அமெரிக்காவைச் சேர்ந்த 61 வயதான டேவ் பாஸ்கோ என்பவர் பார்ப்பதற்கு 38 வயதுடையவர் போலத் தோற்றமளிக்கிறார். இவர் தன்னை `பயோஹேக்கர்’ (biohacker) எனக் குறிப்பிட்டுக் கொள்கிறார்.
அதாவது, ஒருவர் தனது உடல், உணவு மற்றும் வாழ்க்கை முறை ஆகியவற்றில் தீவிர மாற்றங்களை மேற்கொண்டு, ஆரோக்கியம் மற்றும் ஆயுட்காலத்தை நீட்டிக்க முயற்சி செய்வதை `பயோஹேக்கிங்’ என்று குறிப்பிடுகின்றனர்.
இளமையான தோற்றத்தை தக்கவைத்துக் கொள்ள, வயதாகும் செயல்முறையை மெதுவாக்க தான் மேற்கொண்ட முயற்சிகள் குறித்து தனது இணையதள பக்கத்தில் குறிப்பிட்டுள்ளார். அவர், அதிகாலை சூரிய உதயத்திற்கு முன்னே எழுந்து, வெளியில் அதிக நேரத்தைச் செலவிடுகிறார்.
தீவிரமான உடற்பயிற்சிகளைச் செய்து முடிப்பதோடு, குறிப்பிட்ட உணவை மட்டும் உட்கொள்கிறார் மற்றும் கூடுதலாக தினமும் 158 மருந்து சப்ளிமென்ட்டுகளை (Supplements) எடுத்துக்கொள்கிறார்.
அவர் மதிய உணவை அரிதாகவே சாப்பிடுகிறார். அதற்கு பதிலாக, மாலை 3 முதல் 5 மணிக்கெல்லாம் இரவு உணவை சாப்பிட்டு முடித்து விடுகிறார். இவர் எப்போதும் ஆர்கானிக் உணவுகள், புல் சாப்பிடும் மாடுகளின் இறைச்சி, அடைக்கப்பட்டு வளர்க்கப்படாமல், சுதந்திரமாகச் சுற்றித் திரியும் முறையில் வளர்க்கப்பட்ட கோழிகள் (Free-range chicken) அல்லது காட்டில் பிடிக்கப்பட்ட மீன் ஆகியவற்றைத் தேர்ந்தெடுத்து சாப்பிடுகிறார்.
அவர் பலவித காய்கறிகளில் பூண்டு, மூலிகைகள் மற்றும் உப்பில் புளிக்கும் வரை வைக்கப்பட்ட முட்டைகோஸை தொடர்ந்து தனது உணவில் சேர்த்துக் கொள்கிறார்.
இவர் தனது 90 அல்லது 110 வயதுக்கு மேலும் ஆரோக்கியமாக வாழ்வதை நோக்கமாகக் கொண்டு செயல்படுகிறார்.
இவரின் கதை பயோஹேக்கிங் இயக்கத்தில் ஆர்வத்தைத் தூண்டியுள்ளது. “பலரும் தங்களது ஆரோக்கியத்தை மேம்படுத்த பல்வேறு முறைகளைப் பரிசோதித்து, முதுமையை மெதுவாக்கலாம். இருப்பினும், இத்தகைய தீவிர அணுகுமுறைகள் விஞ்ஞானத்தால் உறுதி செய்யப்படவில்லை. எனவே, இது அனைவருக்கும் ஏற்றதாக இருக்காது” என்று வல்லுநர்கள் எச்சரிக்கின்றனர்.