அமைச்சர் உதயநிதி ஸ்டாலின் டெங்கு மலேரியா மற்றும் கொரோனா போல சனாதனமும் ஒழிக்கப்பட வேண்டும் என கூறினார். சென்னையில் நடைபெற்ற சனாதன ஒழிப்பு மாநாட்டில் உதயநிதி ஸ்டாலின் பேசிய இந்த பேச்சு நாடு முழுவதும் பெரும் பரபரப்பை ஏற்படுத்தியுள்ளது.
தமிழ் நாடு மட்டுமின்றி டெல்லி, உத்தரப்பிரதேசம் உள்ளிட்ட பல்வேறு மாநிலங்களிலும் அமைச்சர் உதயநிதி ஸ்டாலின் மீது வழக்குப்பதிவு செய்யப்பட்டுள்ளது. இந்நிலையில் தமிழக பாஜக மூத்த தலைவர்களில் ஒருவரான ஹெச் ராஜா உதயநிதி ஸ்டாலினை கடுமையாக விமர்சனம் செய்துள்ளார்.
மயிலாடுதுறையில் விஸ்வஹிந்து பரிஷத் மாநில துணைத் தலைவர் வாஞ்சிநாதன் இல்லத் திருமண விழாவில் பங்கேற்ற ஹெச் ராஜா பின்னர் செய்தியாளர்களிடம் பேசினார். அப்போது இந்து தர்மத்துக்கு தொன்றுதொட்டு வழங்கிவரும் பெயர் சனாதன தர்மம் என்று கூறிய அவர் சனாதன தர்மம் என்பது நிலையானது என்றார்.
பாலியல் சர்ச்சைகளில் சிக்கிய விழுப்புரம் அன்பு ஜோதி ஆசிரமத்திற்கும் சங்கரன்கோவில் திமுக எம்.எல்.ஏ ராஜா
தாய், சகோதரி, மனைவி ஆகிய உறவுகள் எப்படி நிலையானதோ அப்படிதான் சனாதனமும் நிலையானது என்று கூறிய ஹெச் ராஜா அதை எப்படி மாற்ற முடியும் என்று கேள்வி எழுப்பினார். மேலும் திராவிடர்கள் அடிமுட்டாள்கள் என்பது இதன்மூலம் நிரூபணம் ஆகிறது என்றும் கடுமையாக விமர்சித்தார் ஹெச் ராஜா.
வள்ளுவர் சொன்னதைத் தான் உதயநிதி சொல்லியிருப்பதாக அவருக்கு ஆதரவாக பேசிய கவிஞர் வைரமுத்துவையும் படிப்பறிவில்லதாவர் என விமர்சித்துள்ளார் ஹெச் ராஜா. மேலும் சனாதன இந்து தர்மத்தை இழிவுபடுத்தும் கும்பல் வேரடி மண்ணோடு களையப்பட வேண்டும் என்றும் ஹெச் ராஜா தெரிவித்தார்.
உதயநிதியின் பேச்சுக்கு ஆந்திர முதல்வர், மம்தா பானர்ஜி , கெஜ்ரிவால், சிவசேனா உள்ளிட்ட இந்தியா கூட்டணி கட்சிகளே எதிர்ப்பு தெரிவித்துள்ளன என்றும் இதுபோன்ற சந்தர்ப்பவாதிகள் கூட்டணி சேர்ந்தாலும் உருப்படாது என்றும் ஹெச் ராஜா கூறியுள்ளார்.