சினிமா வேறு, அரசியல் வேறு என்ற பாதையில் பயணிக்கும் விஜய்யின் அரசியல் மாநாடு சென்ற மாதம் விக்கிரவாண்டியில் நடந்தது. அதனை தொடர்ந்து செயற்குழு கூட்டமும் கூடியது.
இந்நிலையில் கட்சி மாநாட்டிற்கு முன்னர், விஜய்யின் கடைசி படமாக சொல்லப்படும் ‘தளபதி 69’ படத்தின் படப்பிடிப்பு ஆரம்பமானது. படப்பூஜை நடந்த அதே நாளில், விஜய்யின் தமிழக வெற்றிக் கழகத்தின் முதல் மாநாட்டுக்குப் பந்தல் கால் நடும் பூஜை நடத்தப்பட்டிருக்கிறது. இந்நிலையில் ‘தளபதி 69’க்கான ஷூட்டிங் மீண்டும் தொடங்கி, விறுவிறுப்பாக நடந்து வருகிறது.
‘துணிவு’ படத்தை அடுத்து ஹெச்.வினோத் இயக்கத்தில் விஜய் நடித்து வரும் படம் ‘தளபதி 69’. ஜனநாயகத்திற்கான தீப்பந்தத்தை ஏற்றுவதற்கான கதை இது என்ற அறிவிப்புடன் பர்ஸ்ட் லுக் வெளியாகின.
இந்தப் படத்தில் பூஜா ஹெக்டே, மமிதா பைஜூ, ப்ரியா மணி, பாலிவுட் நடிகர் பாபி தியோல், பிரகாஷ் ராஜ், நரேன், கௌதம் மேனன் என அசத்தலான நடிகர்களின் கூட்டணி இருக்கிறது. சத்யன் சூரியன் ஒளிப்பதிவு, அனிருத்தின் இசை, அனல் அரசுவின் ஸ்டன்ட் என புது டீமுடன் கைகோத்துள்ளார் வினோத்.
‘இது எல்லாருக்கும் பிடிக்கும்படியான விஜய் படமாக இருக்கும்’ என இயக்குநர் ஹெச். வினோத் அறிவித்துள்ளார். சென்னைக்கு அருகே உள்ள பையனூரில் பெப்சி அமைப்பினருக்கு சொந்தமான இடத்தில் தான் படப்பிடிப்பு தொடங்கியது. கலை இயக்குநர் செல்வகுமார் கைவண்ணத்தில் பாடல் காட்சிக்கான பிரமாண்ட அரங்கம் ஒன்றை அமைத்திருந்தனர். அங்கே மாஸான ஒரு பாடல் காட்சியும் எடுத்துள்ளனர். விஜய், பூஜா ஹெக்டே காம்பினேஷனில் டூயட் பாடல் ஒன்று படமானது. அதன் பின், விஜய் கட்சி வேலைகளில் இறங்கினார். அந்த சமயத்தில் பையனூரிலேயே மீண்டும் அடுத்த காட்சிகளுக்கான அரங்கம் அமைக்கப்பட்டு வந்தன.
செட் ஒர்க்குகள் முழுதாக தயாராகிவிட கடந்த 4-ம் தேதியில் இருந்து மீண்டும் படப்பிடிப்பு நடந்து வருகிறது. இந்த ஷெட்யூலில் பாபி தியோல் இணைந்துள்ளதாகச் சொல்கின்றனர். டயலாக் சீக்குவென்ஸ்கள் படமாக்கப்பட உள்ளன என்கின்றனர். இப்படத்தைத் தயாரித்து வரும் ‘KVN Productions’ கன்னடத்தில் ‘கே.ஜி.எஃப்’ நடிகர் யஷ் நடிக்கும் ‘டாக்ஸிக்’படத்தைத் தயாரித்து வருகிறது. இதற்கு முன்னர் ‘ஆர்.ஆர்.ஆர்’, ‘அனிமல்’, ‘சீதா ராமம்’, ‘கல்கி’ போன்ற படங்களின் கன்னட விநியோக உரிமையை வாங்கி வெளியிட்டிருக்கிறது. இப்போது சூர்யாவின் ‘கங்குவா’ விநியோக உரிமையையும் கைப்பற்றியுள்ளது. அந்தப் படம் 14ம் தேதி வெளியாவதால், அதன்பின்னர் ‘தளபதி 69’க்கான அசத்தல் அப்டேட் வெளியாகிறது.