இந்த வார டாப் சினிமா தகவல்களை இங்கே பார்க்கலாம்.
தக் லைஃப் ரிலீஸ் தேதி:
மணிரத்னம் இயக்கும் ‘தக் லைஃப்’ திரைப்படத்தின் படப்பிடிப்பு டெல்லியில் நடைபெற்று வருகிறது. சமீபத்தில்கூட கமல், சிம்பு, அபிராமி, நாசர், வையாபுரி ஆகியோர் ஒன்றாக இருக்கும் புகைப்படம் ஒன்று சமூக வலைதளப் பக்கங்களில் கசிந்திருந்தது. இதைத் தொடர்ந்து இந்தப் படத்தில் நடிகர் சிம்புவும் நடித்து வருகிறார் என்பதை படக்குழுவும் அதிகாரபூர்வமாக அறிவித்திருந்தது. மேலும் இந்தப் படம் ரிலீஸ் குறித்த தகவலையும் வெளியிட்டிருக்கிறது. தக் லைஃப் திரைப்படம் குறித்தான செய்தியாளர் குறிப்பில் இத்திரைப்படம் இந்த வருட இறுதியில் வெளியாகும் எனக் குறிப்பிடப்பட்டுள்ளது. ஏற்கெனவே இந்தாண்டு கமல்ஹாசன் நடிப்பில் உருவாகி வரும் ‘கல்கி’, ‘இந்தியன் – 2’ ஆகிய திரைப்படங்களும் இந்த ஆண்டே வெளியாகவுள்ளன என்பது குறிப்பிடத்தக்கது.
‘நாயகன்’ படத்திற்குப் பிறகு இயக்குநர் மணிரத்னமும் நடிகர் கமல்ஹாசனும் இணைகிறார்கள். ‘செக்கச் சிவந்த வானம்’ திரைப்படத்திற்குப் பிறகு இயக்குநர் மணிரத்னத்துடன் இணைகிறார் நடிகர் சிம்பு. மேலும், கமல்ஹாசன் தயாரிக்கும் நடிகர் சிம்புவின் 48வது திரைப்படத்தின் முதற்கட்ட பணிகளும் நடைபெற்று வருகின்றன.
ராயன் அப்டேட்!
நடிகர் தனுஷ் இயக்கியிருக்கும் ‘ராயன்’ திரைப்படத்தின் இறுதிகட்டப் பணிகள் நடந்து வருகின்றன. இந்தப் படத்திற்கு இசையமைப்பாளர் ஏ.ஆர்.ரஹ்மான் இசையமைத்து வருகிறார். இப்படத்தின் முதல் சிங்கிளான ‘அடங்காத அசுரன்’ பாடல் கடந்த வியாழக்கிழமை வெளியாகியிருந்தது. நடிகர் தனுஷ் எழுதியுள்ள இந்தப் பாடலை தனுஷும் ஏ.ஆர்.ரஹ்மானும் இணைந்து பாடியிருக்கிறார்கள். இந்தப் பாடலுக்கு நடிகர் பிரபுதேவா நடனம் அமைத்திருக்கிறார். இந்தப் படத்தின் ரிலீஸ் தேதி குறித்தும் படக்குழு அதிகாரபூர்வமாக அறிவித்திருக்கிறது. தனுஷ், துஷாரா விஜயன், வரலட்சுமி சரத்குமார், சந்தீப் கிஷன், காளிதாஸ் ஜெயராம் ஆகியோர் நடிப்பில் உருவாகியிருக்கிற இந்தப் படம் வருகிற ஜூன் 13-ம் தேதி திரையரங்குகளில் வெளியாகவிருக்கிறது.
நயன்தாரா நடிக்கும் படத்தின் படப்பிடிப்பு நிறைவு!
பிளாக்ஷீப் சேனல் மூலம் மக்களிடையே பரிச்சயமானவர் ட்யூட் விக்கி. இவர் இயக்குநராக அறிமுமாகும் படத்தை பிரின்ஸ் பிக்சர்ஸ் நிறுவனம் தயாரிக்கிறது. ‘மண்ணாங்கட்டி சின்ஸ் 1960’ எனப் பெயரிடப்பட்டிருக்கும் இந்தத் திரைப்படத்தில் கதையின் நாயகியாக நயன்தாரா நடித்து வருகிறார். நடிகர் யோகி பாபுவும் முக்கிய கதாபாத்திரத்தில் நடித்து வருகிறார். இசையமைப்பாளர் ஷான் ரோல்டன் இசையமைக்கிறார். இந்தப் படத்தின் படப்பிடிப்பு முடிந்துவிட்டதாக படக்குழுவினர் அதிகாரபூர்வமாக அறிவித்திருக்கின்றனர்.
