சன் டிவியில் ஒளிபரப்பான தொடர் `எதிர்நீச்சல்’. இந்தத் தொடருக்கென தனியொரு ரசிகர்கள் பட்டாளமே இருக்கிறது. மிகுந்த எதிர்பார்ப்பையும் பாராட்டையும் பெற்ற தொடர் சில காரணங்களால் விரைவிலேயே நிறைவடைந்தது. இந்த நிலையில் தற்போது `எதிர்நீச்சல் 2’ஆம் பாகம் வெளியாக இருக்கிறது.
இந்தத் தொடரில் ஜனனி கதாபாத்திரத்தில் நடித்திருந்த மதுமிதா, தான் 2ஆம் பாகத்தில் நடிக்கவில்லை என்பதை அவருடைய இன்ஸ்டாகிராம் பக்கத்தில் பகிர்ந்திருந்தார். `புதுப்புது அர்த்தங்கள்’ தொடரில் நடித்திருந்த பார்வதி அந்தக் கதாபாத்திரத்தில் நடிக்க இருப்பதாகவும் தகவல்கள் வெளியாகின. இந்த நிலையில் இந்தத் தொடரில் ஆதிரை கதாபாத்திரத்தில் நடித்திருந்த நடிகை சத்யா தேவராஜனுக்கு ஆனந்த் என்பவருடன் கடந்த 2021ஆம் ஆண்டு திருமணம் நடைபெற்றது. இந்நிலையில் எங்களுடைய கனவு நிஜமாகி இருக்கிறது எனக் குறிப்பிட்டு அது குறித்து சத்யா தேவராஜன் அவருடைய இன்ஸ்டாகிராம் பக்கத்தில் பதிவொன்றை பதிவிட்டிருந்தார்.
அதில், “எங்கள் புதிய தொடக்கங்களைப் பற்றி சற்று தாமதமாக அறிவிக்கிறோம். எங்கள் குடும்பத்தின் அன்பினாலும், ஆதரவினாலும் எங்கள் கனவை நனவாக்கியிருக்கிறோம். திருமண மண்டபம் கட்ட வேண்டும் என்கிற கனவு தற்போது உயிர் பெற்றிருக்கிறது!” எனக் குறிப்பிட்டு புதியதாக அவர் கட்டியிருக்கும் திருமண மண்டபம் குறித்து அறிவித்திருந்தார். பிரமாண்டமாக அவர் கட்டியிருக்கும் மண்டபத்திற்கு அவருடைய ரசிகர்களும், சின்னத்திரை பிரபலங்களும் வாழ்த்துகள் கூறி வருகின்றனர்.
வாழ்த்துகள் சத்யா – ஆனந்த்!