பாஜகவுக்கு எதிராக இந்தியா கூட்டணி வலுவடைந்து வரும் நிலையில் அதை எவ்வாறு சமாளிப்பது என்று பாஜக யோசித்து வந்தது. அந்த நேரம் பார்த்து சனாதனம் குறித்து உதயநிதி பேச, ‘இதை வச்சு எவ்வளவோ சாதிக்கலாமே’ என வடிவேலு பாணியில் களமிறங்கிவிட்டது. ஆனால் விஷயம் சீரியஸாகிறது என்று டெல்லியிலிருந்து வரும் தகவல்கள் தெரிவிக்கின்றன.
ஆளுநரிடம் புகார்!உதயநிதியை கைது செய்ய வலியுறுத்தி நாடு முழுவதும் வழக்கு தொடரப்பட்டு வரும் நிலையில் தமிழ்நாட்டிலிருந்தும் அழுத்தங்கள் செல்கின்றன. பாஜக சார்பில் ஆளுநரிடமும் இது குறித்து வலியுறுத்தி மனு அளிக்கப்பட்டது. பாஜக தலைவர் அண்ணாமலை நடைபயணத்தில் இருப்பதால், துணைத் தலைவர் கரு.நாகராஜன் தலைமையில் ஒரு குழு இந்த மனுவை ஆளுநரிடம் வழங்கியது.
ஆர்.என்.ரவியும், அண்ணாமலையும்!தமிழ்நாட்டில் கடந்த சில மாதங்களில் அமைச்சரவையில் சில மாற்றங்கள் நடந்துள்ளன, வழக்கு, கைது என்றும் அமைச்சர்கள் அல்லோகலப்பட்டு வருகின்றனர். பாஜக தலைவர் அண்ணாமலை, ஆளுநர் ஆர்.என்.ரவி ஆகியோரை நேரடியாக எதிர்ப்பவர்களே சிக்கலில் வருகின்றனர் என்கிறார்கள் அரசியல் நோக்கர்கள். “அண்ணாமலைக்கும் செந்தில் பாலாஜிக்கும் ஆரம்பம் முதலே ஏழாம் பொருத்தமாக இருந்து வந்தது. அவர் தற்போது அமலாக்கத்துறையால் கைது செய்யப்பட்டு சிறையில் உள்ளார்.
பிடிஆர் சிக்கியது எப்படி?பிடிஆர் பழனிவேல் தியாகராஜன் ஆளுநர் மற்றும் அண்ணாமலை ஆகிய இருவரையும் தொடர்ச்சியாக விமர்சித்து வந்தார். அவர் குறித்த சர்ச்சைக்குரிய ஆடியோவை அண்ணாமலை தரப்பு வெளியிட அவரது துறை மாற்றப்பட்டது. ஆளுநருடன் பனிப்போரில் ஈடுபட்ட பொன்முடி மீதும் அமலாக்கத்துறை ரெய்டு, விசாரணை என்று சென்று கொண்டிருக்கிறது. இந்த சூழலில் திமுக தலைமையால் அதிகம் முன்னிறுத்தப்படும் உதயநிதி ஸ்டாலின் தொடர்ந்து அண்ணாமலையையும், ஆர்.என்.ரவியையும் டார்கெட் செய்து பேசிவருகிறார். எனவே அவருக்கும் சிக்கல் ஏற்படலாம்” என்கிறார்கள்.
சனாதனம் சர்ச்சை பேச்சு!சனாதனத்துக்கு எதிராக திமுக இப்போது அல்ல, கட்சி தொடங்கப்பட்ட காலத்திலிருந்து பேசி வருகிறது. அதற்கும் முன்னர் திராவிடர் கழகத்தில் இருந்தே பெரியார், அண்ணா, கலைஞர் இது குறித்து பேசிவருகின்றனர். அப்படியிருக்க இப்போது உதயநிதி பேசியது மட்டும் ஏன் இந்திய அளவில் சர்ச்சையை ஏற்படுத்துகிறது என்று கேட்டால், உதயநிதி சனாதனம் குறித்து இப்போது பேசியிராவிட்டாலும் வேறு ஏதேனும் ஒரு விஷயத்தை சர்ச்சையாக்கி நாடு முழுவதும் பேசுபொருளாக்கியிருப்பார்கள்.
