திருவாரூர் கே.டி.ஆர் தெருவைச் சேர்ந்தவர் பாலாஜி (42). இவர் 27வது வார்டு அ.தி.மு.க செயலாளராக இருக்கிறார். இவருடைய மனைவியின் பெயர் தாய் மீனாட்சி. பாலாஜியின் அப்பா ரங்கநாதன் (70). இந்நிலையில் கடந்த ஆண்டு தனது 13 வயது மகளுக்குப் பாலியல் தொல்லை கொடுத்ததாக, ரங்கநாதன் மீது திருவாரூர் அனைத்து மகளிர் காவல் நிலையத்தில் தாய் மீனாட்சி புகார் அளித்தார். குடும்ப பிரச்னை தொடர்பாகப் பொய் புகாரைத் தாய் மீனாட்சி கொடுத்திருப்பதாக அப்போது பேசப்பட்டது.
ஆனாலும் இதை விசாரித்த காவல்துறையினர் ரங்கநாதன் மீது போக்சோ சட்டத்தின் கீழ் வழக்குப்பதிவு செய்து சட்ட நடவடிக்கை மேற்கொண்டனர். மேலும், இது தொடர்பான விசாரணை தொடர்ந்து வருவதாகக் கூறப்படுகிறது. தன் அப்பா மீது மனைவியே புகார் கொடுத்ததை பாலாஜியால் ஏற்றுக்கொள்ள முடியவில்லை. இதனால் பாலாஜிக்கும், தாய் மீனாட்சிக்கும் இடையே அடிக்கடி சண்டை நடந்து வந்தது. அவ்வப்போது பாலாஜி மது போதையில் தாய் மீனாட்சியிடம் அப்பா மீது கொடுத்த புகாரை வாபஸ் வாங்கச் சொல்லி சண்டை போட்டதாகத் தெரிகிறது.
இதேபோல் நேற்று (நவம்பர் 4) தாய் மீனாட்சியிடம் தனது தந்தை மீது கொடுத்த போக்சோ வழக்கை வாபஸ் வாங்க பாலாஜி சொல்லியுள்ளார். செய்யவில்லை என்றால் உன்னைச் சுட்டுக் கொலை செய்து விடுவேன் என நாட்டுத் துப்பாக்கி காட்டி மிரட்டியுள்ளார். இதனால் பயந்த தாய் மீனாட்சி, பாலாஜி தூங்கி, அவர் வைத்திருந்த துப்பாக்கியை எடுத்து திருவாரூர் நகரக் காவல் நிலையத்தில் கொடுத்து விட்டார். அத்துடன் எனது கணவர் என்னைத் துப்பாக்கியைக் காட்டி கொலை செய்து விடுவதாக மிரட்டுவதாகப் புகார் அளித்தார்.
இதன் பேரில் விசாரணை நடத்திய காவல்துறையினர் பாலாஜியைக் கைது செய்தனர். மேலும் துப்பாக்கி அவருக்கு எப்படிக் கிடைத்தது என விசாரணை நடத்தினர். இதில் திருவாரூர் மேட்டுப்பாளையம் பகுதியைச் சேர்ந்த விஜயபாஸ்கர் (46) என்பவர் துப்பாக்கி கொடுத்ததாக பாலாஜி தெரிவித்தார். இதைத்தொடர்ந்து விஜயபாஸ்கரையும் காவல்துறையினர் கைது செய்தனர். இவருக்கு நாட்டுத் துப்பாக்கி எப்படிக் கிடைத்தது என்பது குறித்து தற்போது விசாரணை செய்து வருகின்றனர்.
Junior Vikatan-ன் பிரத்யேக Whatsapp Group…
இணைவதற்கு இங்கே க்ளிக் செய்யவும்… https://tinyurl.com/2b963ppb
வணக்கம்,
BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://tinyurl.com/2b963ppb