்நாடகா சாலை போக்குவரத்து கழகம் (KKRTC) அளித்து வருகிறது.
பெண் பயணிகள் அதிகரிப்பு
கடந்த சில மாதங்களாக அரசு பேருந்துகளில் பயணிக்கும் பெண் பயணிகளின் எண்ணிக்கை வெகுவாக அதிகரித்து வந்துள்ளது. இதற்கு காரணம் முதலமைச்சர் சித்தராமையா தலைமையிலான காங்கிரஸ் ஆட்சி கொண்டு வந்த சக்தி திட்டம் தான். இதன்படி, நகரப் பேருந்துகளில் பெண்கள் இலவசமாக பயணிக்க அனுமதிக்கப்பட்டு வருகின்றனர். கடந்த இரண்டரை மாதங்களில் கல்யாண கர்நாடகா மாவட்டங்களில் மட்டும் 16.7 லட்சம் பயணிகள் நகரப் பேருந்துகளில் பயணம் செய்துள்ளனர்.
டிக்கெட் வருவாய்
இதன்மூலம் 200 கோடி ரூபாய்க்கும் மேல் வருவாய் கிடைத்துள்ளது. இதனால் தற்போதைய பேருந்துகளின் எண்ணிக்கை போதுமானதாக இல்லை. அதேசமயம் புதிய பேருந்துகளை வாங்கும் அளவிற்கு நிதி ஆதாரமும் கிடையாது. இந்நிலையில் கல்யாண கர்நாடகா சாலை போக்குவரத்து கழகம் புதிய திட்டத்தை முன்னெடுத்துள்ளது. அதாவது, 85 பழைய பேருந்துகளை பழுது பார்த்து புதுப்பித்து பயன்படுத்த உள்ளனர்.
கல்யாண கர்நாடகா போக்குவரத்து கழகம்
இவை KKRTC-ன் பல்வேறு வழித்தடங்களில் இயக்கப்பட உள்ளன. அடுத்தகட்டமாக பல்வேறு பணிமனைகளில் இருந்து 215 பேருந்துகளை பழுதுநீக்கி பயன்படுத்த திட்டமிடப்பட்டுள்ளது. இதன்மூலம் பழைய பேருந்துகள் மட்டுமே சுமார் 300 என்ற எண்ணிக்கையில் பயன்பாட்டிற்கு வரவுள்ளன. இந்த இடத்தில் ஒரு விஷயத்தை புரிந்து கொள்ள வேண்டும். புதிதாக ஒரு பேருந்தை வாங்கினால் 35 முதல் 40 லட்ச ரூபாய் வரை செலவாகும்.
பழைய பேருந்துகள் புதுப்பிப்பு
அதுவே பழைய பேருந்துகளை புதுப்பிக்க 2 முதல் 3 லட்ச ரூபாய் மட்டுமே செலவாகும். அதிலும் மிகவும் பழைய பேருந்துகள் மீண்டும் பயன்படுத்தப் படாது. 8 லட்சம் கிலோமீட்டர் வரை ஓடிய பேருந்துகளை மட்டும் தேர்வு செய்து உரிய பழுதுகளை நீக்கி மீண்டும் பயன்பாட்டிற்கு கொண்டு வர உள்ளனர்.
புதிய பேருந்துகள் ஏற்பாடு
ஏற்கனவே 802 புதிய பேருந்துகளை வாங்க KKRTC நிதி ஒதுக்கீடு செய்தது. இதில் 388 பேருந்துகள் வாங்கப்பட்டு பயன்பாட்டிற்கு வந்தன. எஞ்சிய பேருந்துகள் படிப்படியாக வாங்கப்படும் எனத் தெரிகிறது. இதற்கிடையில் பழைய பேருந்துகளும் சேர்ந்தால் KKRTC-ன் மொத்த பேருந்துகளின் எண்ணிக்கை 4,675ஆக மாறும் எனத் தகவல்கள் தெரிவிக்கின்றன.