சென்னை: தமிழகத்தில் 18 இடங்களில் நேற்று வெயில் சதமடித்தது. வட தமிழகத்தின் உள் மாவட்டங்களில் இன்று பெரும்பாலான இடங்களில் வெப்ப அலை வீசும். அதிகபட்சமாக 111 டிகிரி ஃபாரன்ஹீட் வெப்பநிலை பதிவாக வாய்ப்பு உள்ளதாக வானிலை ஆய்வு மையம் தெரிவித்துள்ளது.
இது தொடர்பாக சென்னை வானிலை ஆய்வு மையம் வெளியிட்ட செய்திக்குறிப்பு: வட தமிழக உள் மாவட்டங்களில் இன்று பெரும்பாலான இடங்களிலும், வரும் 4, 5, 6-ம் தேதிகளில் சில இடங்களிலும் வெப்ப அலை வீசக்கூடும்.
வட தமிழகத்தின் உள் மாவட்டங்களில் இன்றும், நாளையும் (மே 3, 4) சில இடங்களில் 111 டிகிரி, இதர மாவட்டங்களின் சமவெளிப் பகுதிகளில் 106 டிகிரி, கடலோர மாவட்டங்கள் மற்றும் புதுச்சேரியில் 104 டிகிரி ஃபாரன்ஹீட் வரை வெப்பநிலை இருக்கக்கூடும்.
தமிழகப் பகுதிகளின் மேல்வளிமண்டல கீழடுக்கு சுழற்சி நிலவுகிறது. இதன் காரணமாக இன்று முதல் வரும் 6-ம் தேதி வரை தமிழகத்தில் ஓரிரு இடங்களிலும், புதுச்சேரி, காரைக்கால் பகுதிகளிலும் இடி, மின்னல் மற்றும் பலத்த காற்றுடன் (மணிக்கு 30 கி.மீ. முதல் 40 கி.மீ. வரை) கூடிய, லேசானதுமுதல் மிதமான மழை பெய்யக்கூடும். வரும் 7, 8-ம் தேதிகளில் தமிழகத்தில் சில இடங்களில் லேசானதுமுதல் மிதமான மழை பெய்யக்கூடும். இவ்வாறு செய்திக்குறிப்பில் தெரிவிக்கப்பட்டுள்ளது.
தமிழகத்தில் நேற்று மாலை 5.30 மணி வரை பதிவான வெப்பநிலை அளவுகளின்படி அதிகபட்சமாக கரூர் பரமத்தியில் 112 டிகிரி, ஈரோட்டில் 111 டிகிரி, வேலூரில் 110 டிகிரி, திருச்சியில் 109 டிகிரி, தருமபுரி, திருத்தணி, திருப்பத்தூர், சேலம் ஆகிய இடங்களில் 108 டிகிரி, மதுரை மாநகரம், மதுரை விமான நிலையம், நாமக்கல் ஆகிய இடங்களில் தலா 107 டிகிரி, பாளையங்கோட்டையில் 105 டிகிரி வெயில் பதிவானது.
சென்னையில் 104 டிகிரி: சென்னை மீனம்பாக்கம், தஞ்சாவூரில் தலா 104 டிகிரி, கோவையில் 103 டிகிரி, நாகப்பட்டினத்தில் 102 டிகிரி, சென்னை நுங்கம்பாக்கம், காரைக்கால் ஆகிய இடங்களில் தலா 100 டிகிரி ஃபாரன்ஹீட் வெயில் பதிவாகியுள்ளது.
கரூர் பரமத்தியில் நேற்று முன்தினம் மே மாதத்தில் கடந்த 47ஆண்டுகளில் இல்லாத அளவாக 111 டிகிரி பதிவாகி இருந்த நிலையில், நேற்று புதிய உச்சமாக 112 டிகிரி வெயில் பதிவாகியுள்ளது.
அதேபோல தருமபுரியில் கடந்த 1991-ம் ஆண்டு மே 3-ம் தேதி 106 டிகிரி பதிவாகி இருந்ததே கடந்த 49 ஆண்டுகளில் பதிவான அதிகபட்ச வெப்பநிலையாக இருந்தது. இந்நிலையில் நேற்று 108 டிகிரி வெயில் பதிவாகி புதிய உச்சத்தை தொட்டுள்ளது. மேலும் சேலத்தில் கடந்த 10 ஆண்டுகளில் இல்லாத அளவாக 108 டிகிரி வெயில் நேற்று பதிவாகி இருப்பது குறிப்பிடத்தக்கது.