சென்னை:
சனாதனம் பற்றிய சர்ச்சை பரபரப்பாக சென்று கொண்டிருக்கும் வேளையில், இதை வைத்து முதல்வர் ஸ்டாலினை கிண்டல் அடித்துள்ளார் தமிழக பாஜக தலைவர் அண்ணாமலை.
சனாதனத்தை டெங்கு, மலேரியாவோடு ஒப்பிட்டு அதனை ஒழித்துக்கட்ட வேண்டும் என்று அமைச்சர் உதயநிதி ஸ்டாலின் பேசியது இந்தியா முழுவதும் பேசுபொருளாக மாறியுள்ளது.
சனாதனம் என்பதற்கு இந்து மதம் என்ற ஒரு அர்த்தமும் இருப்பதால், இந்து மதத்தினரை அழிக்க வேண்டும் என உதயநிதி பேசியதாக பாஜகவினர் பிரச்சாரம் செய்து வருகிறார்கள். இதனால் வட மாநிலங்களில் உதயநிதிக்கு கடும் எதிர்ப்பு எழுந்துள்ளது.
இந்நிலையில், நெல்லையில் நடைபெற்ற பாதயாத்திரையில் இதுதொடர்பாக அண்ணாமலை உரையாற்றினார். அப்போது அவர், “இன்னைக்கு காலையில் செல்போனில் ஒரு மீம்ஸ் பார்த்தேன். அதில் நடிகர் சந்தானம் உதயநிதியை பார்த்து சொல்கிறார், டேய் உங்க அப்பாவை சும்மா இருக்க சொல்லு. போன் போட்டு என் உயிரை வாங்குறாரு. உனக்கும் உதயநிதி ஸ்டாலினுக்கும் என்னய்யா பிரச்சினைனு கேக்குறாரு. நான் சொன்னன், அங்கிள் சந்தானத்துக்கும் உதயநிதிக்கும் பிரச்சினை இல்ல. சனாதனத்துக்கும் உதயநிதிக்கும் தான் பிரச்சினைனு சொல்லிருக்கேன்” என அந்த மீம்ஸில் இருக்கிறது.
இப்படி, சந்தானத்துக்கும், சனாதனத்துக்கும் கூட வித்தியாசம் தெரியாத முதலமைச்சர் நமக்கு இருக்கிறார் என மக்களே நினைக்கிறார்கள். தமிழ்நாட்டின் பிரச்சினை என்ன, தமிழ்நாட்டு மக்களின் பிரச்சினை என்ன என்றே தெரியாமல் முதலமைச்சர் இருக்கிறார். மக்களுக்கு குடிக்க தண்ணீர் இல்லை. ஆனால் சாராயம் தண்ணீர் போல ஓடுகிறது. அரிவாள் கலாச்சாரம் தலைதூக்கியுள்ளது. ஆனால் இது எதை பற்றியும் அக்கறை இல்லாமல் முதல்வர் ஸ்டாலின் இருக்கிறார்” என அண்ணாமலை கூறினார்.