தெலுங்கானா மாநிலம் பஹ்தாத்ரி கொத்தகுடேம் மாவட்டத்தைச் சேர்ந்த கர்ப்பிணி பழங்குடியின பெண் ஒருவருக்கு கடந்த செவ்வாய்க்கிழமை காலை பிரசவ வலி ஏற்பட்டுள்ளது. இதையடுத்து அவரது குடும்பத்தினர் அருகில் உள்ள மண்டல் தலைமையக மருத்துவமனைக்கு கர்ப்பிணியை டோலியில் சுமந்தப்படி சென்றனர்.
பழங்குடியின மக்கள் வசிக்கும் பகுதியில் சாலை வசதி இல்லாததால் அந்தப் பெண்ணை கயிற்று கட்டிலில் படுக்க வைத்து கயிற்று கட்டிலை சுமந்தப்படி அவரது குடும்பத்தினர் வனப்பகுதி வழியாக சென்றுள்ளனர். கர்ப்பிணிப் பெண்ணை சாலை இல்லாத பகுதியில் குடும்பத்தினர் டோலியில் சுமந்து செல்லும் காட்சி சமூக வலைதளங்களில் வைரலாகி வருகிறது.
ரூ. 6800 கோடியில் 2 ரயில் பாதைகள்… தெலுங்கானாவுக்கு அடித்த ஜாக்பாட்!
சுமார் 20 கிலோ மீட்டர் தொலைவு நடந்து சென்று சத்தியநாராயணபுரம் ஆரம்ப சுகாதார நிலையத்திற்கு கொண்டு சென்றனர். அங்கு அவரை பரிசோதித்த மருத்துவர்கள் அவருக்கு ரத்த அழுத்தம் அதிகமாக இருந்ததால் ஆரம்ப சுகாதார நிலையத்தில் இருந்து ஆம்புலன்சில் பத்ராசலம் அரசு மருத்துவமனைக்கு அனுப்பி வைக்கப்பட்டார்.
பத்ராசலம் அரசு மருத்துவமனையில் அந்த பெண்ணுக்கு ஆண் குழந்தை பிறந்தது. தாயும் சேயும் நலமுடன் இருப்பதாக தகவல் வெளியாகியுள்ளது. இந்நிலையில் பிரசவ வலியால் துடித்த பெண் 20 கிலோ மீட்டர் டோலியில் கால் நடையாக நடந்து சென்ற சம்பவம் பெரும் பரபரப்பை ஏற்படுத்தியுள்ளது.
இதுகுறித்து கருத்து தெரிவித்து வரும் எதிர்க்கட்சிகள் முதல்வர் சந்திரசேகர ராவ் தலைமையிலான இத்தனை ஆண்டு கால ஆட்சியில் தெலுங்கானாவின் நிலைமை இதுதான் என விமர்சனம் செய்து வருகின்றன.