பாஜகவை காப்பாற்றிய சனாதனம்உதயநிதி கிடைத்ததும் மிகவும் தோதாக போய்விட்டது. நெடுஞ்சாலைத் துறை ஊழல் புகார், அதானி விவகாரம் ஆகியவை எழுந்து பாஜகவுக்கு மீண்டும் நெருக்கடியை கொடுத்தது. எதிர்கட்சிகள் வலிமை பெற்றிருந்த நிலையில் இந்த பிரச்சினைகள் வெளிவந்ததால் நாடு முழுவதும் பாஜக மீதான புகார்கள் கொண்டு சேர்க்கப்படும் என எதிர்பார்க்கப்பட்டது. அந்த சமயம் பார்த்து உதயநிதி பேச பாஜக சுதாரித்துக் கொண்டு இந்தியா கூட்டணியைப் பார்த்து பிரச்சினையை திருப்பிவிட்டது.
களத்தில் இறங்கும் மோடிதமிழக சட்டமன்றத் தேர்தல் சமயத்தில் யூடியூப் சேனல் ஒன்று பதிவேற்றிய கந்தசஷ்டி கவசம் குறித்த வீடியோக்களைக் கொண்டு திமுகவுக்கு எதிராக பாஜக திருப்பிவிட்டது நினைவிருக்கலாம். ஆனால் இம்முறை சனாதனம் குறித்த சர்ச்சையை விரைவாக முடித்துவிடக்கூடாது என்பதில் பாஜக தலைமை உறுதியாக உள்ளதாக சொல்கிறார்கள். அதனாலே அமைச்சரவைக் கூட்டத்திற்குப் பின் அமைச்சரவை சகாக்களுக்கு உத்தரவிட்ட மோடி கடுமையாக எதிர்வினையாற்ற கூறியுள்ளார் என்கிறார்கள்.
உதயநிதி கைது?உதயநிதியை கைது செய்து சனாதனக் காவலர்கள், இந்து சமய காவலர்கள், இந்து மக்களின் காவலர்கள் நாங்கள் தான் என்று காட்ட பாஜக முயற்சிக்கும். உதயநிதிக்கு ஆதரவாகவும், பாஜகவுக்கு எதிராகவும் இந்தியா கூட்டணிக் கட்சித் தலைவர்கள் காத்திரமாக களமாட முடியாது. ஏனெனில் மம்தா பானர்ஜியின் திரினாமூல் காங்கிரஸ், சிவசேனா கட்சி, காங்கிரஸில் சிலர் உதயநிதி பேச்சால் அதிருப்தி அடைந்துள்ளதை பொதுவெளியில் பேசியுள்ளனர். இதனால் அவர்களாலும் பெரிய அளவில் எதிர்க்க முடியாது என்பது பாஜகவின் கணக்காக இருக்கிறது.
பாஜகவுக்கும் லாபம் – திமுகவுக்கும் லாபம்!
அப்படியொரு சம்பவம் நடந்துவிட்டால் உதயநிதி நாடு முழுவதும் பெரிய தலைவராக உருவெடுத்துவிடுவார். தமிழ்நாட்டிலும் அவரது கிராஃப் உயர்ந்துவிடும். மிசாவுக்கு பின்னர் தான் ஸ்டாலின் பெரிய பிம்பமாக உருவெடுத்தார். கல்லக்குடி போராட்டத்துக்கு பின்னர் கலைஞர் பெரிய அரசியல் சக்தியாக எழுந்து நின்றார். அதேபோல் உதயநிதிக்கான வாய்ப்பை பாஜக வழங்குகிறது என்று திமுகவும் அதை எதிர்பார்க்கிறது. கைது செய்தால் அதன் மூலம் வடக்கே பாஜக தனக்கான அரசியல் லாபத்தை அறுவடை செய்யும், கைது செய்யப்பட்டால் திமுக தமிழ்நாட்டில் 40 தொகுதிகளிலும் வெற்றியை பதிவு செய்வதற்கான வாய்ப்பு அமையும். ஆனால் இந்தியா கூட்டணியின் நிலைதான் கொஞ்சம் சறுக்கல் என்கிறார்கள் அரசியல் விமர்சகர்கள்.