டெல்லி தொழிலதிபர் மனைவி அதிதி சிங்கை மிரட்டி ரூ.200 கோடி பணம் பறித்தது, அரசு அதிகாரியாக நடித்து மோசடி செய்தது போன்ற பல்வேறு குற்றச்சாட்டுகளின் அடிப்படையில் மோசடி மன்னன் சுகேஷ் சந்திரசேகர் கைதுசெய்யப்பட்டு, டெல்லி சிறையில் அடைக்கப்பட்டுள்ளார். தொழிலதிபர் மனைவியிடம் வசூலித்த பணத்தில் சுகேஷ் சந்திரசேகர் திகார் சிறையில் இருந்து கொண்டு ஆடம்பரமாக வாழ ஆரம்பித்தார். பாலிவுட் பிரபல நடிகைகளை திகார் சிறைக்கு வரவழைத்து அவர்களுக்கு பரிசுகளையும், பணத்தையும் வாரி வழங்கினார். இதற்கு சிறை அதிகாரிகளும் துணையாக இருந்தனர். அவர்களுக்கும் சுகேஷ் கோடிக்கணக்கில் செலவு செய்தார். சுகேஷ் பாலிவுட் நடிகை ஜாக்குலின் பெர்னாண்டஸிற்கு கோடிக்கணக்கான ரூபாய் மதிப்பில் பரிசுப்பொருள்களைக் கொடுத்துள்ளார்.
அதோடு ஜாக்குலின் பெர்னாண்டஸ் குடும்பத்திற்கும் பண உதவி செய்துள்ளார். இதையடுத்து சுகேஷ் மீதான மோசடி வழக்கில் ஜாக்குலின் பெர்னாண்டஸும் சேர்க்கப்பட்டுள்ளார். இவ்வழக்கில் இருந்து தன்னை விடுவிக்கவேண்டும் என்று கோரி டெல்லி உயர் நீதிமன்றத்தில் ஜாக்குலின் பெர்னாண்டஸ் மனுத்தாக்கல் செய்துள்ளார். அதோடு அடிக்கடி தனக்கு சுகேஷ் கடிதம் எழுதுவதை தடை செய்யவேண்டும் என்றும் ஜாக்குலின் பெர்னாண்டஸ், கோர்ட்டில் மனுத்தாக்கல் செய்துள்ளார். இம்மனுவும் விசாரணையில் இருக்கிறது. இன்று ஜாக்குலின் பெர்னாண்டஸிற்கு பிறந்தநாள் ஆகும். இதையடுத்து சுகேஷ் சந்திரசேகர் ஜாக்குலின் பெர்னாண்டஸை பரிசு மழையில் நனைய வைத்துள்ளார்.
இது தொடர்பாக சுகேஷ் ஜாக்குலினுக்கு எழுதி இருக்கும் கடிதத்தில், “2021ம் ஆண்டு தேர்வு செய்த சொகுசு படகை விலைக்கு வாங்கி, அதற்கு `லேடி ஜாக்குலின்’ என்று பெயரிட்டு பிறந்தநாள் பரிசாக வாங்கி இருக்கிறேன். அது உங்களுக்கு இன்னும் ஒரு மாதத்தில் டெலிவரி செய்யப்படும். அனைத்து வரிகளும் கட்டப்பட்டு சட்டபூர்வமானதாக அது இருக்கும்” என்று குறிப்பிட்டுள்ளார். கடிதத்தில், `எனது பேபி , எனது பொம்மா” எனக் கூறி, பிறந்தநாள் வாழ்த்துகளைத் தெரிவித்துள்ள சுகேஷ், இந்த வருடத்தில் அவருக்கு அனைத்திலும் வெற்றி, உடல் ஆரோக்கியம் மற்றும் அவரது ஆசைகள் நிறைவேற வாழ்த்துவதாகத் தெரிவித்துள்ளார். “நாம் பிரிந்திருந்தாலும் நமது எண்ணங்களும், நமது ஆத்மாக்களும் இணைந்தே இருக்கின்றன” எனக் குறிப்பிட்டிருக்கும் சுகேஷ், ஜாக்குலினுக்காக ஒரு சிறப்பு பிறந்தநாள் பரிசை வைத்திருப்பதையும் வெளிப்படுத்தியிருக்கிறார்.
ஜாக்குலினுக்கு விலங்குகள் நலனில் இருக்கும் ஆர்வம் மற்றும் தேவைப்படுவோருக்கு உதவும் எண்ணத்தை கவுரவிக்கும் வகையில், கேரளாவின் வயநாட்டில் நிலச்சரிவில் பாதிக்கப்பட்டவர்களின் நலனுக்காக ரூ.15 கோடி நன்கொடை அளிப்பதாகவும், பாதிக்கப்பட்டவர்களுக்கு 300 வீடுகள் வழங்குவதாகவும் உறுதியளித்துள்ளார். மேலும் , “விமானம், சொகுசு படகு, பேக், வைரம் போன்றவை மற்றவர்களுக்கு உதவி செய்வதை போன்ற ஒரு மகிழ்ச்சியை தர முடியாது. உனது மகிழ்ச்சியை உறுதிபடுத்த கேரளா அரசுடன் இணைந்து எனது குழு முழுவேகத்தில் செயல்பட்டு வருகிறது.” எனத் தெரிவித்துள்ளார்.
ஜாக்குலினை `மிகவும் மிஸ் பண்ணுவதாக’ குறிப்பிட்டுள்ள சுகேஷ், அனைத்து வலிகளையும் சரி செய்வதாகவும், 2025-ம் ஆண்டு `ரோமியோ-ஜூலியட்டாக’ பிறந்தநாளை சேர்ந்துகொண்டாட காத்திருப்பதாகவும் குறிப்பிட்டுள்ளார். ஜாக்குலின் பிறந்தநாளையொட்டி யூடியூப் சேனல் போட்டியில் வெற்றி பெற்ற ஜாக்குலின் ரசிகர்கள் 100 பேருக்கு ஐபோன் 15 ப்ரோ வழங்கப்படும் என்றும் குறிப்பிட்டிருக்கிறார். கடற்கரைகள் மற்றும் படகுகளில் இருவரும் சென்ற அனுபவத்தை சுகேஷ் சந்திரசேகர் பகிர்ந்திருக்கிறார். இருவரும் கடற்கரையில் இருந்ததை நினைவு கூறும் விதமாக படகு வாங்கி இருப்பதாக, சுகேஷ் குறிப்பிட்டுள்ளார். வேறு சில நடிகைகளுக்கும் சுகேஷ் கோடிக்கணக்கில் பணம் செலவு செய்துள்ளார். சுகேஷ் பரோலில் வந்தபோது ஜாக்குலின் மும்பையில் இருந்து சிறப்பு விமானத்தில் சென்னை சென்று சுகேஷை சந்தித்து விட்டு வந்திருந்தார்.