திமுக ஆட்சி காலமான 1996 – 2001 வரை தமிழகத்தின் போக்குவரத்துத் துறை அமைச்சராக இருந்தவர் பொன்முடி. அமைச்சராக இருந்த கால கட்டத்தில் வருமானத்திற்கு அதிகமாக 1 கோடியே 36 லட்சம் ரூபாய் சொத்து சேர்த்ததாக பொன்முடி மீதும், அவரது மனைவி விசாலாட்சி மீதும் அதன்பிறகு வந்த அதிமுக ஆட்சியில் 2002ஆம் ஆண்டு லஞ்ச ஒழிப்புத் துறை வழக்குப் பதிவு செய்தது. விழுப்புரம் மாவட்ட முதன்மை நீதிமன்றத்தில் நடைபெற்று வந்த இந்த வழக்கு வேலூர் நீதிமன்றத்திற்கு மாற்றம் செய்யப்பட்டது.
பல ஆண்டுகளாக இவ்வழக்கு விசாரணையில் இருந்து வந்த நிலையில் வேலூர் நீதிமன்றத்தில் 172 சாட்சியங்களிடம் விசாரிக்கப்பட்டு வாதங்களும் நிறைவுபெற்றன. இதனையடுத்து, வேலூர் நீதிமன்றம் கடந்த ஜூன் மாதம் வழங்கிய தீர்ப்பில், பொன்முடி, விசாலாட்சி மீதான குற்றச்சாட்டுகளுக்கு போதிய ஆதாரங்கள் இல்லை எனக் கூறி அவர்களை விடுவித்தது.
இந்த வழக்கின் தீர்ப்பை எதிர்த்து லஞ்ச ஒழிப்புத் துறை மேல்முறையீடு செய்யவில்லை. இதனிடையே இவ்வழக்கை தாமாக முன்வந்து மறுஆய்வுக்கு எடுத்துக்கொண்டார் நீதிபதி ஆனந்த வெங்கடேசன். மிக மோசமான முறையில் விசாரிக்கப்பட்டுள்ளதால் இவ்வழக்கை தாமாக முன்வந்து விசாரணைக்கு எடுத்துள்ளேன் என விளக்கமும் அளித்தார்.
இதுபோலவே அமைச்சர்கள் கே.கே.எஸ்.எஸ்.ஆர்.ராமச்சந்திரன், தங்கம் தென்னரசு ஆகியோர் விடுவிக்கப்பட்ட உத்தரவுகளையும் எதிர்த்து தாமாக முன்வந்து மறுஆய்வு மனுவை விசாரணைக்கு எடுத்தார் நீதிபதி ஆனந்த வெங்கடேசன். இதுதொடர்பாக விளக்கம் அளித்த ஆர்.எஸ்.பாரதி, “திமுக அமைச்சர்கள் மீதான வழக்கை தாமாக விசாரிக்க இந்த நீதிபதிதான், எடப்பாடி பழனிசாமிக்கு எதிரான வழக்கை மறு விசாரணை நடத்துவது நீதிமன்றத்தின் நேரத்தை வீணடிக்கும் செயல் என்றார்” என குற்றம்சாட்டினார்.
மன்னார்குடி பஞ்சாயத்து யூனியன் சோ்மன் வீட்டில் சி.பி.சி.ஐ.டி சோதனை
இந்த நிலையில் அமைச்சர் பொன்முடிக்கு எதிரான வழக்கு உயர்நீதிமன்றத்தில் நீதிபதி ஆனந்த் வெங்கடேசன் முன்பு இன்று விசாரணைக்கு வந்தது. அமைச்சர் பொன்முடி தரப்பில் ஆஜரான வழக்கறிஞர் என்.ஆர்.இளங்கோ, “வழக்கு விசாரணை விழுப்புரத்தில் இருந்து வேலூர் மாற்றப்பட்டதற்கும் எங்களுக்கும் எந்தத் தொடர்பும் இல்லை” என்று வாதிட்டார்.
லஞ்ச ஒழிப்புத் துறை தரப்பில் ஆஜரான வழக்கறிஞர், “இந்த வழக்கில் இருந்து நீதிபதியாக தாங்கள் விலக வேண்டும் என்று நாங்கள் கூறவில்லை. அதே நேரத்தில் சட்டப்படி இந்த வழக்கை யார் விசாரிப்பது என்பது குறித்து தலைமை நீதிபதி அல்லது உரிய அமர்வு முன்பு வைத்துதான் முடிவெடுக்க வேண்டும். அதுதான் நீதிபரிபாலன முறையாகும்.
அதுபோலவே, இந்த வழக்கை தாமாக முன்வந்து விசாரணைக்கு எடுக்க நீதிமன்றத்திற்கு அதிகாரம் இல்லை. முதலில் நிர்வாக ரீதியாக நோட்டீஸ் அளித்திருக்க வேண்டும். வழக்கை தாமாக முன்வந்து விசாரிப்பதற்கு நீங்கள் ஒரு விளக்கமும் அளித்தீர்கள். அதில் பல்வேறு குற்றச்சாட்டுகளை அடுக்கியுள்ளீர்கள். இந்த வழக்கில் விசாரணையே மேற்கொள்ளாமல் முன் முடிவுக்கு வந்தது போல ஒரு தோற்றத்தை அது ஏற்படுத்தியுள்ளது” என்று வாதங்களை அடுக்கினார்.
இதனையடுத்து, வழக்கை செப்டம்பர் 14ஆம் தேதிக்கு ஒத்திவைத்த நீதிபதி ஆனந்த வெங்கடேசன், இந்த வழக்கை தான் விசாரிப்பதா அல்லது வேறு நீதிபதிக்கு மாற்றப்படுமா என்பது குறித்து அன்றைய தினம் முடிவு செய்யப்படும் எனவும் அறிவித்தார்.