இந்தியாவில் சென்னை, பெங்களூரு, ஐதராபாத், மும்பை, டெல்லி என பெருநகரங்களையே மையமாக வைத்து இயங்கி வந்த தொழில்நுட்ப நிறுவனங்கள் 2 மற்றும் 3ஆம் அடுக்கு நகரங்கள் பக்கம் தங்கள் பார்வையை திருப்பியுள்ளன. இந்த நகரங்களில் தொழில்நுட்ப வேலைவாய்ப்புகள் குறித்து அமைச்சர் பிடிஆர் பழனிவேல் ராஜன் பேசியுள்ளார்.
2ம் கட்ட நகரங்களை நோக்கும் டெக் நிறுவனங்கள்பெரு நகரங்களைக் காட்டிலும் கட்டட வாடகை குறைவு மற்றும் ஊழியர்களுக்கான சம்பளம் குறைவு, திறமையான பட்டதாரிகள் இருப்பது போன்ற காரணங்களால் இரண்டாம் கட்ட நகரங்களை நோக்கி தொழில்நுட்ப நிறுவனங்கள் கவனம் குவித்துள்ளன. தமிழ்நாட்டில் மதுரை, கோவை, திருச்சி, வேலூர் என இரண்டாம் அடுக்கு நகரங்களில் புதிய தொழில்நுட்ப நிறுவனங்கள் வளர ஆரம்பித்துவிட்டன.
தொடக்க புள்ளியாக HCL
குறிப்பாக இவற்றிற்கெல்லாம் முன்னோடியாக ஹெச்சிஎல் நிறுவனம் கடந்த 2016ஆம் ஆண்டே மதுரையில் தனது தகவல் தொழில்நுட்ப நிறுவனத்தை தொடங்கிவிட்டது. அதில், தற்போது ஆயிரக்கணக்கான பணியாளர்கள் பணியாற்றி வருகின்றன.
பதவியேற்ற பிடிஆர் பழனிவேல் தியாகராஜன்இதனிடையே கடந்த மே மாதம் தமிழகத்தின் தகவல் தொழில்நுட்பம் மற்றும் டிஜிட்டல் சேவைகள் துறை அமைச்சராக பிடிஆர் பழனிவேல் தியாகராஜன் பொறுப்பேற்றார். அதன்பிறகு நிதித் துறை போலவே தகவல் தொழில்நுட்பத் துறையிலும் பல்வேறு சீர்திருத்தங்களை மேற்கொள்ள ஆரம்பித்துவிட்டார். தினமும் தகவல் தொழில்நுட்ப நிறுவனங்களுடன் சந்திப்பு, ஆலோசனைக் கூட்டங்கள் என நடவடிக்கைகளை மேற்கொண்டு வருகிறார்.
மதுரை ஹெச்சிஎல் நிகழ்ச்சிமதுரையில் செயல்பட்டு வரும் ஹெச்சிஎல் டெக்னாலஜி நிறுவனம் நேற்று எட்டாம் ஆண்டில் அடியெடுத்து வைத்தது. இதற்கான விழா நேற்று மாலை மதுரையில் நடைபெற்றது. அதில், தமிழகத்தின் தகவல் தொழில்நுட்பத் துறை அமைச்சர் பிடிஆர் பழனிவேல் தியாகராஜன் கலந்துகொண்டார். நீண்ட காலமாக மதுரை ஹெச்சிஎல் நிறுவனத்தில் பணிபுரியும் ஊழியர்களை பாராட்டிய அமைச்சர், ஊழியர்களுடனான கேள்வி பதில் நிகழ்ச்சியிலும் கலந்துகொண்டார்.
உருவாகும் டெக் வேலைவாய்ப்புகள்இதுதொடர்பாக அமைச்சர் பழனிவேல் தியாகராஜன் தனது முகநூல் பக்கத்தில், “இரண்டாம் மற்றும் மூன்றாம் அடுக்கு நகரங்களில் தொழில்நுட்பம் சார்ந்த வேலைவாய்ப்புகளை அதிகப்படுத்த நினைக்கும் எங்கள் நோக்கத்தை செயல்படுத்த ஒரு முக்கியமான டெம்பிளேட்டாக மதுரை ஹெச்சிஎல் உள்ளது. ஹெச்சிஎல் நிறுவனர் ஷிவ் நாடாரின் தொலைநோக்கும் பார்வைக்கும், ஒட்டுமொத்த ஹெச்சிஎல் குழுமத்திற்கும் நன்றியைத் தெரிவித்துக்கொள்கிறேன்” என்று கூறியுள்ளார்.
எதிர்பார்ப்பில் இளைஞர்கள்
இரண்டாம் அடுக்கு நகரங்களில் தொழில்நுட்ப வேலைவாய்ப்புகளை இன்னும் அதிகரிக்கும் முயற்சிகளில் தமிழக அரசு ஈடுபட்டு வருகிறது. இதற்காக பல நகரங்களில் டெக் பார்க்குகளை உருவாக்கி வருகிறது. தமிழக அரசு மற்றும் பிடிஆரின் முன்னெடுப்புகளால் வரும் காலத்தில் சிறு நகரங்களைச் சேர்ந்த இளைஞர்கள் தங்களது ஊரிலேயே நல்ல ஊதியத்துடன் தொழில்நுட்ப பணிகளில் இணையலாம் என்ற நம்பிக்கையுடன் காத்திருக்கிறார்கள் பட்டதாரி இளைஞர்கள்.