அதர்வாவுடன் இணையும் நிமிஷா சஜயன்!
‘ஒரு நாள் கூத்து’, ‘மான்ஸ்டர்’, ‘ஃபர்ஹானா’ ஆகிய திரைப்படங்களை இயக்கிய நெல்சன் வெங்கடேசன் அடுத்ததாக ‘DNA’ என்ற படத்தை இயக்கி வருகிறார். இந்தத் திரைப்படத்தில் அதர்வா, நிமிஷா சஜயன் இணைந்து நடிக்கிறார்கள். இப்படத்தின் பர்ஸ்ட் லூக் போஸ்டர் சமீபத்தில் வெளியானது.
ஒளிப்பதிவாளர் சந்தோஷ் சிவனின் சகோதரர் மறைவு !
‘தளபதி’, ‘ரோஜா’, ‘இருவர்’ ஆகிய திரைப்படங்கள் மூலம் தமிழ்த் திரையுலகில் பரிச்சயமானவர், ஒளிப்பதிவாளர் சந்தோஷ் சிவன். இவரின் தந்தை சிவன் மலையாள திரையுலகில் இயக்குநராகவும் ஒளிப்பதிவாளராகவும் வலம் வந்தவர்.
சந்தோஷ் சிவனின் சகோதரரான சங்கீத் சிவன் கடந்த புதன்கிழமை இயற்கை எய்தினார். மும்பையில் வசித்து வந்த அவரின் வயது 63. உடல் நலக்குறைவு காரணமாகத் தனியார் மருத்துவமனையில் சிகிச்சை பெற்று வந்தவர், சிகிச்சை பலனின்றி உயரிழந்திருக்கிறார். இவர் மலையாளத்தில் ரகுவரன் நடித்த ‘வியூகம்’, மோகன்லால் நடித்த ‘யோதா’, சன்னி தியோல் நடித்த ‘ஸோர்’ (Zor) ஆகிய படங்களை இயக்கியிருக்கிறார்.
விஜய் தேவரகொண்டாவின் லைன் அப்!
சமீபத்தில் நடிகர் விஜய் தேவரகொண்டா நடிப்பில் ‘ஃபேமிலி ஸ்டார்’ திரைப்படம் வெளியாகியிருந்தது. இதனைத் தொடர்ந்து நடிகர் நானியை வைத்து ‘ஜெர்ஸி’ திரைப்படத்தை இயக்கிய கெளதம் டின்னுனூரி இயக்கத்தில் தற்போது விஜய் தேவரகொண்டா நடித்து வருகிறார். இது விஜய் தேவரகொண்டா நடிக்கும் 12வது திரைப்படம். இதனைத் தொடர்ந்து தனது 13வது திரைப்படத்திற்காக டோலிவுட் இயக்குநர் ரவி கிரண் கோலாவுடன் இணைந்திருக்கிறார். மேலும், ‘ஷ்யாம் சிங்கா ராய்’ படத்தை இயக்கிய ராகுல் சங்கிருத்தியானின் இயக்கத்திலும் நடிக்கவிருக்கிறார். இது விஜய் தேவரகொண்டா நடிக்கும் 14வது திரைப்படம் என்பது குறிப்பிடத்தக்கது.
பாகுபலி – 3 அப்டேட்!
‘பாகுபலி – கிரவுன் ஆஃப் பிளட்ஸ்’ என்ற அனிமேட்டட் வெப் தொடர் வருகிற மே 17-ம் தேதி டிஸ்னி + ஹாட்ஸ்டார் ஓ.டி.டி தளத்தில் வெளியாகியிருக்கிறது. இந்த வெப் சீரிஸ் தொடர்பான நிகழ்வு ஹைதராபாத்தில் நடந்திருக்கிறது. இந்த நிகழ்வில் கலந்துகொண்ட இயக்குநர் ராஜமெளலி, “பாகுபலி எனக்கு எப்போதும் ஸ்பெஷல். அந்தப் படத்திற்கு எப்போதும் தனியிடம் உண்டு. பலரும் என்னிடம் ‘பாகுபலி’ திரைப்படத்தின் மூன்றாவது பாகம் எப்போது வெளியாகும் என்று தொடர்ந்து கேட்கிறார்கள். ‘RRR’ திரைப்படம் முடிந்ததோடு ‘பாகுபலி’ திரைப்படத்தின் மூன்றாவது பாகத்தை தொடங்கியிருக்க வேண்டும். அந்தப் படம் கண்டிப்பாக உருவாகும். இது தொடர்பாக பிரபாஸுடன் பேச்சு வார்த்தை நடைபெற்று வருகிறது” எனப் பேசியிருக்கிறார்.