புதுக்கோட்டை மாவட்டம், விராலிமலை அருகே உள்ள அத்திப்பள்ளத்தைச் சேர்ந்த சுப்பிரமணி மகன் வேல்முருகன் (வயது: 32). இவருக்குச் சொந்தமாக பட்டாசுக் கடை மற்றும் குடோன் உள்ளது. முன்புறம் கடையும் பின்புறம் பட்டாசு குடோனும் இருந்துள்ள நிலையில், தீபாவளி பண்டிகை காலக்கட்டத்தில் விற்பனை செய்தது போக மீதமுள்ள பட்டாசுகளை திருவிழா காலங்களில் விற்பதற்காக இந்த குடோனில் வைத்திருந்துள்ளார். இந்நிலையில், அந்த பட்டாசு குடோன் அருகே கடையை விரிவுப்படுத்துவதற்காக தகரக் கொட்டகை போடும் பணி நேற்று நடந்துள்ளது. அதற்காக வெல்டிங் மிஷின் கொண்டு வெல்டு வைத்தபோது அதிலிருந்து பரவிய தீப்பொறி பட்டாசு குடோனில் இருந்த பட்டாசுகள் மீது பட்டுள்ளது. அதில் பட்டாசுகள் வெடித்து சிதறியதில் அந்த பட்டாசு கடை பற்றி எரிந்தது. அதோடு, அங்கிருந்த அந்த குடோனின் உரிமையாளர் வேல்முருகனின் தம்பி கார்த்திக்ராஜா (வயது: 27) சம்பவ இடத்திலேயே உயிரிழந்துள்ளார். மேலும், வெல்டிங் பணி செய்த இந்திராப்பட்டியைச் சேர்ந்த பால்ராஜ் மகன் சிவனேசன் (வயது: 27) என்பவர் படுகாயங்களுடன் உயிருக்கு போராடி கொண்டு இருந்தார் .
பின்னர், பட்டாசு குடோன் வெடித்து சிதறுவதை பார்த்த அப்பகுதி மக்கள் இது குறித்து இலுப்பூர் தீயணைப்புத் துறையினருக்கு தகவல் தெரிவித்தனர். அந்த தகவலின் பேரில் அங்கு சென்ற தீயணைப்புத் துறையினர் அந்த பட்டாசு குடோனில் பற்றி எரிந்த தீயை அணைத்தனர். அதோடு, அதில் படுகாயங்களுடன் சிக்கியிருந்த தொழிலாளி சிவனேசனை மீட்டு சிகிச்சைக்காக மணப்பாறை அரசு மருத்துவமனைக்கு அனுப்பி வைத்தனர். இறந்த கார்த்திக் ராஜாவின் உடலை கைப்பற்றி உடற்கூராய்வு மேற்கொள்வதற்காக மணப்பாறை அரசு மருத்துவமனைக்கு அனுப்பி வைத்தனர். அதோடு, இந்த சம்பவம் குறித்து விராலிமலை காவல் நிலைய போலீஸார் வழக்கு பதிவு செய்து விசாரணை மேற்கொண்டனர். அவர்களின் முதற்கட்ட விசாரணையில் உரிய அனுமதியுடன் அந்த பட்டாசு கடை மற்றும் குடோன் செயல்பட்டு வந்ததும், வெல்டிங் வைக்கும் பணி நடந்த போது அதிலிருந்து சிதறிய தீப்பொறி பட்டு இந்த விபத்து நடந்துள்ளதும் தெரியவந்துள்ளது. இந்நிலையில், இந்த சம்பவம் குறித்து தகவல் அறிந்த புதுக்கோட்டை மாவட்ட எஸ்.பி வந்திதா பாண்டே சம்பவ இடத்திற்கு சென்று பார்வையிட்டார். வெல்டிங் வைக்கும்போது ஏற்பட்ட தீப்பொறி பட்டு பட்டாசு குடோன் எரிந்து இளைஞர் ஒருவர் பலியான சம்பவம், அப்பகுதியில் சோகத்தை ஏற்படுத்தியிருக்கிறது.
Junior Vikatan-ன் பிரத்யேக Whatsapp Group…
இணைவதற்கு இங்கே க்ளிக் செய்யவும்… https://tinyurl.com/2b963ppb
வணக்கம்,
BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://tinyurl.com/2b963ppb