அதிமுகவில் எடப்பாடி பழனிசாமிக்கு இணையாக சில சீனியர்கள் கோலோச்ச துடிக்கும் நிலையில் அதை ஆரம்பத்திலேயே சரிகட்டும் வகையில் அவர் முக்கிய முன்னெடுப்பில் இறங்கியுள்ளதாக சொல்கிறார்கள்.
எடப்பாடி பழனிசாமி செய்ய உள்ள மாற்றம்!அதிமுக பொதுச் செயலாளர் எடப்பாடி பழனிசாமி மதுரையில் அதிமுக மாநாட்டை நடத்தி ஒற்றைத் தலைமையாக தன்னை முன்னிறுத்தி விட்டார். இனி அதிமுகவை எதிர்பார்த்திருந்தால் பிரயோஜனமில்லை என்று ஓபிஎஸ்ஸும் தனித்து போட்டி என்ற நிலைக்கு சென்றுவிட்டார். எல்லாம் சரியாக சென்று கொண்டிருந்தாலும் மேலும் சில மாற்றங்களை நிகழ்த்த எடப்பாடி பழனிசாமி திட்டமிட்டுள்ளதாக சொல்கிறார்கள்.
எடப்பாடியின் எதிர்பார்ப்புஓபிஎஸ் உடன் சேர்த்து வைத்திலிங்கம் உள்ளிட்ட ஆதரவாளர்களை கட்சியிலிருந்து நீக்கி தீர்மானம் நிறைவேற்றப்பட்டது. சட்டப் போராட்டத்திலும் எடப்பாடி பழனிசாமியின் கையே ஓங்கிய நிலையில், கட்சிக்குள் ஒற்றைத் தலைமையாக அசைக்க முடியாத இடத்தை அவர் பெற்றிவிட்ட நிலையில் ஓபிஎஸ் பக்கம் இருந்து அவரது ஆதரவாளர்கள் இந்த பக்கம் இணைவார்கள் என்று எதிர்பார்த்தார்.
சின்ன மீன்களுக்கு வலை!மன்னிப்புக் கடிதம் கொடுத்தால் மீண்டும் வாய்ப்பு என்று அறிக்கையும் விட்டார் எடப்பாடி பழனிசாமி. ஆனால் குறிப்பிடத்தக்க அளவில் யாரும் ஓபிஎஸ் பக்கம் இருந்து எடப்பாடி பக்கம் செல்லவில்லை. எந்த பக்கத்திலும் இல்லாமல் இருந்த அன்வர் ராஜா தான் எடப்பாடி பக்கம் வந்தார். ஓபிஎஸ் தேவையில்லை ஆனால் அவரிடமிருக்கும் ஆதரவாளர்களைத் தான் தன் பக்கம் கொண்டு வர எடப்பாடி திட்டமிட்டார்.
காலியாக உள்ள மாவட்டச் செயலாளர் இடங்கள்!இதனால் ஓபிஎஸ் அணிக்கு சென்ற மாவட்டச் செயலாளர்களை கட்சியிருந்து நீக்கியும் அந்த பதவிகளை இன்னமும் நிரப்பாமல் உள்ளார். எப்போது அந்த பதவிகள் நிரப்ப்பப்படும் என்ற எதிர்பார்ப்பு கட்சியினர் மத்தியில் உள்ளது. கன்னியாகுமரி, தேனி, பெரம்பூர், திருச்சி மாநகர், தஞ்சாவூர், தஞ்சாவூர் வடக்கு ஆகிய மாவட்டச் செயலாளர்கள் பதவிகள் காலியாக உள்ளன. விரைவில் இந்த இடங்களுக்கு நிர்வாகிகளை தேர்ந்தெடுக்க உள்ளாராம்.
சீனியர்களுக்கு கடிவாளம்!
அதுமட்டுமல்லாமல் இவற்றுடன் சேர்த்து அதிமுகவுக்குள் இருக்கும் மாவட்டங்களை அதிகரிக்கவும் திட்டமிட்டுள்ளதாக சொல்கிறார்கள். புதிய மாவட்டங்கள் உருவாக்கினால் பழைய நிர்வாகிகளின் அதிகார எல்லைகள் சுருங்கும். அதே சமயம் ஆரம்பத்தில் இருந்து எடப்பாடி ஆதரவாளர்களாக இருப்பவர்களை அந்த பதவிகளுக்கு கொண்டு வரும் போது தனது பதவிக்கு எப்போதும் ஆபத்து வராது. அதே சமயம் தனக்கு இணையாக அதிகாரம் பண்ணத் துடிக்கும் சில சீனியர்களுக்கு கடிவாளம் போட்டது போல் இருக்கும் என நம்புகிறாராம் எடப்பாடி. இதனால் புதிய மாவட்டங்களை உருவாக்கும் வகையில் பட்டியல் ஒன்றை தயாரித்து வருவதாக சொல்கிறார்கள் அதிமுக வட்டாரத்தில்.