ரஜினியின் ஜெயிலர் திரைப்படம் மிகப்பெரிய வெற்றியை பெற்று வசூலில் சக்கைபோடு போட்டு வருகின்றது. எதிர்பார்த்ததை விட இப்படத்திற்கு வரவேற்பு கிடைத்துள்ளது. அதற்கு இப்படத்தின் பாடல்கள் முதல் நடிகர்களின் நடிப்பு வரை அனைத்துமே வெற்றிக்கு காரணமாக அமைந்தது. இந்நிலையில் கடந்த ஆகஸ்ட் மாதம் 10 ஆம் தேதி வெளியான இப்படம் முதல் வாரத்திலேயே 375 கோடி வசூலித்து சாதனை படைத்தது.
அதைத்தொடர்ந்து இதுவரை 600 கோடிக்கு மேல் வசூலித்து புது புது சாதனைகளை செய்து வருகின்றது ஜெயிலர். இதன் காரணமாக உச்சகட்ட மகிழ்ச்சியில் இருக்கும் கலாநிதிமாறன் ரஜினி, நெல்சன், அனிருத் ஆகியோருக்கு பரிசுகளை வழங்கியுள்ளார். விலையுயர்ந்த கார்கள் மற்றும் காசோலைகளை கலாநிதிமாறன் பரிசாக வழங்கி இருக்கின்றார்.
ரஜினி சாருக்கு நன்றி
இந்நிலையில் இப்படத்தின் வெற்றிக்கு உறுதுணையாக இருந்த மிக முக்கியமானவர்களில் விநாயகனும் ஒருவர். மலையாள திரையுலகை சேர்ந்த விநாயகன் இதற்கு முன்பு தமிழில் ஒரு சில படங்களில் நடித்திருந்தாலும் ஜெயிலர் திரைப்படம் அவரை எங்கேயோ கொண்டுபோய் சேர்த்துள்ளது. வர்மன் என்ற வில்லன் கதாபாத்திரத்தில் கனகச்சிதமாக பொருந்தி மிரட்டலான நடிப்பை வெளிப்படுத்தினார் விநாயகன்.
அவரை தமிழ் ரசிகர்கள் கொண்டாடி வருகின்றனர். இந்நிலையில் ஜெயிலர் படத்தில் நடித்த அனுபவம் பற்றி முதல்முறையாக மனம்திறந்து பேசியுள்ளார் விநாயகன். அவர் கூறியதாவது, ரஜினியின் படம், நெல்சனின் இயக்கம், சன் பிக்சர்ஸ் தயாரிப்பு என்றவுடன் நான் வேறு எதைப்பற்றியும் யோசிக்கவில்லை. உடனே நடிக்க ஒப்புக்கொண்டேன்.
ரஜினியுடன் நடித்ததை மிகப்பெரிய பாக்கியமாக கருதுகின்றேன். வர்மன் கதாபாத்திரம் இந்தளவிற்கு ரீச்சானதற்கு ரஜினி முக்கியமான காரணம். அவர் எனக்கு அவ்ளோ எனர்ஜி கொடுத்தார். நான் இந்த கதாபாத்திரம் இந்தளவிற்கு ரீச்சாகும் என என் கனவில் கூட எதிர்பார்க்கவில்லை. நெல்சனுக்கும், ரஜினிக்கும், தயாரிப்பாளர் கலாநிதிமாறனுக்கும் எனது நன்றிகள் என மிகவும் உணர்ச்சிவசப்பட்டு பேசினார் விநாயகன். தற்போது இந்த வீடியோ தான் இணையத்தில் செம வைரலாகி வருகின்றது என்பது குறிப்பிடத்தக்கது.