புதுடெல்லி: இந்திய ரயில் பாதைகள் 95% மின்மயமாக்கப்பட்டுள்ளதன் மூலம் உலகின் மிகப்பெரிய பசுமை ரயில்வே நெட்வொர்க் ஆக உருவெடுத்துள்ளது.
அசோசேம் சார்பில் டெல்லியில் தேசிய கருத்தரங்கு நடைபெற்றது. இதில், ரயில்வே வாரிய கூடுதல் உறுப்பினர் முகுல் சரண்மாத்தூர் பேசும்போது, “கடந்த 2023-24 நிதியாண்டில் ரயில்வே கட்டமைப்பை விரிவாக்கம் செய்வதற்காக மத்திய அரசு ரூ.85 ஆயிரம் கோடி ஒதுக்கியது. இந்தியாவில் மொத்தம் 68 ஆயிரம் கி.மீ. ரயில் பாதைகள் உள்ளன. இதில் 95% மின்மயமாக்கப்பட்டுள்ளன. இதன்மூலம் உலகின் மிகப்பெரிய பசுமைரயில்வே நெட்வொர்க் ஆக இந்திய ரயில்வே உருவெடுத்துள்ளது.
ரயில் பெட்டிகள் நவீனமயமாக்கப்பட்டு வருகின்றன. குறிப்பாக முக்கிய வழித்தடங்களில் நவீன வசதிகளுடன் கூடிய வந்தே பாரத் ரயில்கள் அறிமுகம் செய்யப்பட்டு வருகிறது. தினமும்சுமார் 2 கோடி பேர் ரயிலில் பயணம் செய்கின்றனர்.
டிக்கெட் முன்பதிவை ரத்து செய்வோருக்கு 2 நாட்களுக்குள் ரீபண்ட் வழங்க நடவடிக்கை எடுக்கப்பட்டுள்ளது. தொழில்நுட்ப மேம்பாடு மூலம் விபத்துகள் கணிசமாக குறைந்துள்ளது. சில வழித்தடங்களில் அதிவேக ரயில்கள் இயக்கப்படுகின்றன” என்றார்.
அசோசேம் அமைப்பைச் சேர்ந்த தீபக் சர்மா பேசும்போது, “வரும் 2047-ம் ஆண்டுக்குள் ‘வளர்ச்சியடைந்த இந்தியா’ (விக்சித் பாரத்) என்ற இலக்கைஎட்ட மத்திய அரசு திட்டமிட்டுள்ளது. இதற்கு சீரான, நீடித்த பொருளாதார வளர்ச்சி அவசியம். பொருளாதார வளர்ச்சியை ஊக்குவிக்க ரயில்வே துறையை நவீனமயமாக்க வேண்டியது அவசியம்” என்றார்.