இன்று 8-ம் தேதி. 2024 ம் ஆண்டு. இந்த நாளை லயன் கேட் ஓப்பனிங் நாள் (Lion’s Gate Portal) என்றும் இந்த நாளில் காலை 8 மணி 8 நிமிடம் அல்லது மாலை 8 மணி 8 நிமிடத்துக்கு 8 (infinity) போல பூஜை அறையில் வரைந்துவைத்து தெய்வத்தை வழிபட வேண்டும் என்றும், அவ்வாறு வழிபட்டால் நம் மனதின் விருப்பங்கள் எல்லாம் நிறைவேறும் என்றும், காரணம் சூரியன் அந்த நாளில் சிம்ம ராசிக்குள் பிரவேசிக்க அதற்கான கதவு திறக்கப்படுகிறது என்றும் சொல்கிறார்கள்.
அதாவது சிரியஸ் என்கிற நட்சத்திரம் சூரியனுடன் சேர்ந்து சிம்ம ராசியில் சஞ்சரிக்கும் காலத்தில் திறக்கப்படும் அதிர்ஷ்ட தளமே ‘லயன் கேட் ஒப்பனிங் போர்ட்டல்’ (Lion’s Gate Portal) என்கிறார்கள். அந்த போர்ட்டலில் சூரியன் சஞ்சாரம் செய்யத் தொடங்கும் நாள் மிகவும் அதிர்ஷ்டமானது என்கிறார்கள். அந்த வகையில் 8-ம் மாதம் வரும் 8-ம் தேதி லயன் கேட் ஒப்பனிங் தினமாகக் கருதப்படுகிறது. இது மேலை நாட்டு ஜோதிட அடிப்படையிலும் நியுமராலஜி எனப்படும் எண்ணியல் ஜோதிட அடிப்படையிலும் முக்கியமான தினமாகக் குறிப்பிடப்பட்டுள்ளது. 2024 என்கிற எண்ணைத் தனித்தனியாகக் கூட்டினால் (2+0+2+4) 8 வரும்.
எனவே மூன்று 8 வரும் இந்த நாளில் இன்ஃபினிட்டி எனப்படும் 8 போன்ற குறியீட்டை வரைந்து வழிபாடு செய்தால் மனதின் ஆசைகள் நிறைவேறும் என்கிறார்கள். கேட்டது விரைவில் கிடைக்கும். செல்வம் சேரும். சுபிட்சம் பெருகும் என்று சொல்கிறார்கள். இந்தத் தகவல் இணையத்தில் வைரலாகி இதுகுறித்துப் பலரும் பேசத் தொடங்கியிருக்கிறார்கள்.
இந்தத் தகவல் சரியானதா? இந்த நாளில் இப்படி வழிபாடு செய்வது குறித்து நம் பாரம்பர்ய ஜோதிடம் என்று ஜோதிடர் பாரதி ஶ்ரீதரிடம் கேட்டோம்.
“இணையம் இன்று பரவலாகிவிட்ட நிலையில் இதுபோன்று பல்வேறு தகவல்கள் பரவிய வண்னம் உள்ளன. மேலே குறிப்பிட்ட தகவலின்படி காலை 8 மணி 8 நிமிடம் அல்லது மாலை 8 மணி 8 நிமிடத்துக்கு 8 என்பதைக் கிடைமட்டமாக வரைந்து வைத்து வழிபாடு செய்து வேண்டுதல் செய்ய வேண்டும் என்கிறார்கள். இறைவழிபாடு என்றால் எப்போது செய்தாலும் நிச்சயம் புண்ணிய பலன் கிடைக்கும் என்பதில் சந்தேகம் இல்லை.
8.8.2024 வியாழக்கிழமை, சதுர்த்தி திதி. உத்திர நட்சத்திரம் நிறைந்த நாள். எனவே இந்த நாளில் சூரிய வழிபாடு செய்வது விசேஷம். சூரியன் சிம்ம ராசியில் பிரவேசிக்கும் நாள் என்பது மேலை நாட்டவர்களின் ஜோதிடக் கணக்கு. ஆனால் நம் ஜோதிட முறையில் ஒரு மாதத்தின் தொடக்கத்தில்தான் சூரியன் ராசி மாறுவார். அந்த வகையில் அவர் சிம்ம ராசிக்குள் 17-ம் தேதியே பிரவேசிக்க இருக்கிறார். எனவே சிம்மத்தில் சூரியனுடன் சிரியஸ் நட்சத்திரம் இணைகிறது என்கிற கோட்பாடே நம் ஜோதிடப் படி சரியல்ல. தற்போது சிம்மராசியில் சுக்கிரன் மட்டுமே தனித்து இருக்கிறார். அவரோடு சந்திரன் நாளை இணைந்திருப்பார்.
எனவே லயன் கேட் ஒப்பனிங் என்கிற கருத்தை நாம் ஏற்கவேண்டியதில்லை. யாரேனும் வழிபாடு செய்ய விரும்பினால் மனதாரச் செய்யுங்கள். நிச்சயம் இறைபக்தி நமக்கு நன்மையைக் கொடுக்கும். மாறாக எட்டு என்கிற எண் நமக்கு அதிர்ஷ்டத்தைக் கொண்டுவரும் என்று நம்பி பூஜை அறையில் இன்ஃபினிட்டி வரைந்து வழிபாடு செய்வது நம் பாரம்பர்ய வழக்கம் இல்லை” என்றார்.