Doctor Vikatan: எல்லா வயதினரும் பனங்கிழங்கு எடுத்துக்கொள்ளலாமா…. அது செரிமான பிரச்னையை ஏற்படுத்துமா….? குறிப்பாக, சர்க்கரை நோயாளிகள் பனங்கிழங்கு சாப்பிடுவது எந்த அளவுக்கு சரியானது?
பதில் சொல்கிறார், சென்னையைச் சேர்ந்த ஊட்டச்சத்து ஆலோசகர் அம்பிகா சேகர்
பனங்கிழங்கில் நார்ச்சத்து மிக அதிகம். எல்லோருமே இதை ஓரளவுக்கு எடுத்துக்கொள்ளலாம். ஆனால், கேஸ்ட்ரைட்டிஸ் (Gastritis) எனப்படும் இரைப்பை அழற்சி பிரச்னை உள்ளவர்கள் மட்டும் இதை கவனமாகச் சாப்பிட வேண்டும். அவர்களுக்கு பனங்கிழங்கு, கேஸ்ட்ரைட்டிஸ் பிரச்னையை சற்று தீவிரப்படுத்தலாம். எனவே, அவர்கள் பகல் வேளைகளில் கொஞ்சமாக இதைச் சாப்பிடலாம். மாலை மற்றும் இரவு வேளைகளில் தவிர்த்துவிடலாம்.
பனங்கிழங்கில் உள்ள அதிக அளவிலான நார்ச்சத்து மலச்சிக்கல் பிரச்னையைத் தீர்க்கும். குடல் இயக்கம் சீராவதுடன், கொலஸ்ட்ராலும் கட்டுப்பாட்டுக்குள் வரும். பனங்கிழங்கில் இரும்புச்சத்து அதிகம் என்பதால் ஹீமோகுளோபின் அளவை அதிகரித்து ரத்தச்சோகையை விரட்டக்கூடியதும்கூட. கால்சியம், மக்னீசியம் போன்ற சத்துகளும் இந்தக் கிழங்கில் உள்ளன. இதிலுள்ள புரதச்சத்தானது செல்களை பழுதுபார்க்கவும், புதுப்பிக்கவும் ஹார்மோன்களின் சீரான இயக்கத்துக்கும் உதவக்கூடியது.
ஆன்டிஇன்ஃப்ளமேட்டரி தன்மை கொண்டதால், சருமப் பராமரிப்புக்கும் பனங்கிழங்கு உதவுகிறது. சாப்பிட்ட உணவானது, எவ்வளவு சீக்கிரம் ரத்தச் சர்க்கரையாக மாறுகிறது என்பதை கிளைசெமிக் இண்டெக்ஸ் (Glycemic Index) என்று குறிப்பிடுகிறோம். அந்த வகையில் பனங்கிழங்கில் கிளைசெமிக் இண்டெக்ஸ் மிகவும் குறைவு. எனவே, இதை சர்க்கரை நோயாளிகளும் சிறிதளவு எடுத்துக்கொள்ளலாம். பனங்கிழங்கு சாப்பிடும் நாள்களில், உருளைக்கிழங்கு, கருணைக்கிழங்கு உள்ளிட்ட வேறு எந்தக் கிழங்கு வகைகளையும் எடுத்துக்கொள்ள வேண்டாம்.
உங்கள் கேள்விகளை கமென்ட் பகுதியில் பகிர்ந்து கொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.